ՊԱՏԳԱՄԱՎՈՐՆԵՐԸ ՔԵՍԱԲ ԵՆ ՄԵԿՆԵԼ ԻՐԵՆՑ ՆԱԽԱՁԵՌՆՈՒԹՅԱՄԲ

Նախօրեին Ազգային ժողովը պաշտոնապես տեղեկություն տարածեց, որ մարտի 24-ի երեկոյան ԱԺ ՀՀԿ խմբակցության պատգամավորներ Սամվել Ֆարմանյանը, Նաիրա Կարապետյանը, Լեւոն Մարտիրոսյանը, Արման Սահակյանը, «Ժառանգություն» խմբակցության քարտուղար Թեւան Պողոսյանն ու անկախ պատգամավոր Էդմոն Մարուքյանը մեկնել են Սիրիա՝ տեղում ծանոթանալու Քեսաբ քաղաքում եւ հարակից բնակավայրերում ծավալվող վերջին իրադարձություններին: Վերադառնալուց հետո նրանք Ազգային ժողովին կներկայացնեն իրավիճակը:
Այս տեղեկությունը ԱԺ մյուս խմբակցությունների համար անակնկալ էր, քանի որ վերջիններս տեղյակ չէին, որ ԱԺ պատգամավորների պատվիրակությունը Քեսաբ է մեկնելու: Աժ ՀՅԴ եւ ԲՀԿ խմբակցության ներկայացուցիչները հայտարարեցին, թե անհասկանալի է, որ իրենցից «թաքուն» է պահվել նման լուրջ իրադարձությունը եւ տարակուսելի է, թե ինչու է նման կազմով պատվիրակությունը ձեւավորվել, երբ կարելի էր ԱԺ բոլոր խմբակցություններից գոնե մեկ ներկայացուցիչ ուղարկել Քեսաբ: Առավել եւս, որ անտեսվել է նաեւ ՀՅԴ խմբակցությունը, որը Սիրիայում բավականին մեծ կառույց ունի եւ որի ներկայացուցիչները սիրիահայերին օգնելու համար կազմակերպել էին «Օգնիր եղբորդ» լայնածավալ նախաձեռնությունը: Երեկ այս հարցերի պատասխանը «Ժողովուրդ»-ը փորձեց պարզել ԱԺ ՀՀԿ խմբակցության ղեկավար Գալուստ Սահակյանից:
-Պարոն Սահակյան, ինչո՞ւ եք գաղտնի, առանց Աժ մյուս խմբակցություններին տեղեկացնելու պատվիրակություն ուղարկել Սիրիա: Պատգամավորների մեծ մասն անակնկալի է եկել Ձեր քայլից:
-Դա պատվիրակություն չէ, սեփական նախաձեռնություն է, պատգամավորները դիմել են Ազգային ժողովի նախագահին, իսկ Աժ նախագահն էլ աջակցել է: Սա նշանակում է, որ ԱԺ նիստերից բացակայությունը կհամարվի հարգելի:
-Այսինքն՝ երիտասարդ պատգամավորնե՞րն են նախաձեռնել, այլ ոչ թե Ձեր խմբակցությունն է պատգամավորներին գործուղել Սիրիա:
-Այո, անձնական նախաձեռնություն է եղել, եւ կարծում եմ՝ այն գնահատելի նախաձեռնություն է: Պատգամավորները գործուղված չեն, եթե դա լիներ ԱԺ խնդիր, կարծում եմ, որ ավելի ներկայացուցչական պատվիրակություն կգնար: Դա իրենց նախաձեռնությունն է:
-Դուք, որպես ՀՀԿ խմբակցության ղեկավար, տեղյա՞կ եք, թե պատգամավորներն այնտեղ ինչ պետք է անեն, խմբակցությունում քննարկվե՞լ է Քեսաբում նրանց անելիքների հարցը:
-Միակ դեպքն է, որ քննարկման խնդիր չի եղել: Այն, ինչը վերաբերվում է հայ ժողովրդին, բոլորը կկարողանան իրենց նախաձեռնությամբ հանդես գալ:
-Բայց տեղյա՞կ եք, թե, ի վերջո, պատգամավորներն այնտեղ ինչ են անելու, ինչ են արել, որն է նրանց առաքելությունը:
-Ինֆորմացիա չունենք:
-Իսկ ի՞նչ ակնկալիքներ ունեք երիտասարդ պատգամավորներից, Ձեր կարծիքով՝ նրանք կկարողանա՞ն որեւէ օգտակար գործ անել այնտեղ:
-Իմ կարծիքով՝ ճշգրիտ ինֆորմացիա կունենանք այն դեպքում, երբ պատգամավորները կվերադառնան Հայաստան: Լրահոսով տարբեր ինֆորմացիաներ ենք ստանում, որոնք ճշգրտվում են, հետո այդ նույն ինֆորմացիաները մերժվում են: Կարծում եմ` պրոբլեմն այնտեղ ավելի բարդ է, քան մենք այստեղ դիտարկում ենք:
-Իսկ եթե պրոբլեմը լուրջ է, հնարավո՞ր է իշխանություններն առանձին պատվիրակություն ուղարկեն Քեսաբ, ինչպես Դուք արդեն նշեցիք` ավելի ներկայացուցչական կազմով:
-Նախ ասեմ, որ դիվանագիտական բոլոր խողովակներով խնդիրն իշխանությունների տեսադաշտում է, ամեն ինչ արվելու է: Իսկ եթե խնդիր կառաջանա, որ այդպիսի պատվիրակություն պետք է ուղարկվի, ապա դա էլ կարվի: Պատվիրակություն ուղարկելը, պետք է կոնկրետ խնդիր ունենա, մոտեցումներ պետք է ունենա: Եթե այդպիսի խնդիր լինի, բնական է, որ ոչ միայն ԱԺ պատգամավորներից պատվիրակություն կգնա, այլ նաեւ շատ այլ պատվիրակություններ կգնան, եթե, իհարկե, զգանք, որ ոչ միայն ինֆորմացիոն խնդիր ենք լուծելու, այլ նաեւ կոնկրետ հարցեր: Պետք է նախ տեղեկանանք` ինչ է կատարվել եւ ինչով կկարողանանք օգնել: Կարծում եմ՝ ստացված ինֆորմացիայից ավելի լուրջ խնդիրներ կան, քանի որ մարդիկ տեղահանվել են ու պետք է տեսնենք՝ ինչու, ինչպիսին է վիճակը, որեւէ հույսեր կա՞ն, որ այդ տարածքների վերադարձ կլինի: Արդեն տեղեկացել ենք, որ իբր թե սիրիական բանակի ստորաբաժանումներն այնտեղ են, բայց այնտեղի բնակիչները, մեր հայրենակիցները կարծեք թե այլ ինֆորմացիա են տարածում: Կարծում եմ՝ թեկուզ սեփական նախաձեռնությամբ, մենք որոշ ժամանակ հետո իրավիճակի մասին հստակ ինֆորմացիա կստանանք եւ կկողմնորոշվենք:
-Պարոն Սահակյան, երբ Դուք ելույթ էիք ունենում, ԲՀԿ խմբակցությունը ցուցադրաբար դուրս եկավ ԱԺ դահլիճից: Դուք ինչպե՞ս եք վերաբերվում ԲՀԿ-ականների նման պահվածքին:
-Կարծում եմ՝ իրենք պետք է վատ զգան, ու կարծում եմ, որ իմ խոսքերն, ըստ էության, ավելի շատ այլ մարդկանց էին հասցեագրված, քան իրենց: Ես ողջունում եմ, որ իմ ելույթի ժամանակ հարգում եւ ոտքի են կանգնում:

 
ԱՐԱՄ ՀԱՐՈՒԹՅՈՒՆՅԱՆԸ ՉԻ ԶՂՋՈՒՄ ԻՐ ԱՐԱԾԻ ՀԱՄԱՐ

Նախօրեին ՀՀ բնապահպանության նախարար Արամ Հարությունյանը`Բուլկի Արամը, հանքարդյունաբերության վերաբերյալ կառավարության կազմակերպած միջազգային գիտաժողովի ժամանակ վիրավորել է մի ակտիվիստի ու սպառնացել «կտրել ականջները»:

Նշենք, որ մի խումբ բնապահպաններ ցուցանակներով մտել էին դահլիճ եւ ընդհատել միջոցառումը՝ իրենց բողոքն արտահայտելով հանքարդյունաբերության ոլորտում տիրող աղետալի վիճակի վերաբերյալ: Նրանք նույնիսկ նախարարներին առաջարկել էին խմել իրենց հետ բերած պղտոր գետաջուրը, որն աղտոտվել է հանքերի վայրի շահագործման հետեւանքով: Եվ ահա` բնապահպանության նախարար Արամ Հարությունյանը վրդովվել է այդ ամենից ու դիմելով ակտիվիստին` ասել. «Չափդ ճանաչի, այ տղա… ականջներդ կպոկեմ, կտամ ձեռդ, լակոտ»: «Ժողովուրդ»-ը փորձեց նախ՝ Ա. Հարությունյանից պարզել, արդյոք իր պահվածքը հարիր է նախարարին, ապա նույն հարցով դիմեց կառավարության մի քանի այլ` ոչ պակաս «բարեկիրթ» անդամների:
-Պարոն Հարությունյան, ինչո՞ւ վիրավորեցիք ակտիվիստներին, որոնք ընդամենն իրենց մտահոգություններն էին բարձրաձայնում:
-Ձեր հարցին չեմ պատասխանում, որովհետեւ կողմնակալ եք հարցերը մեկնաբանում:
-Ինչո՞ւ սպառնացիք ակտիվիստի «ականջները պոկել», դա նախարարին հարի՞ր պահվածք էր:
-Ես էլ երիտասարդ եմ եղել… (արագ քայլերով հեռանում է-Ս.Գ.):

ՀՀ արդարադատության նախարար Հրայր Թովմասյան
-Պարոն Թովմասյան, ինչպիսի՞ն է Ձեր գնահատականը Արամ Հարությունյանի պահվածքին, երբ Ձեր գործընկերը սպառնաց բնապահպան ակտիվիստի «ականջները պոկել»:
-Ես տեղյակ չեմ: Կարծում եք, որ ես պարապ եմ ու ամբողջ օրը տեսանյութեր եմ նայում: Իսկ ես ուրիշի ասածներով ոչ մի բան չեմ մեկնաբանում:
ՀՀ կառավարության աշխատակազմի ղեկավար-նախարար Վաչե Գաբրիելյան
-Պարոն Գաբրիելյան, ՀՀ բնապահպանության նախարարը ակտիվիստին սպառնացել է կտրել նրա ականջները, Դուք ինչպե՞ս եք վերաբերվում նախարարի նման պահվածքին:
-Կարծում եմ` պետք չի հրահրել ո՛չ նախարարին, եւ ո՛չ էլ մյուս մարդուն, որ տրվի այդպիսի պատասխան: Պատասխանը, բնականաբար, ցանկալի չէր, բայց կարծում եմ՝ նաեւ կար ակտիվ հրահրում եւ դա եւս դատապարտելի է:
-Բայց նախարարին ընդամենը ներկայացնում էին, թե իրականում ինչպիսի հետեւանքներ է ունենում հանքերի նման վայրի շահագործումը` դա ցույց տալով ջրի աղտոտվածությամբ:
-Ես ցանկանում եմ, որ նույն ոճով Ձեզ եւս առաջարկեն ջուր խմել:
Հ.Գ. Երեկ Արամ Հարությունյանը լրագրողների հետ զրույցում հայտարարել է, թե իր գործողությունները համարժեք են եղել իրավիճակին:

Նյութերը` ՍՈՆԱ ԳՐԻԳՈՐՅԱՆԻ

 
ԼՈՒՐԵՐ

ՆԱԽԱՐԱՐԻ ՍՈՒՏԸ

Մինչ ՀՀ առողջապահության նախարար Դերենիկ Դումանյանը եւ Երեւանի քաղաքապետ Տարոն Մարգարյանը իրենց են գովազդում, թե կանանց միամսյակի կապակցությամբ Երեւանի առաջատար կլինիկաներում հայտարարվել է բաց դռների օր, հուսահատ կանայք այլ իրականության են բախվում: «Ժողովուրդ»-ի խմբագրություն այցելած Մարգարիտա Եղիազարյանը հայտնեց, որ միամսյակի հայտարարությունից ոգեւորված ուղեգիրը ձեռքին դիմել է Հայ-ամերիկյան բժշկական կենտրոն, սակայն իրեն ասել են, թե «կապ չունի՝ միամսյակի շրջանակներում բաց դռների օրեր են, պետք է 20.000 դրամ վճարեք»:
«Ժողովուրդ»-ի հետ զրույցում Հայ- ամերիկյան բժշկական կենտրոնի գործադիր տնօրեն Խաչանուշ Հակոբյանն ասաց, թե իրենք շատ մեծ ցանկություն ունեն օգնել մարդկանց, սակայն չեն կարող. «Մեր կենտրոնը պետության կողմից չի ֆինանսավորվում, եթե ֆինանսավորվեինք եւ պետպատվեր տրամադրվեր, ապա առանց խնդրի ես կօգնեի մարդկանց, բայց ի վիճակի չենք դա անել: Եթե ես բոլորին օգնեմ, իսկ ով իմ լույսի, գազի, աշխատակիցների աշխատավարձերի հարցը կլուծի»:

ՁԵՌՆՊԱՀ  ԿՔՎԵԱՐԿԵՆՔ

ՀՀ ԱԳՆ խոսնակի փոխանցմամբ` Հայաստանը ձեռնպահ է քվեարկելու այսօր ՄԱԿ-ի Գլխավոր ասամբլեայում Ուկրաինայի ներկայացրած բանաձեւի նախագծին, որով անվավեր է ճանաչվում Ղրիմում տեղի ունեցած հանրաքվեն:

ՍԴՀԿ-Ի  ՍՊԱՌՆԱԼԻՔԸ

«Ժողովուրդ»-ը փորձեց ԱԺ ՀԱԿ խմբակցության անդամ Լյուդմիլա Սարգսյանից պարզել, թե իրենց ինչպես է հաջողվել գրանցել Վերակազմյալ սոցիալ-դեմոկրատական հնչակյան կուսակցություն: Նշենք, որ ՀՀ ԱՆ պետռեգիստրը պատճառաբանում էր, թե փաստաթղթերում թերություններ կան եւ հրաժարվում էր գրանցել ՎՍԴՀԿ-ն:
«Ես տեղյակ եմ, որ մեզանից բաժանված հատվածը, որն այսօր իրեն կոչում է ՍԴՀԿ, մեծ ջանքեր է գործադրել, որպեսզի խափանի մեր գրանցման գործընթացը, շատ լավ հասկանալով, որ մեր գոյությունը սպառնալիք է իրենց գոյության համար: Ի վերջո, միայն անունով չէ, որ կուսակցություն են դառնում, դառնում են նաեւ իրենց գործունեությամբ, բայց դա նրանց չհաջողվեց: Իրենց այդ ջանքերը չհաջողվեց, քանի որ ամենասրիկա իշխանությունը, երբ սրիկայություն է անում, ինքն իր մեղքը քիչ թե շատ զգում է ու մեղքի տակ ընկնելը հեշտ չէ: Դրա համար էլ նման բան չարեցին»,-նշեց պատգամավորը: