ՀՅԴ-Ն ԱՆԱԶՆԻՎ ԳՈՐԾԸՆԿԵՐՆԵՐԻ ՀԵՏ ՉԻ ՀԱՄԱԳՈՐԾԱԿՑՈՒՄ

ԱԺ ՀՅԴ խմբակցության անդամ Արծվիկ Մինասյանը «Ժողովուրդ»-ի հետ զրույցում հայտարարեց, որ եռյակի վարած քաղաքականության արդյունքում այժմ անորոշ վիճակ է ստեղծվել: Խորհրդարանական ոչ իշխանական ուժի ներկայացուցիչը նշեց, որ իրենք եռյակից նեղացած չեն, պարզապես իրենց համար ընդունելի չէ այն գործելաոճը, որն այժմ որդեգրել է եռյակը:

-Պարո՛ն Մինասյան, Դուք հայտարարել էիք, որ առաջիկայում չեք բացառում իշխանությունների հետ բանակցությունները, սակայն այժմ կարծես թե ՀՅԴ-ն որեւէ գործունեություն չի ծավալում, համեստորեն լռում է: Ինչո՞ւ, ի՞նչն է Ձեզ ստիպում չխոսել: Ոչ իշխանական ուժերից «հեռացաք» ու դրանից հետո որեւէ կոնկրետ քայլով հանդես չեք գալիս:
-Ո՞վ է առաձնացել, իրենք են մեզանից հեռացել, մենք ասացինք, որ եթե չեք քննարկելու սահմանադրության փոփոխության անհրաժեշտությունը, մենք պատրաստ ենք մասնակցելու ձեր կողմից հրավիրվելիք հանրահավաքներին: Բայց իրենք որոշեցին, որ չէ, իսկ մենք էլ նշեցինք, որ հնարավոր չէ նույն հարթակում իրարամերժ տեսակետներ ունենալ: Ու մենք ճիշտ դուրս եկանք՝ հաշվի առնելով վերջին զարգացումները. այդ հանրահավքներում տարբեր տեսակետների ներկայացումը տեսաք, թե ինչի հանգեցրեց: Մյուս կողմից էլ մենք հետեւողական ենք մեր ասածներին ու փորձում ենք իրականացնել թե՛ սահմանադրական փոփոխությունների, թե՛ 12 կետերի մասով:
-Հիմա կոնկրետ Ձեր կողմից նշված հարցերի շուրջ ՀՅԴ-ն իշխանությունների հետ բանակցո՞ւմ է:
-Ո՛չ, մենք սպասում ենք հայտարարված քաղաքական կոնսուլտացիաների շրջափուլին` սահմանադրական փոփոխությունների հայեցակարգով, որպեսզի առաջարկությունները ներկայացնենք: Իսկ ինչ վերաբերում է 12 կետերին, ապա մենք կետ առ կետ գրեթե բոլոր ուղղություններով պատկերացնում ենք աշխատանքի ծավալը եւ համագործակցության հնարավորությունը իշխանությունների հետ:
-Սերժ Սարգսյանն արդեն ՀՀ Կառավարությանը հանձնարարել է նորից ուսումնասիրել ոչ իշխանական ուժերի ներկայացրած 12 կետանոց պահանջագիրը: Եթե այս անգամ Կառավարությունը կատարի այդ պահանջները, ի՞նչ է լինելու այդ դեպքում, կոալիցիա՞ եք ստեղծելու:
-Մեզ համար շատ պարզ է. մեր թիվ մեկ օրակարգային հարցերից է սահմանադրության փոփոխությունը: Դա մեծածավալ, դժվարին աշխատանք է, եթե մեր տեսակետներն ամբողջությամբ ընդունվում են իշխանությունների կողմից, մենք նաեւ աշխատելու ենք, որպեսզի այդ փոփոխություններն ընկալելի դառնան հանրության համար, եւ անցնեն սահմանադրական փոփոխությունները: Քանի որ այդ ժամանակ մենք կարող ենք արձանագրել, որ քաղաքական ռեֆորմի արդյունքում այդ փոփոխությունների միջոցով ապահովելու ենք ամբողջական, համակարգային իշխանափոխություն: Սա մեր մոտեցումն է, մեր համոզմունքն է, ու վստահ եմ, որ պետք է շատերը միանան այս ճանապարհին, մենք այդ դեպքում ավելի շուտ արդյունքները կարձանագրենք: Մնացածը, թե մեր հարգարժան եռյակի գործընկերներն ինչ են մտածում, այս պահին մեզ այդքան էլ չի հուզում, որովհետեւ մենք հրապարակավ եւ նաեւ իրենց հետ մեկ առ մեկ այդ գործողությունները ներկայացրել ենք:
-Բայց կարծես թե եռյակն իր գործելաոճը փոխել է, ընդամենը երկու հանրահավք է արել ու այլեւս որոշել է այլ քաղաքականություն որդեգրել: Գուցե ՀՅԴ-ն միանա՞ եռյակին:
-Մեզ համար ընդունելի չէ այն գործելաոճը, որը որդեգրվել է… անազնիվ գտնվել գործընկերոջ հանդեպ, հայտարարել, որ մենք միասին ամփոփելու ենք 12 կետերը, հետո հրաժարվել ու ներկայացնել առանձին, դրանք մեզ համար ընդունելի տարբերակներ չեն:
-Այսինքն՝ նեղացա՞ծ եք եռյակից:
-Չէ՛, նեղացած չենք: Մենք՝ իբրեւ ինքնուրույն քաղաքական ուժ, տեսնում ենք երկրում ռեֆորմներ իրականացնելու իրական մեխանիզմները: Այդ տեսակետից մեզ համար գլխավոր խնդիրը նաեւ այն է, որ հանրությունը, որը պահանջներ է առաջադրում, փոփոխությունների խնդիր է բարձրացնում, հանկարծ չհիասթափվի, ու ավելորդ լարվածություն չստեղծվի մի գործընթացի մեջ, որի արդյունքը ոչինչ է:
-Ըստ Ձեզ` ժողովուրդն արդեն հասցրե՞լ է հիասթափվել եռյակից:
-Ես չեմ ուզում գնահատել որպես հիասթափություն, բայց ակնհայտորեն անորոշությունը կա, եւ այդ անորոշության որոշակիացման պատասխանատուն վստահաբար մենք չենք, դա եռյակն է, եւ իրենց առանձին ուժերն են:
-Բայց Դուք էլ մի կողմ եք «քաշվել»…
-Մենք մի կողմ չենք քաշվել, մենք մեր գիծն ունենք, մեր ուղղությունն ունենք, դա թվում է Ձեզ: ԱԺ-ի օրակարգում գտնվող բոլոր հարցերի մասով մենք ունենք մեր տեսակետը: Եթե Ձեզ հետաքրքրում է, թե մենք աշխատասենյակներում կհանդիպենք եռյակի անդամ ուժերի հետ, ապա ասեմ, որ ո՛չ, չենք հանդիպում, նման ձեւաչափ այժմ չի գործում, բայց մենք չենք էլ բացառել, որ եթե կան հարցեր, ու մենք ունենք կոնսեսուս այդ հարցերի շուրջ, կարող ենք համագործակցել ու ոչ միայն եռյակի հետ:

Զրուցեց ՍՈՆԱ ԳՐԻԳՈՐՅԱՆԸ

ԱԿՆՀԱՅՏ Է` ՀԱԿԱՍԱՀՄԱՆԱԴՐԱԿԱՆ ՉԵՆ ՃԱՆԱՉԻ

Այսօր` նոյեմբերի 14-ին, ՀՀ Սահմանադրական դատարանը կքննի 2014 թվականի հոկտեմբերի 10-ին Մինսկում ստորագրված Հայաստանի Հանրապետության` «Եվրասիական տնտեսական միության մասին» պայմանագրի՝ Հայաստանի սահմանադրությանը համապատասխանության հարցը: Տեղեկացնենք, որ «Իրազեկ քաղաքացիներ»-ի միավորումը դիմել է ՍԴ նախագահ Գագիկ Հարությունյանին՝ պահանջելով պայմանագիրը քննել բանավոր կերպով, մինչդեռ արդեն հաստատված է, որ այն քննվելու է գրավոր ընթացակարգով: ՍԴ որոշումը հայտնի կլինի միայն վերջնական եզրակացության հրապարակումից հետո:

