Ինչ հագնել այծի տարում. նորաձևության գլխավոր միտումները

Ինչպես ամեն տարի, այս տարի ևս համաշխարհային նորաձևության առաջատարները ջանք չեն խնայել՝ ներկայացնելու յուրօրինակ ու նորաոճ հագուստի, աքսեսուարների ու զարդերի լայն ընտրանի՝ հագեցած վառ գույներով, համարձակ ձևվածքով ու նոր լուծումներով:

Ընդհանուր առմամբ այս տարին կարելի է անվանել վերադարձ դեպի 70-ականներ: Այնպես որ, եթե մայրիկների կամ տատիկների երիտասարդ տարիներից հիշատակ մնացած հագուստ կա, դրանք կարելի է վերակենդանացնել: Լայն դեկոլտե, մինի և միդի կիսաշրջազգեստներ, լայն շրջանակներով կլոր ակնոցներ, հաստ գոտիով վերարկուներ, լայն փողքերով տաբատներ, զամշ՝ գունային բազմազանությամբ:

Նորաձևությունն այս տարի առաջարկում է կիսաշրջազգեստների լայն տեսականի: Սակայն գլխավոր միտումը ազատությունն է, թեթևությունն ու սեքսուալությունը:

Կիսաշրջազգեստ-մատիտ (юбка-карандаш): Այս ոճի կիսաշրջազգեստը ցանկալի է համատեղել ինչպես նուրբ բլուզների, այնպես էլ ձիգ կտորից վերնաշապիկների հետ:

Լայն, բազմաշերտ կարճ կիսաշրջազգեստներն է՛լ ավելի կանացի կդարձնեն ձեզ՝ ընդգծելով կանացի կազմվածքի ողջ հմայքը: Ընդհանրապես այս տարի դիզայներները կանանց ու աղջիկներին խորհուրդն են տալիս հնարավորինս ընդգծել կանացիությունը: Դիզայներները չեն մոռացել նաև այն աղջիկներին ու կանանց, որոնք նախընտրում են սպորտային ոճը, առաջարկելով կոնքերից մի փոքր լայնացող և մեծ գրպաններով կիսաշրջազգեստներ: Այս ոճը պետք է համատեղել սպորտային աքսեսուարների հետ, չնայած որոշ դիզայներներ արել են ճիշտ հակառակը՝ ստանալով յուրօրինակ կերպարներ:

Նորաձև են նաև չափազանց երկար կիսաշրջազգեստները, կաշվից ու զամշից կիսաշրջազգեստներն ու կիսաշրջազգեստ-շորտերը:

Տարվա գույները

2015-ի ամենանորաձև գույներն են կանաչը, հատկապես` զմրուխտյա, էլեկտրիկ կապույտը, իսկ նորաձևության գագաթնակետին սիցիլական Մարսալա գինու գույնն է, որը կարելի է համեմատել նաև նռան գույնի հետ: Սա արդեն պաշտոնապես հայտարարվել է Pantone Color գիտահետազոտական ինստիտուտի կողմից: Հատկապես Նոր տարվա գիշերը փայլուն տեսք կունենաք, եթե հագնեք այդ գույնի երեկոյան զգեստ:

Շարունակում են ակտուալ մնալ փիրուզագույնը, կարմիրն ու մարջանագույնը, հյութեղ նարնջագույնը, վառ դեղինը և իհարկե դասական սևն ու սպիտակը, մոխրագույնն ու բեժը:

2015-ի նորաձևության գլխավոր միտումներից է կարակուլը, սակայն ոչ ստանդարտ սև գույնով: Համաշխարհային քայլահարթակներում այս տարի ներկայացվել են գունավոր կարակուլից վերարկուներ ու կիսավերարկուներ, ժիլետներ ու ժակետներ, որոնք բավական մեծ հետաքրքրություն են առաջացրել նորաձևության աշխարհում:

Այս տարի շատ նորաձև են թիկնոց-վերարկուները: Տարվա հիթային հագուստներից են բորդո գույնի կոստյումը, թափանցիկ տոպերը, ծաղկային և հեքիաթային հերոսների պատկերներով զգեստներն ու բլուզները: Նորաձև են նաև «կեղտոտ» մորթին, անթև պիջակներն ու ժակետները, ինչպես նաև տղամարդու ոճի կապիչներով կոշիկները: Իսկ կերպարն ամբողջական դարձնելու համար չմոռանաք դնել մեծ, կլոր, հաստ շրջանակներով ակնոց ու լայնեզր գլխարկ:

Ընդհանրապես այս ձմեռ խիստ ոճային է գլխարկը: Կրեք մորթե կամ գործվածքից գլխարկներ, իսկ երկար, հաստ, հյուսված շարֆը գցեք վերարկուի վրայից: Ի դեպ, շատ նորաձև են բնական մորթուց շարֆերը:

Տարվա ամենակարևոր աքսեսուարներից է ծաղկային կրծքազարդը, որը կարող է լինել նաև բնական:

Շտապենք ուրախացնել նաև ջինսի սիրահարներին: Այս տարվա նորաձևության գլխավոր միտումներից է գունավոր ջինսը, մասնավորապես` շագանակագույնը, կրակագույնը և կարմիրը: Կաշվե տաբատները նույնպես մնում են թրենդային:

Ի՞նչ զարդեր կրել այծի տարում

Նորաձև զարդերի գլխավոր միտումն այս տարի ծավալն ու ոչ ստանդարտ դիզայնն է: Դրանք պետք է լինեն խոշոր և աչքի ընկնող:

Այս տարի շատ նորաձև է մեկ ականջօղը, սակայն հիշեք, որ այն պետք է լինի հնարավորինս խոշոր:

Մանյակները նույնպես պետք է լինեն խոշոր և ոչ սովորական: Հատկապես արդիական են շատ կարճ մանյակները:

Նորություն են նաև կաշվի համադրությամբ կամ ամբողջությամբ կաշվից պատրաստված ապարանջանները: Ոսկու կամ ոսկեգույնի սիրահարներն այս տարի կարող են լիովին վայելել իրենց զարդերը. ոսկեգույն զարդարանքը տարվա գլխավոր թրենդներից է:

Ի տարբերություն ականջօղերի, մատանիների դեպքում քանակն ավելացել է. այս տարի շատ նորաձև են երկու, անգամ երեք գլխանի մատանիները, որոնց գլխիկները փռվում են երկու, երեք մատների վրա:

Ինչպե՞ս զարդարել տունն ու սեղանը

Տան գլխավոր զարդն ամանորյա տոնածառն է, և հարկ է խնամքով ու մեծ ուշադրությամբ վերաբերվել դրա հարդարանքին: Եվ այսպես, խորհուրդ է տրվում տոնածառը զարդարել տարվա տիրոջ՝ այծի պահանջներին համապատասխան: Քանի որ տարին կապույտ և կանաչ այծի տարի է, շատ համահունչ կլինի տոնածառը զարդարել կապույտ կամ կանաչ խաղալիքներով, իսկ դրանց համադրությունը կարող է ավելի գեղեցկացնել տոնական ծառը:

Այս տարի խանութներում հաստատ կգտնեք տոնածառի` այծի տեսքով խաղալիքներ, ուստի շտապեք սիրաշահել այծին՝ տոնածառը զարդարելով նրա կերպարանքով:

Կապույտ ու սպիտակ կլոր խաղալիքների համադրությունը նույնպես շատ գեղեցիկ կդիտվի կանաչ տոնածառի վրա:

Հետաքրքիր առաջարկ ոչ սովորական զարդարանքի սիրահարներին: Որպեսզի տարին լինի ֆինանսապես բարեբեր, խորհուրդ ենք տալիս տոնական ծառը զարդարել թղթադրամներով և արծաթագույն ու ոսկեգույն մանրադրամներով:

Ընտանեկան լուսանկարներով զարդարանքը նույնպես նորույթ կլինի և կզարմացնի ձեր հյուրերին: Այնպես որ հենց այսօր ընտրեք լավագույն լուսանկարները և ժապավեններով ամրացրեք ծառին: Կարող եք անգամ դրանք փայտե շրջանակների մեջ դնել և այդպես կախել ծառին:

Հետաքրքիր կլինի նաև տոնածառը նուրբ, գունավոր թխվածքաբլիթներով զարդարելը, հատկապես` այծի և ոչխարի տեսքով: