Armlur.am-ն արդեն հայտնել է, որ երեկ երեկոյան Կոտայքի մարզի Հացավան գյուղում վիճաբանություն է տեղի ունեցել մի խումբ տղամարդկանց միջև: Այնուհետև կռվի մասնակիցներից մեկը վրդովված հեռացել է և քիչ անց վերադարձել հրացանով` կրակոցներ արձակելով իր հակառակորդների ուղղությամբ:
Քննչական կոմիտեից տեղեկացանք, որ ՀՀ քննչական կոմիտեի Կոտայքի մարզային քննչական վարչության Աբովյանի քննչական բաժնում հարուցվել է քրեական գործ՝ Հացավանի բնակիչ, 27-ամյա Մ.Գասպարյանին ծանր մարմնական վնասվածք պատճառելու դեպքի առթիվ՝ ՀՀ քրեական օրենսգրքի 112-րդ հոդվածի 1-ին մասով։
2014 թվականի դեկտեմբերի 19-ին՝ ժամը 23.25-ին, «Սուրբ Գրիգոր Լուսավորիչ» ԲԿ-ից ոստիկանության Կոտայքի բաժին ահազանգ է ստացվել, որ նույն օրը՝ աջ կոնքազդրային հոդի շրջանի հրազենային վերք, գլխի գագաթային շրջանի սալջարդ վերք ախտորոշմամբ բժշկական կենտրոն է տեղափոխվել Կոտայքի մարզի Հացավան գյուղի բնակիչ Մ.Գասպարյանը:
Քննությամբ պարզվել է, որ գյուղապետարանի դիմաց Մ.Գասպարյանը վիճաբանել է նույն գյուղի՝ 34-ամյա մեկ այլ բնակչի հետ, որի ժամանակ էլ վերջինս հրացանով կրակել է Մ.Գասպարյանի աջ կոնքի շրջանին։
Առերեւույթ հանցանք կատարելու մեջ կասկածվող անձը ձերբակալվել է, իսկ հրացանը՝ առգրավվել։
Նշանակվել են փորձաքննություններ, միջոցներ են ձեռնարկվում գործի հանգամանքների բազմակողմանի, օբյեկտիվ հետազոտման համար։
.gif)
