Գյումրիում դատախազության շենքի առջև իրադրությունը շարունակում է լարված մնալ: ՀՀ գլխավոր դատախազ Գևորգ Կոստանյանի բոլոր պարզաբանումները ցուցարարների սրտով չեն:
Բազմության կողմից պարբերաբար քարեր են նետվում դատախազության շենքի ուղղությամբ: Նրանք չեն հավատում դատախազի այն խոսքերին, թե մեղադրյալ Վալերի Պերմյակովը պատիժը կկրի ՀՀ-ում և արդարացի կերպով:
Այնտեղ է նաև Շիրակի թեմի առաջնորդ Միքայել եպիսկոպոս Աջապահյանը: Նա նշեց, որ պահանջը Ռուսաստանի Դաշնությունից է, և ռուսական ռազմակայանից պահանջում են ոճրագործին հանձնել հայ իրավապահներին:
Գևորգ Կոստանյանը խոսեց ցուցարարների հետ և նշեց, որ բոլորին մեկ հարց է հետաքրքրում, թե արդյոք ինքը դիմելու է ՌԴ դատախազին, որպեսզի հանցագործին ամբողջությամբ տրամադրեն Հայաստանին, թե ոչ:
«Ես հիմա որպես գլխավոր դատախազ և տղամարդավարի ձեզ ասում եմ, որ ես 100 տոկոսով դիմել եմ նրանց: Եթե մերժեն, կքննարկենք մեր անելիքները», – նշեց նա: Ի պատասխան ցուցարարները վանկարկեցին. «Հիմա, Հիմա»:
.gif)
