Այսօր Էկոնոմիկայի նախարար Կարեն Ճշմարիտյանը տարեվերջյան ասուլիսի ժամանակ ամփոփեց տարին և ներկայացրեց նախարարության ձեռքբերումները և որպես առաջնային օրինակ` նշեց ԵՏՄ անդամակցությունը:
«Իրականացվել են Հայաստանի` Մաքսային միությանը և Բելառուսի Հանրապետության, Ղազախստանի Հանրապետության և Ռուսաստանի Դաշնության Միասնական տնտեսական տարածքին միանալու միջոցառումների ծրագրով մինչև ՀՀ անդամակցությունը նախատեսված 126 միջոցառումները: Շարունակական աշխատանքներ են տարվում Հայաստանի նորմատիվաիրավական դաշտը ԵՏՄ-ին համապատասխանեցնելու ուղղությամբ», – նշեց նա:
Նախարարը խոսեց նաև Եվրոպական միության հետ համագործակցության մասին և նշեց, որ 2014-ի ընթացքում ստորագրվել է «Աջակցություն գյուղատնտեսության և գյուղի զարգացմանը» 2013 թվականի ֆինանսավորման համաձայնագիրը` 25 մլն եվրո ընդհանուր արժեքով:
Ստորագրվել է ԵՄ տեխնիկական աջակցության 4 համաձայնագիր` ընդհանուր 21 մլն եվրո արժեքով, որոնք վերաբերում են տարածքային զարգացմանը, միջուկային ոլորտի համագործակցությանը, միգրացիայի և սահմանների կառավարման աջակցությանը և ԵՄ-Հայաստան համաձայնագրերի իրականացմանն աջակցելուն:
Կարեն Ճշմարիտյանը տեղեկացրեց, որ հայկական ծագման ապրանքները շարունակում են ԵՄ շուկա արտահանվել զրոյական կամ նվազեցված մաքսատուրքերով:
.gif)
