Armlur.am-ն արդեն հայտնել էր, որ երեկ ԱԱԾ-ն կաշառք ստանալու պահին ձերբակալվել է Գյումրու Միքայել Նալբանդյանի անվան Պետական մանկավարժական ինստիտուտի «Նախազորակոչային պատրաստության և ֆիզիկական դաստիրակություն» ֆակուլտետի ռազմական ամբիոնի դասախոս, փոխգնդապետ Տիգրան Մադոյանը:
Պարզվել է, որ Տ. Մադոյանը նույն ինստիտուտի 5-րդ կուրսի ուսանող, ՀՀ ԱԱԾ Սահմանապահ զորքերի N զորամասի պայմանագրային զինծառայող, շարքային Ռուբեն Գևորգյանից՝ ստուգարք ստանալու դիմաց, պահանջել և ստացել է 60 հազար դրամ գումար:
Armlur.am-ի հետ զրույցում բուհի պրոռեկտոր Սամվել Ալեքսանյանը հայտնեց, որ նշված ուսանողը հեռակա ավարտական կուրսում է սովորում, և նրա ուսումնական պրակտիկայի առարկայական մեթոդիստը Տիգրան Մադոյանն էր: Միջադեպը, ըստ մեր զրուցակցի, տեղի է ունեցել ուսանողի պրակտիկայի օրագրում առկա թերությունների պատճառով:
«Ես դեռևս ուսանողի հետ չեմ խոսել, նա այս պահին ծառայության է: Իսկ Մադոյանն արդեն 10 տարուց ավել է՝ մեր դասախոսներից է, նախկինում, բնականաբար, նման դեպքեր չեն եղել, քանի որ եթե լինեին, նա այստեղ չէր աշխատի մինչև հիմա»,- նկատեց մեր զրուցակիցը:
Տեղեկացնենք, որ ԱԱԾ Քննչական վարչությունում դեպքի առթիվ հարուցվել է քրեական գործ: Կատարվում է նախաքննություն:
.gif)
