«Բարգավաճ Հայաստան» կուսակցության անդամ, Ազգային Ժողովի նախկին պատգամավոր Վարդան Բոստանջյանը «Ժողովուրդ»-ի հետ զրույցում ասաց, որ ինքն ի սկզբանե դրական է վերաբերել ԲՀԿ առաջնորդ Գագիկ Ծառուկյանի՝ կոալիցիա չկազմելու հայտարարությանը: Անդրադառնալով ԲՀԿ-ի ընդդիմադիր կեցվածքին` Բոստանջյանը նշեց. «Ուղղակի ընդդիմադիրն ավելի կատեգորիկ է ասված, այս դեպքում ավելի լավ է ասել` կառուցողական»:
-Դուք այլեւս Ազգային Ժողովի պատգամավոր չեք, քանի որ Ձեզ չընդգրկեցին ԲՀԿ-ի համամասնական ցուցակում: Օրենսդիր դաշտից ո՞ւր եք տեղափոխվելու, Ձեզ որտե՞ղ ենք այսուհետ տեսնելու:
-Դե ես ընկել եմ փողոցները, աշխատանք եմ ման գալիս, բայց չեմ կարողանում գտնեմ, շատ վատ վիճակում եմ գտնվում, շատ դժբախտ (ծիծաղում է-Ս.Գ.): Ես դոկտոր պրոֆեսոր եմ, Հայաստանի 4 համալսարանների դոկտոր եմ, այդ թվում նաեւ Երեւանի պետական համալսարանի: Դա ոչ թե նոր է եղել, ես իմ պատգամավորական ամբողջ ընթացքում եղել եմ… Այնպես որ ուզում եմ ասել, որ զբաղմունք անհրաժեշտից ավելի շատ ունեմ: Իսկ մնացածն էլ ամաչում եմ գլուխ գովամ: Ինձ համալսարաններում մա՛ն եկեք:
-Իսկ չե՞ք ափսոսում, որ այլեւս Ազգային Ժողովում չեք լինելու:
-Այդպես է ստացվել, ես ի՞նչ կարող եմ ասել, երեւի բարին դա է:
-Հնարավո՞ր է` Ձեզ ապագայում տեսնենք գործադիր դաշտում:
-Իսկ Դուք որտե՞ղ եք ինձ ուզում տեսնել, ասե՛ք, լսեմ ուրախանամ:
-Ըստ մեր տեղեկությունների` Ձեր քավորը` ԱԺ նախկին պատգամավոր Վիկտոր Դալլաքյանը, կնշանակվի ՀՀ սպորտի նախարարի պաշտոնում: Խոսակցություններ կան, որ նա մտադիր է Ձեզ իրեն տեղակալ տանել:
-Ես տեղյակ չեմ այդ ամեն ինչից, բայց ես գիտեմ, որ պուճուր ժամանակ ուժեղ սպորտսմեն եմ եղել, չնայած բավականաչափ տարիք ունեմ, բայց էլի կարող եմ մասնակցել օլիմպիական խաղերին (ծիծաղում է-Ս.Գ.): Դե խոսակցություններ են, էլի:
-Պարո՛ն Բոստանջյան, ԲՀԿ առաջնորդ Գագիկ Ծառուկյանը հայտարարեց, որ իրենք նպատակահարմար չեն համարում կոալիցիա կազմել, Դուք՝ որպես ԲՀԿ անդամ, համամի՞տ եք Ձեր առաջնորդի հետ:
-Ես ասել եմ ու կասեմ, որ կոալիցիան երբեք ինքնանպատակ չի եղել, դա կառավարման կարեւոր միջոց էր եւ քաղաքական ավելի դոմինանտ ուժ, որը հասարակության մեջ ընդունված էր: Կոալիցիոն կառավարման սկզբունքը նոր հայտնագործություն չէ եւ ակնհայտորեն համաշխարհային պրակտիկայում իր տեղն ու դերն ունի: Ես այդ մասին միայն մտածել եմ դրական կտրվածքով: Իսկ եթե հիմա ստացվել է այսպես, ուրեմն դա էր ճիշտը, եւ չեմ ցանկանում որեւէ բան մեկնաբանել:
-Իսկ ինչպե՞ս եք պատկերացնում ԲՀԿ-ի աշխատանքը այդ ֆորմատով:
-Բոլոր դեպքերում Դուք հասկանում եք, որ բավականաչափ ժամանակ է, ինչ գտնվում եմ այդ քննարկումներից հեռու… Բայց պարզ չէ՞, որ որպես ԲՀԿ-ական` ես հարգում եմ ԲՀԿ առաջնորդի որոշումը:
-Այդ դեպքում ինչպե՞ս եք պատկերացնում Ձեր հարազատ կուսակցությանն ընդդիմադիր դաշտում:
-Ես կարող եմ ասել, որ ես հարգում եմ ԲՀԿ-ի որոշումը: Ուղղակի ընդդիմադիրն ավելի կատեգորիկ է ասված, այս դեպքում ավելի լավ է ասել կառուցողական: Կառուցողական մոտեցումն այն է, որ ինչ-որ հարցի շուրջ քննարկումների արդյունքում որոնվում եւ գտնվում է ավելի արդյունավետն ու ավելի ճիշտը:
-Չե՞ք կարծում, որ Գագիկ Ծառուկյանի այս որոշումը «թանկ» է նստելու ԲՀԿ-ականների վրա, պարզ օրինակն այն է, որ ԲՀԿ նախարարները զրկվելու են իրենց պորտֆելներից:
-Ուրեմն եթե Դուք կարծում եք, թե պարտավորությունները պայմանավորված են պորտֆելներով, ապա ես չեմ ցանկանում Ձեզ հետ համաձայնել: Զարգացման համար ի՞նչ կարեւոր է, թե ինչ պորտֆել կա կամ չկա:
-«Բարգավաճ Հայաստան» կուսակցության՝ ԱԺ անցած պատգամավորների ցուցակին ծանո՞թ եք: Ըստ Ձեզ՝ ինչպիսի՞ն է ԲՀԿ նոր խմբակցությունը:
-Այդ հարցին ես չեմ պատասխանի, այդ հարցն ինձ մի՛ տվեք, խնդրում եմ: Ի՞նչ եք ուզում, որ ես ասեմ… Այդ հարցն ավելի միամիտների՛ն տվեք, որոնք կարող են առանց մտածելու պատասխանել:
.gif)