«Ժողովուրդ»-ի հետ զրույցում ԱԺ ԲՀԿ-ական պատգամավոր Միքայել Մելքումյանը, ՀՀԿ-ական Կարինե Աճեմյանը եւ «Ժառանգություն» խմբակցության ղեկավար Ռուբիկ Հակոբյանը համոզմունք հայտնեցին, որ վերոնշյալ պայմանագրի սահմանադրականությունը հաստատվելու է:

ԱԺ ԲՀԿ խմբակցության պատգամավոր Միքայել Մելքումյան
-Պարո՛ն Մելքումյան, Ձեր կարծիքով ՍԴ-ն ի՞նչ գնահատական կտա «Եվրասիական տնտեսական միության մասին» պայմանագրին, արդյո՞ք այն կհամարվի ՀՀ սահմանադրությանը չհակասող:
-Ինձ թվում է՝ դրական ընթացք է ունենալու, այսինքն` պայմանագրի սահմանադրականությունը, այնուամենայնիվ, կհաստատվի, եւ դրական ընթացքով կլուծվի այդ հարցը:

ԱԺ ՀՀԿ խմբակցության պատգամավոր Կարինե Աճեմյան
-Տիկի՛ն Աճեմյան, Ձեր կարծիքով ՍԴ-ն ԵՏՄ-ին` Հայաստանի անդամակցության պայմանագիրը ՀՀ սահմանադրությանը համապատասխան կհամարի՞:
-Քանի որ Սահմանադրական դատարանն իրավական կառույց է եւ տիրապետում է Եվրասիական տնտեսական միության պայմանագրի նրբություններին, կարծում եմ, որ դրական լուծում կտրվի: Մենք ասել ենք՝ այո, եւ շարունակելու ենք մնալ մեր կարծիքին: Այսինքն՝ կողմ ենք արտահայտվել այդ միությանն անդամակցելու հարցին:

ԱԺ «Ժառանգություն» խմբակցության ղեկավար Ռուբիկ Հակոբյան
-Պարո՛ն Հակոբյան, հնարավոր համարո՞ւմ եք այն տարբերակը, որ Սահմանադրական դատարանը ԵՏՄ-ին անդամակցելու մասին պայմանագիրը որակի հակասահմանադրական:
-Ես կարծում եմ, որ Սահմանադրական դատարանը դրական եզրակացություն է տալու այդ հարցին: Իսկ արդեն Ազգային ժողովում նոյեմբերի 17-ին պարզ կլինի, թե ի՞նչ է սպասվում: Կարծում եմ՝ որեւէ մեկի համար գաղտնիք չէ, թե այս ամենն ինչ ընթացք է ունենալու:
Հ. Գ. Զարուհի Փոստանջյանը «Ժառանգության» անունից հայտարարել է, որ խմբակցությունը դեմ է քվեարկելու պայմանագրին: Ընդդիմադիր պատգամավորը պայմանագիրը որակել է ստորացուցիչ:

Զրուցեց ԼՈՒՍԻՆԵ ՀԱԿՈԲՅԱՆԸ

 
ԼՈՒՐԵՐ

ԲԱՑ ԴՌՆԵՐԻ ՕՐ
ԲՀԿ առաջնորդ Գագիկ Ծառուկյանը վերջին շրջանում հանդիպումներ է ունենում արտախորհրդարանական ուժերի հետ: Երեկ էլ կուսակցության առաջնորդը հանդիպում է ունեցել «Առաքելություն» կուսակցության ներկայացուցիչների հետ: Գագիկ Ծառուկյանի մամուլի խոսնակ Իվետա Տոնոյանը «ժողովուրդ»-ի հետ զրույցում նշեց, որ նման հանդիպումներն շարունակական բնույթ են կրում: «Գագիկ Ծառուկյանի հանդիպումները պայմանավորված են այդ կուսակցությունների ցանկությամբ, նրանք նաեւ իրենց ելույթներում են ցանկություն հայտնում մասնակցել համաժողովրդական շարժմանը, իսկ Գագիկ Ծառուկյանը մշտապես իր հերթին հայտարարել է՝ դռները բաց են բոլորի համար, նրանց համար, ովքեր կիսում են եռյակի կարծիքները, դիրքորոշումները եւ տեսակետները»,- նշեց խոսնակը:

ԴԱՍՏԻԱՐԱԿՉԱԿԱՆ
Երեկ Ազգային ժողովի նիստի ավարտից հետո ԱԺ ՀՀԿ խմբակցության անդամ Սամվել Ֆարմանյանը եւ ԱԺ ՀԱԿ խմբակցության ղեկավար Լեւոն Զուրաբյանը վիճաբանել են, որն անգամ վերածվել է ծեծկռտուքի: Պատգամավորների վեճը ծագել է Ֆարմանյանի հայտարարությունից հետո, երբ վերջինս ասել է, թե ԲՀԿ-ն իր ընտրատարածքում ԱԺ ընտրությունների ժամանակ փող է բաժանել հօգուտ ՀԱԿ-ի: Ս. Ֆարմանյանի հայտարարությունը վրդովեցրել է Լ. Զուրաբյանին, որը նաեւ ԱԺ միջանցքում է հաշիվ պահանջել Ֆարմանյանից: Ավելի ուշ Սամվել Ֆարմանյանը «Հրապարակ»-ին ասել է. «Նիստի ավարտից հետո ընտրակարգի փոփոխության վերաբերյալ օրենքի նախագծի քննարկումները շարունակվեցին նիստերի դահլիճին հարակից սրահում եւ նախագծի հիմնական հեղինակ պարոն Ռուբեն Հակոբյանի հետ, ինչպես միշտ, բարեկամաբար զրուցում էինք՝ բերելով յուրաքանչյուրս մեր փաստարկները: Պարոն Զուրաբյանը «մեջ ընկավ»՝ օգտագործելով բառապաշար, որով հավանաբար իր հետ շփվում են իրենց տանը, ինչին ի պատասխան, այո, դաստիարակիչ ապտակ եմ տվել»: Քաշքշուկին խառնվել են պատգամավորները եւ հանդարտեցրել գործընկերներին:

ԽԱՆԴԻ ԳԾՈՎ
Քաղաքական դաշտում լուրեր են պտտվում, թե ԱԺ ՀԱԿ խմբակցությունում քաղաքական «խանդի» տեսարաններ են եղել այն պատճառով, որ ԲՀԿ առաջնորդ Գագիկ Ծառուկյանն օրերս առանձին հանդիպում է ունեցել իրենց խմբակցության անդամ, Վերակազմյալ ՍԴՀԿ ղեկավար Լյուդմիլա Սարգսյանի հետ: ՀԱԿ-ի վերնախավը չի կարողանում հասկանալ, թե ինչու է այժմ ԲՀԿ առաջնորդը որոշել առանձին հանդիպումներ ունենալ կուսակցության առաջնորդների ու հատկապես իրենց խմբակցության ներկայացուցչի հետ: ՀԱԿ խմբակցության ներկայացուցիչները մտածում են, որ ԲՀԿ առաջնորդ Գագիկ Ծառուկյանի այս քայլը նպատակ ունի իրենցից «պոկելու» իրենց համակիր կուսակցության ղեկավարին: Իսկապե՞ս ՀԱԿ-ը մտավախություն ունի այդ հանդիպումների առիթով: «Ժողովուրդ»-ի այս հարցին ԱԺ ՀԱԿ խմբակցության քարտուղար Արամ Մանուկյանը կարճ պատասխանեց. «Մենք Գ. Ծառուկյանի նման հանդիպումներին նորմալ ենք վերաբերում»: