Մայրաքաղաքի կրթական և մշակութային հաստատությունները ջեռուցվում են և ապահովված են անհրաժեշտ ջերմաստիճանային պայմաններ: Այս մասին Երևանի քաղաքապետ Տարոն Մարգարյանին զեկուցվել է տարվա աշխատանքային առաջին խորհրդակցության ժամանակ: Քաղաքապետը հանձնարարել է շարունակել այս ուղղությամբ հետևողական աշխատանքները՝ ի հայտ եկած թերությունները շուտափույթ վերացնելու և անխափան ջեռուցում ապահովելու նպատակով:
Անդրադառնալով շինբարեկարգման 2014 թվականի ծրագրերով կրթական և մշակութային հաստատություններում նախատեսված շինաշխատանքներին՝ զեկուցվել է, որ բոլոր հաստատություններում աշխատանքներն ավարտված են, այդ թվում՝ թիվ 1 և 106 մանկապարտեզներում, որտեղ շինարարական աշխատանքներն ավարտվել են տարեվերջին: Քաղաքապետ Տարոն Մարգարյանը պատասխանատուներին հանձնարարել է հնարավորին սեղմ ժամկետում քայլեր ձեռնարկել մանկապարտեզների կահավորման և շահագործման ուղղությամբ:
«2014 թվականին մենք հայտարարել էինք, որ այս մանկապարտեզները ևս կվերանորոգվեն և կհանձնվեն շահագործման: Հիմնական աշխատանքներն ավարտված են, ու երեխաների հաճախելու համար ստեղծված են անհրաժեշտ բոլոր պայմանները: Ըստ այդմ, օր առաջ պետք է բացենք այդ մանկապարտեզներն ու հնարավորություն տանք մեր երեխաներին հաճախել մանկապարտեզ»,- ընդգծել է Տարոն Մարգարյանն ու հանձնարարել պատասխանատուներին մեկ անգամ ևս տեղում գույքագրել մասնավորապես թիվ 1 մանկապարտեզում առկա անհրաժեշտ գույքն ու, անհրաժեշտության դեպքում, այն լրացնել:
.gif)
