Վերջին ժամանակները ժամկետանց սննդամթերքի խնդիրը կրկին դարձել է ամենաքննարկվող թեմաներից մեկը: Այսօր գրեթե անհնար է գտնել այնպիսի մի խանութ, որտեղ չի վաճառվում ժամկետանց սննդամթերք: Երեւան քաղաքում անցկացրած հարցումներից պարզ դարձավ, որ յուրաքանչյուր 10 քաղաքացուց 9-ը գնել է ժամկետանց կամ փչացած սննդամթերք: Քաղաքացիների հիմնական բողոքները կապված են կաթնամթերքի, հացի եւ պահածոյացված սննդամթերքի հետ: Իսկ ահա 44-ամյա Մարինե Առաքելյանը, վերջերս Աթոյան փողոցի վրա գտնվող` «Աբա» խանութից գնել էր կոնֆետներ, որոնք ինչպես հետագայում պարզել է, հին էին. «Կոնֆետներն այնքան էին չորացել, որ ինքն-իրեն փշրվում էին, բացի դա շոկոլադը ցեցոտել եւ սպիտակել էր» – ասաց Մարինե Առաքելյանը: Առավել շատ սպառվող սննդամթերքի` հացի վրա կամ վաճառքի բաժիններում հիմնականում բացակայում է տեղեկատվություն` բաղադրության, արտադրողի եւ արտադրման ժամկետի մասին, իսկ ահա աղցանները վաճառվում են առանց պահպանման, պատրաստման եւ բաղադրության մասին տեղեկատվության: Նշենք, որ ըստ «Սպառողների իրավունքների պաշտպանության մասին» ՀՀ օրենքի իններորդ հոդվածի` սպառողն իրավունք ունի պահանջել արտադրողի, վաճառողի եւ իրացվող ապրանքների վերաբերյալ անհրաժեշտ ու ստույգ տեղեկություններ, իսկ մատակարարը պարտավոր է ներկայացնել պահանջվող տեղեկությունը հայերենով: Բայց մեր օրերում ո՞վ է կիրառում այս նորմը: Ներկրվող ապրանքների վրա ոչ ճիշտ թարգմանված հայերեն տեքստ է փակցված: Թարգմանության մեջ հաճախ այնպիսի բաղադրիչների մասին է նշվում, որոնք իրականում բացակայում են տվյալ սննդամթերքի բաղադրությունից, կամ հակառակը, չեն նշվում այն բաղադրիչները, որոնք առկա են: Թեեւ վերը նշված օրենքի 8-րդ հոդվածի 2-րդ կետի համաձայն` արտադրողը պարտավոր է ապահովել ապրանքի անվտանգությունը պիտանելիության ժամկետի ընթացքում, բայց հայտնի է, որ շատ հաճախ սպառողը գնում է սննդամթերք, որի պիտանելիության ժամկետը դեռ չի սպառվել, սակայն նրա որակական հատկանիշները չեն համապատասխանում սահմանված չափանիշներին: Այս երեւույթի հիմնական պատճառը արտադրողի կամ վաճառողի մեքենայություններն են: Ըստ Սպառողների միության նախագահ Արմեն Պողոսյանի, վերջիններս ժամկետի սահմանին մոտ կամ ժամկետի լրանալուց հետո իրական ժամկետի վրա մի նոր պիտակ են փակցնում եւ այդպես հրամցնում սպառողին:Իսկ թե ինչ հետեւանք կունենա ժամկետանց եւ փչացած սննդամթերքը սպառողների առողջական վիճակի վրա, արտադրողին կամ վաճառողին այնքան էլ չի հետաքրքրում:Դրա համար էլ ՀՀ կառավարությունը անուշադիր վաճառողների եւ անբարեխիղճ արտադրողների գործողությունները կասեցնելու նպատակով, 20.01.11 ընդունել է Սննդամթերքի հիգիենային ներկայացվող պահանջների տեխնիկական կանոնակարգը որի միջոցով հնարավոր կլինի ապահովել սննդամթերքի անվտանգությունը:Իսկ թե որքանո՞վ կարդարացնի իր գործունեությունը այս կառույցը, ցույց կտա ժամանակը: Սակայն հստակ, վստահ կարելի է ասել, որ նմանատիպ շատ կազմակերպություններ իրենց գործունեությունը սկսել են տարիներ առաջ, բայց իրավիճակը որեւէ կերպ չի շտկվել: Այնպես որ, ՀՀ քաղաքացիներին մնում է գնումներ կատարելիս լինել առավել ուշադիր, ստուգել սննդամթերքի պիտանելիության ժամկետը եւ որեւէ խախտում նկատելու դեպքում` բարձրաձայնել ու սթափեցնել «անուշադիր» վաճառողներին: Այլ ելք չկա: ԱՆՆԱ ԱՐԶՈՒՄԱՆՅԱՆ ԵՊՄՀ ուսանողուհի
.gif)
