ԼՈՒՐ ԿԱԴՐ

Լուսանկարը՝ Հայաստանի երիտասարդական հիմնադրամի

Երեկ Արմավիրի մարզի Մայիսյան գյուղում բացվեց 2014թ. օգոստոսյան դեպքերի ժամանակ ադրբեջանական զորքերի դիվերսիոն հարձակումը հետ մղելիս, մարտի ժամանակ ծանր վիրավորված եւ օգոստոսի 2-ին հոսպիտալում մահացած կրտսեր սերժանտ Սարգիս Մովսիսյանի հիշատակը հավերժացնող հուշաքար: Այդ օրը Սարգիսն իր խրամատում զոհվեց հերոսի մահով:

 
ՀԱՐՑ. Սովորում եմ ագրարային համալսարանի 2-րդ կուրսում, տնտեսագիտության ֆակուլտետում: Ցանկանում եմ ուսանողական վարկ վերցնել՝ 500.000 դրամի չափով: Կցանկանայի տեղեկանալ՝ ի՞նչ պայմանների դեպքում եւ ի՞նչ տոկոսագումարով վարկ ինձ կտրամադրվի:

Արթուր Պետրոսյան (19 տարեկան, ուսանող)

ՊԱՏԱՍԽԱՆ. Ձեր կամ Ձեր ծնողների եւ (կամ այլ երաշխավորների) դրական վարկային պատմությունների առկայության դեպքում հնարավոր է վարկավորել՝
ա. Բնակարան երիտասարդներին վերաֆինանսավորող վարկային կազմակերպության կողմից ծրագրով՝ առավելագույնը 450.000 ՀՀ դրամ՝ 12% տարեկան տոկոսադրույքով, որից 2-3% սուբսիդավորում է ծրագիրը՝ կախված ուսանողի առաջադիմության ցուցանիշից՝ առավելագույնը 120 ամիս մարման ժամկետով, որի դեպքում մինչեւ ուսման ավարտը կարելի է մարել միայն տոկոսագումարները:
Ուսման ավարտից հետո սկսվում է նաեւ վարկի մայր գումարի եւ տոկոսագումարների մարումը միասին:
բ. «Կոնվերս Բանկ» ՓԲԸ Էքսպրեսս ուսանողական վարկով՝ առավելագույնը 500.000 ՀՀ դրամ 18% – 21% տարեկան տոկոսադրույքով՝ առավելագույնը 18 ամիս մարման ժամկետով, որի դեպքում ամսական վճարվում են մայր գումար եւ տոկոսներ միասին: Առկա եւ նաեւ միանվագ՝ 2.000 ՀՀ դրամ միջնորդավճար:
գ. «Կոնվերս Բանկ» ՓԲԸ «Իմ Ապագան» ուսանողական վարկատեսակով՝ առավելագույնը՝ 4.000.000 ՀՀ դրամի չափով: Վարկը հաստատվում է ուսման ողջ ժամանակահատվածի համար:
Այն տրվում է փուլային եղանակով՝ յուրաքանչյուր կիսամյակ ուսումնական հաստատությունից հաշիվ-ապրանքագրի ներկայացման հիման վրա փոխանցում կատարելու միջոցով, տարեկան 22 տոկոսադրույքով, ուսման վճարի առավելագույնը 80% չափով, առկա է 2.000 ՀՀ դրամ միջնորդավճար յուրաքանչյուր մասնաբաժնի տրամադրման ժամանակ:
Բոլոր ներկայացված վարկատեսակների գծով հաճախորդին տրվում է վարկի մարման ժամանակացույց, որտեղ ներկայացված են վարկի եւ տոկոսագումարների մարման ամսաթվերը: Մինչեւ վարկերի տրամադրման մասին որոշման կայացումը, բանկը պարզում է հաճախորդի վարկունակությունը եւ վարկային պատմությունը:

Կոնվերս Բանկ

«ԺՈՂՈՎՈՒՐԴ». Այսինքն՝ վարկը տրամադրելիս բանկը հաշվի է առնում անձի վճարունակությունը, այնուհետեւ՝ տրամադրում վարկ: Ցավալի է, որ մարդիկ ստիպված են վարկ վերցնել՝ ուսման համար: Իսկ իրականում կրթությունն այն ոլորտն է, որն ամենից շատ է զգում պետության աջակցության կարիքը, պետությունն էլ որակյալ մասնագետների կարիք ունի:

 
ՀԱՐՑ. Հայրս ամսական ստանում էր 40.000 դրամ կենսաթոշակ: Նրա մահից հետո մահացածի մեկ տարվա համար սահմանված կենսաթոշակի չափը 200.000 դրամ էր: Սակայն, ըստ մեր հաշվարկի, այն պետք է 400.000 դրամ կազմեր: Խնդրում եմ՝ պարզաբանեք՝ ինչպե՞ս եւ օրենքի ո՞ր հոդվածով է կարգավորվում այս խնդիրը, եւ իրականում որքա՞ն պետք է կազմեր այս գումարը՝ նշված կենսաթոշակի չափով:

Ալբերտ Հովսեփյան (68 տարեկան, ինժեներ)

ՊԱՏԱՍԽԱՆ. «Պետական կենսաթոշակների մասին» ՀՀ օրենքի 44-րդ հոդվածի 1-ին մասի համաձայն` կենuաթոշակառուի մահվան դեպքում հուղարկավորությունը կատարած անձին նշանակվում եւ վճարվում է թաղման նպաuտ:
Նույն հոդվածի 5-րդ մասի համաձայն` թաղման նպաստը նշանակվում է, եթե հուղարկավորությունը կատարվել է ՀՀ-ում կամ կենսաթոշակառուն մահացել է ՀՀ-ում: Թաղման նպաստը նշանակվում է գրավոր դիմումը եւ անհրաժեշտ փաuտաթղթերն անձի մահվանից հետո` վեց ամuվա ընթացքում, կենuաթոշակ նշանակող uտորաբաժանում ներկայացնելու դեպքում:
Վերը նշված հոդվածի 6-րդ մասի համաձայն` թաղման նպաստի չափը սահմանում է ՀՀ Կառավարությունը:
ՀՀ Կառավարության՝ 2010 թ. դեկտեմբերի 30-ի թիվ 1734-Ն որոշմամբ 2011 թ. հունվարի 1-ից թաղման նպաստի չափը սահմանվել է 200.000 դրամ:
Ելնելով վերոգրյալից` թաղման նպաստի չափը 200.000 դրամ է, անկախ կենսաթոշակի չափից:

ՀՀ աշխատանքի եւ սոցիալական հարցերի նախարարություն

«ԺՈՂՈՎՈՒՐԴ». Ստացվում է՝ անկախ կենսաթոշակի չափից՝ պետությունը բոլորի համար սահմանում է միեւնույն դրամական օգնությունը, այսինքն՝ 200.000 դրամ: Սակայն բոլորին էլ պարզ է, որ իրականում հուղարկավորության ծախսերը գերազանցում են պետության կողմից հատկացվող գումարի չափը, եւ մարդիկ ստիպված նույնիսկ պարտք են վերցնում՝ հուղարկավորությունն իրականացնելու համար: