Կառավարության այսօրվա նիստին հավանության արժանացավ «Շահութահարկի մասին» ՀՀ օրենքում փոփոխություններ կատարելու հարցը:
Ըստ այդ փոփոխությունների արտահանող կազմակերպությունների շահութահարկը նվազեցվելու է 10 անգամ՝ ներկայումս գործող 20%-ի փոխարեն սահմանելով 2% և այն վերաբերում է բացառապես դրսից կատարվող ներդրումներին: Այսօր լրագրողների հետ զրույցում այս մասին նշեց ՀՀ ֆինանսների փոխնախարար Վախթանգ Միրումյանը՝ հավելելով, որ ցանկացողները պետք է գան Հայաստան, ներդրումներ անեն և ստեղծված արդյունքը արտահանեն ՀՀ-ից դուրս:
Վախթանգ Միրումյանն ընդգծեց, որ օրենքի փոփոխությունը չի վերաբերելու հանքարդյունաբերողներին:
«Մենք հանքարդյունաբերության շահութահարկից չենք կարող հրաժարվել բնականաբար: Այս պահին գործող ընկերություններից հանքարդյունաբերության ոլորտի մեկ ընկերություն է, որ ունի նման ծավալի արտահանում, բայց օրենքով բացառություն է նախատեսված»,-ասաց նա:
Փոխնախարարը նաև նշեց, որ նախնական բանակցություններ են տարվում օտարերկրյա ձեռնարկությունների հետ:
.gif)
