Մոսկվայում ձերբակալվել է բանկոմատներ կողոպտող հայերի խումբը

Մոսկվայի հյուսիս-արևելքում բանկոմատի առևանգման փորձի ժամանակ ձերբակալվել են էթնիկ հանցավոր խմբավորման անդամներ:

Ինչպես տեղեկացնում է Интерфакс-ը, նախօրեին քրեական հետախուզության օպերատիվ խումբը ձերբակալել է 6 տղամարդու, որոնք փորձում էին գողանալ Ենիսեյան փողոցի վրա գտնվող բանկոմատը:

Կողոպտիչներն ինքնասպասարկման գրասենյակին են մոտեցել Porsche Cayenne և BMW X5 մեքենաներով, այնուհետև ծանր գործիքների միջոցով տեղից պոկել են բանկոմատը, որում կար 2,8 մլն ռուբլի, և տարել այն ավտոմեքենայի ուղղությամբ: Հենց այդ պահին էլ նրանց ձերբակալել են: Կասկածյալներից մեկը փորձել է հեռանալ BMW մակնիշի ավտոմեքենայով, սակայն բախվել է իրավապահների միկրոավտոբուսին, ինչից հետո էլ ձերբակալվել է:

Ձերբակալվածների թվում չորս հայ կա, որոնցից երկուսն ունի Հայաստանի քաղաքացիություն, Չեչնիայի մի բնակիչ և մեկ քաղաքացի՝ Միտիշչի քաղաքից: Նրանք բոլորը կասկածվում են Մոսկվայում և Մոսկվայի մարզում բանկոմատների մի շարք կողոպուտների մեջ: