Արտաշատի թատրոնում երեխաները ոտքի վրա են նայում տոնական ներկայացումները

Այս օրերին ինչպես մայրաքաղաք Երևանի մշակութային կենտրոններում, այնպես էլ Արտաշատ քաղաքի Ամո Խարազյանի անվան դրամատիկական թատրոնում երեխաների համար անցկացվում են Ամանորին նվիրված միջոցառումներ:

Այս առիթով, Armlur.am-ն Արտաշատի տարածաշրջանի համայնքների բնակիչներից դժգոհություններ ստացավ այն մասին, որ իրենք գումար են տալիս, տոմս են ձեռք բերում, բայց ներկայացումը դիտելու համար ստիպված են լինում ոտքի վրա կանգնել: 37-ամյա Լուսինեի փոխանցմամբ՝ թատրոնի դահլիճն այնքան մարդաշատ է լինում, որ նույիսկ կանգնելն էլ է անհնար դառնում, իսկ երեխաներն անտրամադիր են տուն գնում: Ի դեպ, մեկ տոմսի արժեքը կազմում է 500 դրամ:

Խնդրի առնչությամբ, Armlur.am-ը զրուցեց թատրոնի տնօրեն Գեղանուշ Սայադյանի հետ, ով վրդովված նկատեց.«Թող ամոթ անեն նման տեղեկություն տարածողները. 300 տոմս են վերցնում 600 հոգով են գալիս: Ամեն երեխայի հետ երկու ծնող է գալիս: Մի երեխայի հետ և՛ հայրն է գալիս, և՛ մայրը: Եվ որպեսզի մի մասին թատրոնից դուրս չթողնեմ, դրա համար ստիպված իմ կառավարական օթյակն եմ տրամադրում, նույնիսկ աթոռներ եմ տեղադրում, որ նստեն: Ահա, օրինակ՝ քաղաքի 1-ին դպրոցը մեզանից գնել է  300  տոմս, բայց եկել են 600 հոգով: Դե ասեք, ինչպե՞ս վարվեմ, ինչպե՞ս բոլորին տեղավորեմ 450 տեղանոց դահլիճում: Ես չգիտեմ, թե ինչու են սկսել վերջին շրջանում այդքան քար շպրտել իմ պարտեզ»: