ՕԵԿ-Ը ՎԻՃԵԼԻ ՇԻՆՈՒԹՅՈՒՆԸ ԿԱՌՈՒՑԵԼ-ԱՎԱՐՏԵԼ Է

ՕԵԿ-ի եւ ՀՀ ագրարային համալսարանի միջեւ դատական վեճը շարունակվում է: Հիշեցնենք, որ համալսարանն ու կուսակցությունը վիճարկում են 262 քմ տարածքը, որի վրա ՕԵԿ-ը սկսել էր կառուցապատման աշխատանքներ իրականացնել: Տեւական ժամանակ շարունակվող բախումներիրց եւ լարվածությունից հետո հարցի` դատական կարգով հանգուցալուծումը դեռեւս մոտ չէ, եւ առայժմ մինչեւ վերջ պարզ չէ, թե ով է ճիշտ, ով` սխալ:

Բանն այն է, որ վիճարկվող տարածքի նկատմամբ սեփականության իրավունք է տրվել ոչ միայն Հայաստանի պետական ագրարային համալսարանին, այլեւ «Օրինաց երկիր» կուսակցությանը: Եթե համալսարանին տարածքը տրվել է կառավարության որոշմամբ, ապա ՕԵկ-ը 262 քմ տարածքին տեր է դարձել Երեւանի նախկին քաղաքապետ Երվանդ Զախարյանի շնորհիվ: Արդյունքում` ագրարային համալսարանը դատարան է դիմել՝ վիճարկելու Երվանդ Զախարյանի որոշումը:
Հիշեցնենք, որ 2006 թ. դեկտեմբերի 28-ին ագրարային համալսարանի տարածքում ՕԵԿ-ի կողմից կառուցված ինքնակամ շինությունները ճանաչվել էին պետական սեփականություն եւ կառավարության որոշմամբ անհատույց, անժամկետ օգտագործման իրավունքով հանձնվել համալսարանին: Սակայն 2008 թվականի նոյեմբերին նախկին քաղաքապետ Զախարյանը, ով հիմա էներգետիկայի եւ բնական պաշարների նախարարն է, անտեսելով կառավարության որոշումը, ՕԵԿ-ին սեփականության իրավունքով հանձնել է շինության մի հատվածը եւ կից հողատարածքը: Ի դեպ, նշենք, որ գործող օրենսդրությամբ քաղաքապետարանն այդպիսի լիազորություններ չունի: Պետական գույքի կարգավիճակի փոփոխություն կարող է իրականացնել միայն ՀՀ կառավարությունը համապատասխան որոշմամբ:
Երկու կողմերի միջեւ բուռն վեճը սկսվեց այն ժամանակ, երբ այս տարվա մայիսին ՕԵԿ-ը ցանկապատեց տարածքը եւ սկսեց շինարարական աշխատանքները: Ընդ որում, համալսարանի ղեկավարության պնդմամբ՝ ՕԵԿ-ն իրեն իրավունք է վերապահել 262 քմ-ի փոխարեն կրկնակի ավել` միանգամից 452 քմ տարածք կառուցապատել: Թեեւ հավելյալ տարածքը համալսարանում չեն վիճարկում, դա իսկապես ՕԵԿ-ինն է. վիճելին նշված 262 քմ-ն է:
Այսպիսով՝ Երեւանի Կենտրոն եւ Նորք-Մարաշ վարչական շրջանների ընդհանուր իրավասության առաջին ատյանի դատարանն ամիսներ առաջ ՕԵԿ-ին արգելեց իրականացնել որեւէ շինարարական աշխատանք, բացի համալսարանի ավտոտեխսպասարկման կայանի՝ իր կողմից քանդված տանիքի վերականգնումից: Բայց ՕԵԿ-ը ոչ միայն անտեսեց դատարանի որոշումը, այլեւ մի քանի օրվա ընթացքում, հիմնականում գիշերային ժամերին, վիճահարույց տարածքում կառուցեց շինություն` չունենալով նախագիծ եւ շինթույլտվություն:
«Ժողովուրդ»-ը տեղեկացավ, որ մոտ օրերս Կենտրոն եւ Նորք-Մարաշ վարչական շրջանների ընդհանուր իրավասության դատարանի դատավորն իր աշխատակիցների հետ գնացել է տեղազննման: Սակայն դատավորի եզրակացությունն այս հարցի շուրջ պարզ կլինի միայն նոյեմբերի 4-ի դատական նիստին: Ի դեպ, տեղեկացնենք, որ ՀՀ վարչական դատարանում այժմ քննվում է այն հարցը, թե Երեւանի նախկին քաղաքապետ Երվանդ Զախարյանը Տերյան 74 եւ Աբովյան 43/1 հասցեներում գտնվող վիճարկելի տարածքների ո՞ր հատվածը ո՞ւմ է հատկացրել: Ավելին՝ «Ժողովուրդ»-ի տեղեկություններով՝ տեղազննման ժամանակ ՕԵԿ ներկայացուցիչը փորձել է դատավորին թյուրիմացության մեջ գցել՝ տեղանքը ներկայացնելով այնպես, իբր վիճարկելի տարածքներն իրենց են պատկանում:
Ագրարային համալսարանի պրոռեկտոր Պարույր Էֆենդյանը «Ժողովուրդ»-ի հետ զրույցում վրդովված նկատեց. «ՕԵԿ-ը շենք է կառուցել այն տարածքում, որը մենք վիճարկում ենք: Այդ տարածքը նախկին քաղաքապետ Երվանդ Զախարյանը 2008 թվականին, առանց մեզ հետ խորհրդակցելու, վերցրել է եւ հատկացրել ՕԵԿ-ին: Նշեմ, որ ավելի ուշ քաղաքապետարանը երկու անգամ իրենց տույժի է ենթարկել՝ այդ տարածքում ապօրինի շինարարություն իրականացնելու համար»:
Պրոռեկտորն ընդգծեց, որ ագրարային համալսարանի տնօրինությունը շարունակում է պահանջել, որ չեղյալ համարվի նախկին քաղաքապետ Երվանդ Զախարյանի՝ 2008 թվականին կայացրած որոշումը: Նրա փոխանցմամբ՝ այս ընթացքում ՕԵԿ-ն այդ տարածքում շինարարական աշխատանքներն ավարտել է եւ անցել ներքին հարդարման աշխատանքներին: Թե հատկապես ինչ է կատարվում շինության ներսում, պրոռեկտորը դժվարացավ ասել: Չի բացառվում, որ առաջիկայում այս հարցի շուրջ բախվեն նաեւ Երեւանի քաղաքապետարանի եւ ՀՀ կառավարության շահերը: Հետաքրքիր է, թե ի վերջո ինչ լուծում կստանա այս հարցը:
Ի դեպ, զրույցի ավարտին համալսարանի պրոռեկտորը տեղեկացրեց, որ ՕԵԿ-ի շինարարներն այնպես են կառուցել վիճելի տարածքի ապօրինի շինությունը, որ տանիքը հայտնվել է համալսարանի կողմում, ինչի արդյունքում անձրեւաջրերը թափվում են համալսարանի ավտոտնակների վրա:
Երեկ «Ժողովուրդ»-ը փորձեց այս հարցի շուրջ մեկնաբանություն ստանալ նաեւ ՕԵԿ մամլո խոսնակ Արթուր Միսակյանից, սակայն վերջինս հրաժարվեց պատասխանել՝ խորհուրդ տալով դիմել ԱԺ ՕԵԿ խմբակցության անդամ Հովհաննես Մարգարյանին: Իսկ վերջինս էլ ողջ օրվա ընթացքում չպատասխանեց մեր զանգերին:

ՍՅՈՒՆԷ ՀԱՄԲԱՐՁՈՒՄՅԱՆ

ԼՈՒՐԵՐ

ԳՅՈՒՂԸ ԴԱՏԱՐԿՎԵՑ
Շիրակի մարզի Բարձրաշեն գյուղը՝ որպես համայնք, պաշտոնապես գոյություն չունի: Այն համարվում է Իսահակյան համայնքի վարչական տարածք: Համայնքապետն էլ Իսահակյանի ղեկավարն է՝ Արտավազդ Արսենյանը: Բարձրաշենն ընկած է սարերի մեջ՝ Իսահակյանից 3.5 կմ հեռավորության վրա: Գյուղում ապրող 7-8 ընտանիքի, ընդհանուր առմամբ` 32 մարդու շնորհիվ է, որ Բարձրաշենը գոյատեւում է: Մինչեւ նախանցած տարի Բարձրաշենի դպրոցը տնակային պայմաններում գործել է, որտեղ սովորել են 8-10 երեխա: Իսկ ահա այս տարի կառավարությունը որոշել է լուծարել դպրոցը, քանի որ դպրոցահասակ 0-6 տարեկան երեխաներ գյուղում չկան, առաջիկա տարիներին էլ երեխաներ չեն ծնվելու: Կառավարության որոշմամբ՝ Բարձրաշենի աշակերտները պետք է սովորեն Իսահակյանի միջնակարգ դպրոցում՝ անցնելով օրական 3 կիլոմետրից ավել ճանապարհ:
Իսահակյանի դպրոցի տնօրեն Գնել Հարությունյանից տեղեկացանք, որ Բարձրաշենի դպրոցի պահպանության իրականացումը կառավարությունը հանձնել է իրենց դպրոցին: Իսահակյանի դպրոց են տեղափոխվել ոչ միայն Բարձրաշենի աշակերտները, այլեւ դպրոցի գույքը: Ինչպես նշեց տնօրենը, բարձրաշենցիներն ամեն ինչ արեցին, դիմեցին բոլոր ատյաններին, որպեսզի գյուղը չդատարկվի, անգամ դպրոց հիմնեցին, բայց երիտասարդների արտագաղթի ու ծնելիության պակասի պատճառով այն լուծարվեց:

ԱՐԵՎԻԿ ՀԱԿՈԲՅԱՆ

ՕՄԲՈՒԴՍՄԵՆՆ ԱՆԹՈՒՅԼԱՏՐԵԼԻ Է ՀԱՄԱՐՈՒՄ
Երեկ օմբուդսմեն Կարեն Անդրեասյանը գրություն է ուղարկել Ազգային ժողովի խմբակցությունների ղեկավարներին` տնտեսվարողների դժգոհությունն առաջացրած շրջանառության հարկի օրենքում կատարված փոփոխությունների վերաբերյալ: Օմբուդսմենն առաջարկել է առեւտրականների համար սահմանել շրջանառության հարկով աշխատելու երկու տարբերակ:
Նա առաջարկել է շրջանառության հարկ վճարողներին բաժանել երկու խմբի՝ մինչեւ 20 մլն եւ 20-ից 58.35 մլն դրամ շրջանառություն ունեցողների: Ըստ դրա` առաջին խմբի առեւտրականներին հնարավորություն տալ ընտրելու` աշխատել ապրանքների պարտադիր փաստաթղթավորմամբ՝ վճարելով 1 տոկոս շրջանառության հարկ, կամ աշխատել առանց պարտադիր փաստաթղթավորման՝ վճարելով 3.5 տոկոս շրջանառության հարկ:
Կարեն Անդրեասյանն անթույլատրելի է համարել փոքր բիզնեսով զբաղվող առեւտրականների գործունեության պայմանների վատթարացումը եւ լիահույս է, որ փաստաթղթավորման եւ հարկի չափի ընտրության հնարավորություն ստանալու դեպքում նրանք կազատվեն վարչարարական քաշքշուկից եւ կպահպանեն իրենց բիզնեսը: Հիշեցնենք, որ ավելի վաղ մի խումբ առեւտրականներ դիմում-բողոք էին ներկայացրել Մարդու իրավունքների պաշտպանին օրենքում կատարված փոփոխությունների վերաբերյալ: