«ԵՍ ՈՒԶՈՒՄ ԵՄ ԼԱՎ ԱՊՐԵԼ»

Ամիսներ առաջ «Ժողովուրդ» օրաթերթին տված հարցազրույցում դերասան ՍԱՐԳԻՍ ԳՐԻԳՈՐՅԱՆՆ ասել էր, որ չի ցանկանում նկարահանվել սերիալներում, քանի որ Հայաստանում որակյալ սերիալ չեն նկարահանում, ինքն էլ չի ուզում կոպեկներով աշխատել: Բայց օրեր առաջ նա հայտնվեց «Անծանոթը» սերիալում, այն էլ գլխավոր հերոսի կերպարում:
-Ի՞նչն է Ձեզ գրավել այս սերիալի մեջ, որ համաձայնել եք:
-Բավականին երկար լռություն էր մոտս, շատ ու շատ առաջարկներ եղան տարբեր հեռուստաընկերություններից: Հիմա եթե Դուք նայեք այս սերիալը, ինքներդ էլ կհամաձայնեք, որ այսօրվա դրությամբ դա թիվ մեկ սերիալն է: Էստեղ աշխատում են Մոսկվայից հրավիրված մարդիկ: Այս սերիալը սերիալի նման չէ, ավելի շատ ֆիլմ է հիշեցնում:
-Մեր նախորդ հարցազրույցում Դուք ասացիք, որ հարգում եք Ձեր մասնագիտությունը եւ ուզում եք նորմալ վճարվել, ենթադրում եմ՝ եթե համաձայնել եք, ուրեմն նաեւ հոնորարն է Ձեր սրտով:
-Իհարկե, նորմալ համաձայնության ենք եկել, խնդիր չեմ տեսնում, բայց իմ թիվ մեկ պահանջը եղել է որակյալ ֆիլմում խաղալը, երբ տեսա՝ ինչ ներուժ է դրված, համաձայնեցի: Ինքը «Մոնտե Քրիստո»-ի ոճի սերիալ է, այսինքն՝ մի կլաս բարձր է: Ամեն մի մանրուք հաշվի է առնված, նույնիսկ դերասանների հագուստը: Ոչ մի բանի վրա գումար չեն խնայում: Բնականաբար, երազանքս է ֆիլմում նկարահանվել, բայց չկա, Հայաստանում ֆիլմարտադրություն չկա:
-Հիշեցի նաեւ, որ դժգոհում էիք «չդերասանների» առկայությունից եւ ասում, որ դա վիրավորական է տարիներ շարունակ կրթություն ստացածի համար: Հիմա այն բոլոր մարդիկ, որոնք Ձեզ հետ խաղում են, դերասաննե՞ր են:
-Գլխավոր հերոսները գրեթե այո՛: Իմ խաղընկերները դերասաններ են:
-Մեր վերջին զրույցից ակնհայտ էր, որ սերիալներին նեգատիվ եք տրամադրված:
-Նեգատիվ տրամադրված էի, քանի որ իմ ուզած սերիալը չկար: Խնդիրն այն էր, որ երբ նախորդ սերիալում էի նկարահանվում, սկզբում գիտեի՝ ինչ եմ խաղալու, բայց հետո սցենարը փոխվեց, ու կերպարս դարձավ ուրիշ բան, ինչը ես էլ չցանկացա մարմնավորել: Բայց դե այսօր նորից նկարահանվում եմ, քանի որ, ցավոք, այլընտրանք չկա: Նույնիսկ գնացի Դրամատիկական թատրոն, ինձ չվերցրին:
-Ինչո՞ւ:
-Երեւի նրանց մոտ ավելի տաղանդավոր են՝ չնայած այդ տաղանդավորները շատ չեն էլ երեւում: Մոտավորապես պարզ էր՝ ինչ պատճառներով չկանչեցին: Դե բնական է, իրենց դպրոցը չեմ անցել, կարող է շատ մարդկանց խանգարեմ: Հասկացա, որ պետք է այլ բան փնտրել: Նարեկ Դուրյանի «Օպերացիա Նեմեսիս» ներկայացման մեջ Թալեաթ էի խաղում:
-Միայն դերասան աշխատելով, ծառայելով բեմին՝ հնարավո՞ր է տուն, ընտանիք պահել:
-Իհարկե ո՛չ: Եթե իմանաք՝ օրը քանի ժամ եմ աշխատում, նույնիսկ օրը չի բավականացնում: Առավոտյան տանից դուրս եմ գալիս, գիշերը 2-ին վերադառնում: Ե՛ւ տարբեր տեսակի միջոցառումներ վարելով, ե՛ւ սերիալներում խաղալով, ե՛ւ թատրոնում խաղալով, ե՛ւ սցենարներ գրելով, ե՛ւ զբաղվելով միջոցառումների կազմակերպմամբ՝ կարողանում եմ ընտանիքիս նորմալ ապրուստ ապահովել: Մի քիչ լավ ապրելու համար ահավոր շատ գործ պետք է անես: Պետք է լինես բազմակողմանի զարգացած վունդերքինդ, հայերն ամբողջ աշխարհում ճանաչված են իրենց հենց այդ ունակությամբ:
-Գիտեմ, որ միջոցառումների կազմակերպման կենտրոն ունեք, ի՞նչ միջոցառումներ եք կազմակերպում:
-Տարբեր` սկսած համերգներից, վերջացրած կնունքներ, ծնունդներ, հարսանիքներ… Դա իմ բիզնեսն է, կողքից օգնում է, որ ես ապրեմ, որ կողքից նայողը չասի. «Էս տղեն ինչի՞ ա սենց վատ հագնված»: Ես շատ եմ ամաչում, որ մեր դերասաններից ոմանք լավ ապրելու գումար չունեն:
-Ինչպես Դուք նշեցիք, թատրոնի աշխատավարձով դժվար է լավ ապրել:
-Առանց կողմնակի գումարի, այլ աշխատանքի՝ թատրոնի աշխատավարձով ապրել չես կարող: Իսկ ճանաչված մարդու շրջապատն էլ այլ է, նրան արդեն տարբեր տեղեր են հրավիրում, նա էլ պետք է պատշաճ կերպով ներկայանա, ինչի համար պետք է գումար ունենա, որ գնա:
-Ի՞նչ է, ամեն տեղ գումա՞րն է խոսում:
-Աշխարհում ամեն ինչի մեջ է խոսում գումարը, նույնիսկ սիրո մեջ, լուրջ եմ ասում: Ո՞վ ասաց, որ գումար պետք չէ: Լավ, սիրեց քեզ 2-3 ամիս, բայց դրանից հետո կռիվներ են լինելու: Ինչքան լավ ես պահում քո ընտանիքը, այնքան քեզ հարգում, սիրում են: Որսորդությունը տղամարդը պետք է լավ անի: Միայն այդ դեպքում քեզ կհարգեն, կսիրեն, դու էլ կլինես տան ղեկավարը:
-Ձեր ընտանիքը չորսհոգանոց է, ամսական կտրվածքով որքա՞ն գումար է անհրաժեշտ տունը պահելու համար:
-Ուզում եք իմանալ՝ ես որքան եմ ծախսում, թե որքան կցանկանայի ծախսել:
-Ե՛ւ մեկը, ե՛ւ մյուսը:
-Երեխաներին հագցնելով, տնտեսական հարցերով 2-2.5 հազար դոլար գնում է: Ես կուզենայի, որ ամսական գոնե 7-10.000 դոլար աշխատեի, որ տարվա մեջ 2 անգամ գնայինք հանգստանալու, կարողանայինք լավ բաներից հաճախ օգտվել: Սա նորմալ մարդու կյանք է, ոչ թե հարուստ: Ես ուզում եմ լավ ապրել: