Հուլիսի առաջին տասնօրյակում ԱՄՆ-ում ՀՀ դեսպանություն են այցելել ամերիկահայ կազմակերպություններում վերապատրաստում անցնող ուսանողական խմբեր: ԱՄՆ-ում ՀՀ դեսպան Թաթուլ Մարգարյանը հուլիսի 2-ին ընդունել է Ամերիկայի հայկական համագումարի, հուլիսի 7-ին` Նյու Յորքի Հայ դատի գրասենյակի և հուլիսի 10-ին` Ամերիկայի հայկական ազգային կոմիտեի փորձնակների խմբերին: Դեսպան Մարգարյանը ուսանողների համար դասախոսություն է կարդացել` նվիրված ՀՀ արտաքին քաղաքականության հիմնահարցերին, ինչպես նաև տարածաշրջանային ու միջազգային խնդիրներին: Փորձնակների խնդրանքով նա ներկայացրել է արտաքին քաղաքականության մի շարք գերակա ուղղություններում ՀՀ դիրքորոշումը և պատասխանել բազմաթիվ հարցերի: ՀՀ ԱԳՆ մամլո գրասենյակից armlur .am-ին հայտնում են, որ ունկնդիրները նշել են, որ նման հանդիպումների անցկացումը կարևոր է տարբեր խնդրահարույց հարցերի շուրջ քննարկումների ժամանակ հայկական կողմի մոտեցումները ճիշտ ներկայացնելու համար: Ամերիկահայ կազմակերպություններում վերապատրաստում անցնող ուսանողական խմբերի համար դասախոսությունները ԱՄՆ-ում ՀՀ դեսպանությունում ավանդական բնույթ են կրում: Դրանք, որպես կանոն, ներառվում են խմբերի վերապատրաստման ծրագրերի մեջ:
.gif)
