ԳԱԶԱՏԱՐՆԵՐԻ ՓՈՂԸ ԿԵՐԵԼ ԵՆ, ԳԱԶՆ ԷԼ ՉԿԱ

2014թ. վերջին ամիսն է, իսկ ՀՀ վերահսկիչ պալատի՝ 2013թ հաշվետվության արդյունքները թեեւ գտնվում են Ազգային ժողովի օրակարգում, սակայն դեռ դրա քննարկման համար հստակ ժամանակ որոշված էլ չէ: Բայց միաժամանակ ՀՀ գլխավոր դատախազության հրահանգով ՎՊ հաշվետվության մեջ տեղ գտած չարաշահումների փաստերը դարձել են քրեական գործերի հիմքեր: «Ժողովուրդ»-ին հայտնի է դարձել, որ գործ է հարուցվել «Գյուղական տարածքների տնտեսական զարգացման ԾԻԳ» պետական հիմնարկի գործունեության, մասնավորապես՝ գազաֆիկացման շինաշխատանքներում թույլ տված խախտումների մասով:

«Ժողովուրդ»-ը նոյեմբերի 13-ին գրել էր, որ ՎՊ բացահայտումների հիման վրա բազմաթիվ քրեական գործեր են հարուցվել: Մասնավորապես ՀՀ գլխավոր դատախազությունը վերահսկիչ պալատի՝ 2013 թվականի ներկայացրած փաստաթղթերի հիման վրա, պետական միջոցները ոչ արդյունավետ ծախսելու կասկածով քրեական գործեր է հարուցել: Ըստ նույն տեղեկությունների՝ ՎՊ զեկույցի ուսումնասիրության արդյունքում առանձնացվել են քննության 20 ուղղություններ: Տեղեկացանք, որ քննության շրջանակներում արդեն իսկ հարցաքննվել են շուրջ 70 անձինք, որոնց թվում եղել են նաեւ գերատեսչությունների եւ պետական հիմնարկների ինչպես շարքային աշխատակիցներ, այնպես էլ՝ ղեկավարներ: Հարցաքննվել են նաեւ պետական պատվերով շինարարական աշխատանքներ իրականացրած, պետգնումներով ապրանքներ մատակարարած եւ պետական մարմիններին տարբեր կարգի ծառայություններ մատուցած ընկերությունների տնօրենները եւ աշխատակիցները: Քննության ընթացքում գերատեսչություններից եւ պետական հիմնարկներից առգրավվել են վերահսկիչ պալատի կողմից ուշադրության արժանացած գործարքների փաստաթղթերը, իրականացվել են տեղազննություններ պետպատվերով իրականացված շինարարություններում՝ դրանց իրական ծավալներն արձանագրելու եւ գնահատելու նպատակով:
Հրապարակումից երկու շաբաթ անց «Ժողովուրդ»-ը առայժմ կարողացավ պարզել, թե վերահսկիչ պալատի բացահայտումների արդյունքում որ ընկերության չարաշահումների փաստի առթիվ է հարուցվել քրեական գործ «Գյուղական տարածքների տնտեսական զարգացման ԾԻԳ» պետական հիմնարկի գործունեության, մասնավորապես՝ գազաֆիկացման շինաշխատանքներում թույլ տված խախտումների մասով: Ըստ մեզ հասած տեղեկությունների՝ այս գործի շրջանակներում էլ հարցաքննվել են 7 մարդ, եւ մի շարք փաստաթղթեր արդեն առգրավվել են:
Հիշեցնենք, որ 2013թ. վերահսկիչ պալատի ստուգման արդյունքում բացահայտվել էին, որ «Գյուղական տարածքների տնտեսական զարգացման ԾԻԳ» պետական հիմնարկի կողմից իրականացվող ծրագրերում կոռուպցիոն ռիսկեր կան: Թեեւ փաստաթղթերում գրված էր, որ «Գյուղական ենթակառուցվածքներ» ծրագրի նպատակն է եղել բարելավել գյուղական անապահով համայնքների բնակիչների կենսամակարդակը եւ ապահովել տնտեսական աճ, ինչի համար նախատեսվել է 31 մլն ԱՄՆ դոլար, սակայն Գեղարքունիքի, Սյունիքի, Տավուշի, Լոռու եւ Արագածոտնի մարզերի 28 համայնքների ենթակառուցվածքներում ներդրումների ¥հիմնականում` գազաֆիկացման աշխատանքներ¤ իրականացման համար ԾԻԳ-ը պայմանագրեր է կնքել մրցույթի արդյունքում հաղթող ճանաչված «ՍԱԴԵ ԲԸ (Ֆրանսիա) – Բլեսկ ՍՊԸ (ՌԴ)» ՀՁԳ-ի եւ «Եվրոպրոֆայլ» ՓԲԸ-ի հետ՝ համապատասխանաբար 4.9 մլրդ դրամ եւ 803.4 մլն դրամ արժեքով:
ՀՀ ՎՊ-ն գազաֆիկացման աշխատանքներից ընտրանքային կարգով ստուգել է 7 համայնքում կատարված աշխատանքները եւ բացահայտել, որ Խոզնավար, Խնածախ, Վաղատուր եւ Արտանիշ համայնքների գազաֆիկացման համար թեեւ 613.3 մլն դրամ գումար է ծախսվել, սակայն աշխատանքների ավարտից հետո էլ նշված համայնքները չեն կարող գազաֆիկացվել: Պատճառն այն է, որ գազատարները փտած վիճակում են եղել, ինչի համար էլ «Հայռուսգազարդ» ՓԲԸ-ն մինչ օրս չի ընդունել այդ գազատարները: Այսինքն՝ վերը նշված ընկերությունները վերցրել են պետության փողերը, փաստաթղթերով ցույց են տվել, թե գազատար են անցկացրել գյուղացիների համար, բայց իրականում փտած խողովակներ են փռել համայնքներում՝ յուրացնելով գումարը: Իսկ թե ովքեր են այս ընկերությունների սեփականատերերը, կփորձենք պարզել առաջիկայում: Հավելենք, որ միայն գազատարների շինարարության վրա ծախսվել 147.6 մլն դրամ:
Հուսանք, որ այս անգամ եւս հարուցված քրեական գործը չի ավարտվի ներողամտությամբ, եւ պետությանը հասցված վնասները փոխհատուցելուց հետո ընկերությունների սեփականատերերը չեն շարունակի «շվշվացնելով» շրջել:

ՔՆԱՐ ՄԱՆՈՒԿՅԱՆ

ՊՆ-ԻՆ «ՔՑԵԼՈՒ» ԳՈՐԾԻ ՄԱՆՐԱՄԱՍՆԵՐԸ

«Ժողովուրդ»-ը տեղեկացրել էր, որ օրերս ՀՀ քննչական կոմիտեի կողմից կալանավորվել է ՀՀ պաշտպանության նախարարության խոշոր մատակարարներից մեկը` գործարար Աշոտ Սարգսյանը:

Ինչպես արդեն «Ժողովուրդ»-ը գրել էր՝ Աշոտ Սարգսյանը ՊՆ-ին ապահովել է վիդեոկոնֆերանս սրահների տեխնիկայով: Մատակարարելուց հետո պարզվել էր, որ տեխնիկան ՊՆ-ի վրա վաճառվել է շուկայականից շատ բարձր գնով: «Ժողովուրդ»-ի տեղեկություններով՝ Աշոտ Սարգսյանը հանդիսանում է «ԱՍ-Թեչ անվտանգության համակարգեր» ընկերության տնօրենը: Այս ընկերությունը գործում է 2005 թվականից եւ հիմնականում ծառայություններ է մատուցել պետական եւ հանրային կառույցներին` նրանց շենքերը կահավորելով համապատասխան սարքավորումներով: Այս ընկերությունը տեխնիկայով է ապահովել մասնավորապես ՀՀ Ազգային ժողովի, ՀՀ Կառավարության, դատարանների շենքերը:
Աշոտ Սարգսյանի կալանավորումից հետո նրա ընկերության աշխատակիցները սկսել են ազատվել աշխատանքից, քանի որ ընկերության հետագա ճակատագիրն անհայտ է: Աշխատակիցները չգիտեն, թե ով եւ որտեղից պետք է վճարի իրենց աշխատավարձերը: «Ժողովուրդ»-ը փորձեց ստեղծված իրավիճակի վերաբերյալ մեկնաբանություններ ստանալ Աշոտ Սարգսյանի հարազատներից, սակայն վերջիններս հրաժարվեցին որեւէ մեկնաբանություն տալ:

Ք. Մ.

 
ԼՈՒՐԵՐ

«ԳԱՖԵՍՃՅԱՆ»-Ը ՏՈՒԳԱՆՎԵՑ
ՀՀ ֆինանսների նախարարության մաքսային կոմիտեն տուգանել է «Գաֆեսճյան» թանգարան-հիմնադրամին: «Ժողովուրդ»-ը պարզեց, որ դեռեւս 2012թ. հոկտեմբերի 10-ին «Ա.Բ.Ս. Քորփորեյշն» ՍՊԸ-ի մաքսային ձեւակերպումների մասնագետ Ալինա Հովհաննիսյանը «Գաֆեսճյան» թանգարան-հիմնադրամի անունով հայտարարագրել է Մեծ Բրիտանիայից ներկրված երկու հատ թանգարանային արվեստանմուշներ: Ավելի ուշ Ա. Հովհաննիսյանը դիմել է մաքսային մարմին եւ հայտնել, որ հայտարարագրման ժամանակ սխալ է թույլ տվել: Արդյունքում 2 տարի անց` նոյեմբերի 26-ին, ֆինանսների նախարարությունը մաքսային մասնագետին տուգանել է 50 հզ. դրամ:

ԳՈՂՈՒԹՅՈՒՆ Է ԱՐԵԼ
Օրերս գողություն է տեղի ունեցել CPS բենզալցակայանում: «Ժողովուրդ»-ի տեղեկություններով՝ մի երիտասարդ, որը բենզալցակայանի տնօրինության կողմից փորձաշրջան պետք է անցներ եւ նոր ընդունվեր աշխատանքի, բենզալցակայանի աշխատողից հափշտակել է 130 հազար դրամ: Բենզալցակայանի տնօրինությունը սկզբում կասկածներ չի ունեցել, որ դա կարող է իրականացրած լիներ փորձաշրջան անցնող երիտասարդը, սակայն ավելի ուշ՝ հսկման տեսախցիկների տեսագրությունները վերադիտելուց հետո, կարողացել են բացահայտել գողության դեպքը:

 
ՀԱՑԱԴՈՒԼ ԵՆ ԱՆՈ՞ՒՄ
Armlur.am-ին տեղեկություններ են հասել, որ ՀՀ արդարադատության նախարարության «Դատապարտյալների հիվանդանոց» ՔԿՀ-ից դուրս է գրվել 27 ազատազրկված, որոնցից 6-ը հացադուլ են հայտարարել: Հավանական հացադուլի պատճառը, ըստ տեղեկությունների, այն է, որ դուրս գրված ազատազրկվածները բողոքում են, թե իրենք լիովին չեն բուժվել, ինչը ԴՀ-ն հաշվի չի առել: Armlur.am-ին արդարադատության նախարարության ՔԿՀ մամուլի պատասխանատու Գոռ Ղլեչյանը հայտնել է, որ իրականում դուրս գրվածների թիվը 18 է, 2-ը տեղափոխվել են հիվանդանոցի այլ բաժանմունքներ: Իսկ հացադուլ չի եղել:

ՀՈՐ ՊԱՏՃԱՌՈՎ
Կոտայքի մարզի 45-ամյա բնակիչ Ռ. Մ.-ն դատապարտվել է մեկ տարվա ազատազրկման անչափահաս դստերը՝ Շուշանիկին, անզգուշությամբ մահ պատճառելու մեղադրանքով. այս մասին Armlur.am-ը տեղեկացել է դատական տեղեկատվական համակարգից: Կոտայքի մարզի ընդհանուր իրավասության դատարանի վճռով պատիժը պայմանականորեն չի կիրառվել՝ պատճառաբանելով, որ ամբաստանյալի ուղղվելը հնարավոր է առանց նշանակված պատիժը փաստացի կրելու, եւ որ վերջինիս նկատմամբ ազատազրկման ձեւով նշանակվող պատիժը պայմանականորեն չկիրառելու միջոցով սույն գործով հնարավոր է հասնել ՀՀ քրեական օրենսգրքի 48-րդ հոդվածով նախատեսված պատժի նպատակներին` սոցիալական արդարության վերականգնմանը, պատժի ենթարկված անձի ուղղմանը եւ հանցագործությունների կանխմանը:
Իսկ դեպքը տեղի է ունեցել 2014 թվականի հունվարի 29-ին: Այսպես՝ Ռ. Մ.-ն, խախտելով «անվտանգության կանոնները գազի տնտեսությունում» տեխնիկական կանոնակարգը, ինքնակամ տեղադրել է արագահոս ջրատաքացուցիչ, որի շահագործման հետեւանքով կարբօքսիհեմոգլոբին սուր թունավորումից անզգուշությամբ առաջացրել է դստեր մահը: Թե՛ դատաքննության, թե՛ նախաքննության ընթացքում հայրն ընդունել է իրեն առաջադրված մեղադրանքը. խնդրել է արագացված կարգով դատական քննություն:

ԾԵԾԵԼ ԵՆ
2014 թվականի նոյեմբերի 9-ի լույս 10-ի գիշերը՝ ժամը 05:30-ի սահմաններում, ՀՀ ոստիկանության Արարատի մարզային վարչության Արարատի բաժնին կից պահպանության բաժնի ոստիկանը եւ նրա եղբայրը Երեւան-Երասխ ավտոմայրուղու աջ կողմում տեղադրված վագոն-տնակի դիմաց անձնական փոխհարաբերությունների շուրջ առաջացած վեճի ընթացքում մեծ մետաղական բանալիով եւ մետաղական ամբարձիչով ծեծել են եղբայրներ Եղիշե Մ.-ին եւ Արթուր Մ.-ին: Այդ մասին Armlur.am-ը տեղեկացել է հատուկ քննչական ծառայությունից: Վիճաբանության ընթացքում ոստիկանը դիտավորյալ կոտրել է Եղիշե Մ.-ին պատկանող «Մերսեդես» մակնիշի ավտոմեքենայի հետեւի ապակու եւ հետեւի աջ կողային ապակու արեւի պաշտպանիչները, այնուհետեւ փախցրել է ավտոմեքենան, դրա միջից եւ վրայից գողացել զգալի չափի արժողության «Նոկիա» բջջային հեռախոսները եւ «Մերսեդես»-ի տարբերանշանը, իսկ մեքենան թողել Արարատ քաղաքում: Կատարվում է նախաքննություն: