Երեք նախագահների հեռանալու դեպքում միայն Հայաստանը կզարգանա. Սասուն Միքայելյան (տեսանյութ)

Սասուն ջոկատի հրամանատար, «Քաղաքացիական պայմանագիր» միավորման կառավարման խորհրդի անդամ Սասուն Միքայելյանն այսօր լրագրողների հետ հանդիպմանը նշեց, որ եթե ԲՀԿ առաջնորդ Գագիկ Ծառուկյանը գնա իշխանափոխության, ինքը ևս կմիանա:

Իր դիրքորոշումը Ս. Միքայելյանը պայմանավորեց զուտ գործող իշխանություններից ազատվելու հրամայականով:

Դրա հետ միասին, Սասուն ջոկատի հրամանատարը կարծիք հայտնեց, որ Եռյակի ուժերից «Բարգավաճ Հայաստանը» և Հայ ազգային կոնգրեսը, կողմ արտահայտվելով Եվրասիական տնտեսական միությանը Հայաստանի անդամակցությանը, ընդամենը Մոսկվայի «թագ» ստանալու խնդիր են ուզում լուծել:

«Իրենց արդեն չի հետաքրքրում` ուր է Հայաստանը գնում: Նրանք ուզում են թագաժառանգ դառնալ, էն որ ասում է` «корона российской империи», ո՞ւմ գլխին կդնեն ռուսական թագը, կմնա՞ Սերժ Սարգսյանի գլխին, թե՞ նրանցից որևէ մեկը կվերցնի: Ես տարբերություն չեմ տեսնում, որովհետև ես անկախության համար պայքարող մարտիկ եմ եղել, քաղաքացի, քաղբանտարկյալ, և այսօր ես մեծ վտանգ եմ տեսնում, որ մենք բռնել ենք այս ճանապարհը»,- նշեց հայտնի ազատամարտիկը:

Սասուն Միքայելյանի խոսքով, նշված ուժերը գնում են ոչ թե իշխանափոխության, այլ իշխանափոխանցման.«Դուք ԱԺ քննարկումների ժամանակ տեսաք, որ իրենք կողմ էին ԵՏՄ մտնելու նախագծին, այսինքն` իրենք բոլորը ղեկավարվում են Ռուսաստանի կողմից: Ես ասել եմ` այս երեք նախագահները պետք է հեռանան: Եթե այս երեք նախագահները չհեռանան, այս երկիրը զարգացում չի ունենա: Քոչարյանը միշտ էլ կապ է ունեցել ու կունենա, և ես երբեք չեմ հավատացել, որ Ռոբերտ Քոչարյանն ու Սերժ Սարգսյանը տարբեր մարդիկ են»:

Նրա խոսքով, եթե Գագիկ Ծառուկյանի դեպքում գոնե իշխանափոխություն կլինի.«Այսօր այնպիսի իրավիճակ է, որ չարյաց փոքրագույնը պիտի ընտրես»:

Լրագրողի հարցին` ուրեմն կմիանա՞ք Եռյակին, Ս. Միքայելյանը պատասխանեց.«Եռյակն ո՞վ է: Հլը Եռյակը թող իրար կողքի կանգնի, նոր: Մեզ միշտ քննադատում, ասում են` ինչի՞ չեք գալիս: Գանք` ի՞նչ անենք: Մենք` ի դեմս «Քաղաքացիական պայմանագրի», ասում ենք` եթե դուք պահանջում եք Սերժ Սարգսյանի հրաժարականը, մենք միանալու ենք»:

Տեսանյութը` A1plus.am-ի