Հատկապես այս խորհրդարանական ընտրություններից առաջ իշխանական ուժերն անընդհատ խոսում էին աննախադեպ թափանցիկության եւ քաղաքական նոր որակների ներդրման պատրաստակամության մասին: Թե որքանով դա նրանց հաջողվեց, վիճահարույց հարց է, սակայն որ արդեն ընտրություններից անմիջապես հետո իշխանական ուժերը` ի դեմս ՀՀԿ-ի եւ ԲՀԿ-ի, մոռացան քաղաքական նոր որակների ու թափանցիկության մասին` փաստ է: Այդ են վկայում հետընտրական վերջին օրերի զարգացումները, որոնք ընթանում են բացառապես անդրկուլիսային մակարդակներում: Դրանց մասին հասարակությունը տեղեկանում է լավագույն դեպքում այս կամ այն լրատվամիջոցի «հավաստի աղբյուրներից» կամ էլ ստիպված լինում եզրակացություններ անել` հիմնվելով այս կամ այն քաղաքական գործչի «անձնական կարծիքի» վրա: «Թափանցիկ քաղաքականության ջատագովները» նախընտրում են իրենց բանակցություններն անցկացնել հույժ գաղտնի` գիշերային հանդիպումների ժամանակ: Հետաքրքիր է` ինչո՞ւ: Սեփական ժողովրդից ի՞նչ ունեն թաքցնելու հարգարժան «ազգընտիրները»: Եթե նրանց բանակցությունների առարկան իսկապես խարսխված է երկրի առջեւ ծառացած կարեւորագույն խնդիրների լուծման համար անհրաժեշտ գործակցության ուղիների փնտրտուքով, ապա ինչն է խանգարում դա անել բաց` հանրության աչքի առջեւ, այնպես, ինչպես, օրինակ` Հունաստանում, որի քաղաքական ուժերը, մի քանի օր տեւած հրապարակային բանակցություններից հետո ընդհանուր հայտարարի չգալով որոշեցին նոր ընտրություններ անցկացնել: Մեզանում, սակայն, բոլոր հարցերը լուծվում են «գիշերային հանդիպումների» ընթացքում, երբ հանրությունն, «այս կյանքից հոգնած», զբաղված է սերիալներ դիտելով` անտեղյակ, թե առավոտյան իրեն ինչպիսի փաստի առջեւ են կանգնեցնելու «աննախադեպ թափանցիկության» քարոզիչ իշխանությունները: Իսկ այս ամենի պատճառն այն է, որ առարկան, որի շուրջ բանակցում են քաղաքական ուժերը, ամենեւին էլ քաղաքական չէ, եւ ոչ էլ` առավել եւս, ազգային: Նրանք բանակցում են շատ կոնկրետ անձնական շահերի շուրջ, հետեւաբար` ինչ կարիք կա առանց այդ էլ հոգսերի տակ կքած ժողովրդին հիմա էլ «ծանրաբեռնել» ՀՀԿ-ԲՀԿ քաղաքական առեւտրի մանրամասներով, թող հանգիստ իրենց սերիալները դիտեն, մեկ է` նրանցից այլեւս ոչինչ կախված չէ: Ինչպես երեկվա հերթական գիշերային հանդիպումից` ՀՀԿ ԳՄ նիստից հետո ասաց ՀՀԿ նախագահ Սերժ Սարգսյանը. «Ի՞նչ կարիք կա շտապելու, հենց կոալիցիան լինի, միանգամից հայտարարելու ենք` հարցնեք, չհարցնեք»: Եվ իրոք, ի՞նչ կարիք կա հարցնելու, մեկ է` պատասխանելու են այն ժամանակ, երբ ցանկանան, եւ ի՞նչ կարիք կա շտապելու` մեկ է, համաձայնության են գալու այն ժամանակ, երբ կողմերից յուրաքանչյուրը կարողանա առավելագույնս բավարարել իր նեղ կլանային շահերը: Իսկ ժողովուրդն այլեւս խոսելու իրավունք չունի: Նա այդ իրավունքը ընդամենը մի քանի օր առաջ արդեն վաճառել է` 10 հազար դրամով:
.gif)
