«ՄԵՆՔ ԱՅԼԵՎՍ ՉԵՆՔ ԿԱՐՈՂ ՊԱՏԱՆԴ ՄՆԱԼ»

Հունվարի 15-ին` Գյումրիում սպանված Ավետիսյանների հուղարկավորության օրը, ՀՀ գլխավոր դատախազ Գեւորգ Կոստանյանը Շիրակի մարզի դատախազության շենքի դիմաց, պատասխանելով Վ. Պերմյակովին ՀՀ արդարադատությանը հանձնելու` գյումրեցիների պահանջին, հայտարարել էր. «Ես` որպես գլխավոր դատախազ, տղամարդավարի ձեզ ասում եմ, որ այս պահանջով միանշանակ դիմելու եմ ՌԴ գլխավոր դատախազին»:

Սակայն ՀՀ գլխավոր դատախազությունից «Ժողովուրդ»-ը տեղեկացավ, որ ՀՀ գլխավոր դատախազը ՌԴ իր գործընկերոջը կդիմի այն ժամանակ, երբ նախաքննության ընթացքում ինչ-որ խնդիրներ առաջանան, իսկ մինչ այդ նա չի պատրաստվում նամակ գրել: Այսինքն` ստացվում է, որ Գ. Կոստանյանը հունվարի 15-ին այդ հայտարարությունն արել էր` պարզապես վրդովված գյումրեցիներին «հանդարտեցնելու» համար:
Նշենք, որ այդ օրը Գ. Կոստանյանի հայտարարությունից հետո Շիրակի թեմի առաջնորդ Միքայել եպիսկոպոս Աջապահյանը ժողովրդին հորդորեց տուն գնալ ու սպասել գլխավոր դատախազի գործողություններին՝ հակառակ դեպքում զգուշացնելով, որ նրանք արդեն ազգովի ոտքի կկանգնեն: Երեկ «Ժողովուրդ»-ը զրուցել է Շիրակի թեմի առաջնորդ Միքայել եպիսկոպոս Աջապահյանի հետ` պարզելու համար, թե ինչպես են իրենք վարվելու այժմ, երբ հայտնի է դարձել, որ Գ. Կոստանյանը որոշել է նամակ չգրել ՌԴ գլխավոր դատախազին:
-Սրբազա՛ն, ՀՀ գլխավոր դատախազ Գեւորգ Կոստանյանը, կարելի է ասել, հրաժարվել է նամակով դիմել ՌԴ գլխավոր դատախազին, որպեսզի գյումրեցի ընտանիքի սպանության մեջ մեղադրվող ՌԴ զինծառայողը ՀՀ օրենսդրությամբ դատապարտվի: Ի՞նչ պետք է անել այս դեպքում, քանի որ Ձեր հորդորով եւ Գ. Կոստանյանի խոսքին հավատալով են գյումրեցիները «լռել»:
-Ազգը պետք է որոշի, թե ինչ է անում, իսկ ո՞վ է որոշում՝ ժողովուրդը: Անշուշտ, միշտ էլ Գյումրին անկանխատեսելի է եղել, առավելեւս` հիմա:
-Այդ դեպքում ի՞նչ պետք է արվի, որպեսզի…
-Դրա համար ամբաղ-զամբաղ հայտարարություններ չպետք է արվեին ոչ մեկի կողմից, կրակի վրա չպետք է յուղ լցվի:
-Իսկ եթե գյումրեցիները կրկին փողոց դուրս գան, կրկին բողոքի ակցիաներով հանդես գան, պատրաստ ե՞ք նրանց կրկին հանդարտեցնել եւ տուն ուղարկել:
-Դա իմ ժողովուրդն է, եթե իմ ժողովուրդը պետք է լսի, ուրեմն կլսի, եթե չէ, ուրեմն չի լսելու, ես ի՞նչ ասեմ: Համենայնդեպս, ես իր պահանջը հասկանում եմ ու ես իր պահանջը կիսում եմ ինչպես միշտ, ես դա ասել եմ, բայց նաեւ պետք չի այդ պահանջին հասնել արյունահեղությամբ: Մեր արյունը չափազանց թանկ է, որ ինչ-որ մի վիժվածքի հանձնելու կամ չհանձնելու համար այն թափենք: Ես չեմ կարող հավիտյան շանթարգել լինել, ես այստեղ շանթարգել չեմ աշխատում: Ժողովրդի պահանջը մեծ չի, ես դրա համար հազար անգամ ասել եմ, ռուսական կողմին էլ եմ ասել: Ժողովուրդն ասում է՝ հանձնեք Հայաստանի արդարադատությանը, ու եթե դա լինի, քաղաքը կհանդարտվի: Ինչո՞ւ չեն անում դա, ես չեմ կարողանում հասկանալ, չեմ կարողանում ըմբռնել: Եղածը մի մեծ բան չի, չգիտեմ, թե ինչո՞ւ այդ քաղաքական կամքը չկա ոչ մի կողմում, որպեսզի այդ հարցը լուծվի: Թեկուզեւ` Սահմանադրության ինչ-որ մի սողանցքով, ինչ-որ մի խախտմամբ: Վերջ ի վերջո, օրենքն է մարդու համար, եւ ոչ թե մարդն է օրենքի համար:
-Գուցե՞ ՀՀ իշխանության ներկայացուցիչներն են մեղավոր, որ մենք այսօր այս պատկերն ունենք, կարելի՞ է ասել, որ նրանց անգործության հետեւանքով է, որ այսօր հանցագործը ՀՀ արդարադատությանը չի հանձնվում:
-Եթե անգամ մերոնք ջանք չեն թափում դրա համար, թող ռուսները հասկանան իրավիճակը ու ճիշտ եզրակացություն կատարեն, հիմա մենք կրակը չե՞նք ընկել երկուսի ձեռքում էլ: Էս ժողովուրդը հո պատանդ չի՞, կարո՞ղ է Գյումրիի ժողովուրդը պատանդ է՝ այս թվացյալ հայ-ռուսական բարեկամությունը պահպանելու համար: Պատանդ ե՞նք մենք: Ախր մեր իշխանություններից որեւէ բան չենք էլ լսում, որ իմանանք… չենք էլ իմանում՝ ի՞նչ են մտածում այս ուղղությամբ: Երեւի ամեն ինչ կոտրել են գլխավոր դատախազի վրա, գլխավոր դատախազն էլ հազիվ այդքան կարող է անել:
-Իսկ Դուք այս հարցի հանգուցալուծումն ինչպե՞ս եք տեսնում:
-Չգիտեմ, չեմ կարող ասել, համենայնդեպս, Աստված մի արասցե, որեւիցե արյունահեղություն, որեւիցե մեկի կողմից:
-Մտավախություն չունե՞ք, որ ժողովուրդը կարող է նաեւ Ձեզանից «երես թեքել» այն բանի համար, որ հավատալով Ձեր խոսքին, հետեւելով Ձեր հորդորներին` մարդիկ գնացին տուն, մինչդեռ պարզվեց, որ դրանից հետո որեւէ բան չի փոխվել, եւ որեւէ հարց չի լուծվել:
-Անշուշտ, անշուշտ, դե, հնարավոր է, բայց իմ հիմնական խնդիրը արյունահեղությունը կանխելն է եղել, ու անկախ մեղադրանքներից՝ ես ուրախ կլինեմ մեղադրանքներով հանդերձ արյունահեղությունը կանխվի: Թող ինձ մեղադրեն, բայց արյունահեղություն չլինի: Ես դարձյալ ասում եմ՝ ժողովրդի պահանջը շատ արդարացի պահանջ է՝ այդ վիժվածքին հանձնելը, բայց պետք չէ արյունահեղություն այդ վիժվածքի համար, հավելյալ արյուն պետք չի, մեր արյունը շատ թանկ եմ գնահատում ես: Եթե մեր իշխանություններն ի վիճակի չեն այդ վիժվածքին պահանջելու եւ վերցնելու… Ի՞նչ ասեմ, թող գնա, սատկի այդ ռազմաբազայում էդ վիժվածքն էլ… իր ամեն ինչն էլ… Բայց մենք այլեւս պատանդի դերում չենք կարող մնալ:

 
«ԿՆԵՐԵՔ, ՈՐ ՉԵՄ ԳՆԱՑԵԼ ՆԿԱՐՎԵԼՈՒ»

Շիրակի մարզպետ Ֆելիքս Ցոլակյանը «Ժողովուրդ»-ի հետ զրույցում հայտարարեց, որ հունվարի 15-ին Գյումրիում տեղի ունեցած բախումների ժամանակ ինքը եղել է այնտեղ, որտեղ պետք է լիներ:

-Պարո՛ն Ցոլակյան, հունվարի 15-ին Գյումրիում լարված իրավիճակ էր. ժողովուրդը փողոց էր դուրս եկել ու արդարություն էր պահանջում: Այդ օրը բախումներ եղան ոստիկանության եւ գյումրեցիների միջեւ: Որտե՞ղ էիք Դուք, ինչո՞ւ ժողովրդի կողքին չէիք:
-Ես ժողովրդի կողքին եմ եղել, ես կազմակերպչական աշխատանքներով էի զբաղված. այդ ժամանակ լուրջ կազմակերպչական աշխատանքներ կային: Ես կապի մեջ էի ռուսական բազայի հետ, ես կապի մեջ էի ռուս սահմանապահների հետ, հյուպատոսության հետ եւ այլն, եւ այլն: Իմ այստեղից բացակայելը շատ վատ բան կլիներ, ես աշխատանքի մեջ եմ եղել, զբաղված եմ եղել իմ աշխատանքով: Ինչը ինձ է օրենքով վերապահված, ես այդ բոլոր աշխատանքները կատարել եմ: Կներեք, որ չեմ գնացել նկարվելու:
-Բայց, օրինակ, ՀՀ գլխավոր դատախազը, ԱԺ պատգամավոր Մարտուն Գրիգորյանը, Շիրակի թեմի առաջնորդ Մեսրոպ արքեպիսկոպոս Աջապահյանը ժողովրդի մոտ էին, նրանք ժողովրդի հետ անմիջական կապի մեջ էին եւ, մասնավորապես, Սրբազանին հաջողվեց հանդարտեցնել պայթյունավտանգ իրավիճակը: Հիմա Ձեր խոսքից ստացվում է, որ այդ մարդիկ, ովքեր փորձում էին հասկանալ եւ հանդարտեցնել ժողովրդին, նկարվելո՞ւ էին գնացել:
-Ես իրենց հետ կապի մեջ եմ եղել՝ ե՛ւ եկեղեցու առաջնորդի, ե՛ւ պատգամավոր Մարտուն Գրիգորյանի հետ, ե՛ւ բոլոր այն մարդկանց հետ, որոնք այնտեղ խոսել են: Դրանք միասին պայմանավորված քայլեր են եղել, ես այլ բացատրություն չեմ կարող տալ:
-Այսինքն՝ նշված մարդիկ ավելի մեծ ազդեցություն ունեն, քա՞ն Դուք, գուցե եթե նաեւ Դուք գնայիք այնտեղ, ավելի ճիշտ կլինե՞ր:
-Կարող է՝ այո, կարող է՝ հակառակը լիներ:
-Իսկ եթե գնայիք, Ձեր խոսքը կլսեի՞ն գյումրեցիները:
-Կարող է՝ այո, կարող է՝ ոչ: Ճիշտ եմ համարել, որ այն մարդիկ գնան, որոնք որ գնացել են:
-Մարտուն Գրիգորյանին ավելի կլսեին…
-Ես այդպիսի բան չասացի, ես ասացի, որ նպատակահարմար ենք գտել, որ այդպես լիներ, երբ որ իրավական հարց է լինում, պետք է իրավական պատասխան հնչի: Եւ դրա համար դատախազն էր գնացել: Այստեղ հարցն ուրիշ էր, ժողովուրդն իրավական հարցի պատասխան էր ուզում լսել, ուրիշ ոչ մի բան չկար: Իսկ եկեղեցու առաջնորդը խնդրեց, որպեսզի չգնան այլ քայլերի, ուրիշ բան չկա: Ես ամեն ինչ արել եմ, որպեսզի խուսափենք վատ երեւույթներից: Ես դատախազություն էլ եմ գնացել, միտինգավորների մոտ էլ եմ եղել: Առաջին միտինգը եղել է հենց մարզպետարանի առաջ, որի ժամանակ ես դուրս եմ եկել ու զրուցել եմ նրանց հետ:
-Ի՞նչ եք կարծում՝ գյումրեցիները գոհ են իրենց մարզպետի պահվածքից:
-Ես գտնում եմ, որ ես ճիշտ եմ արել ամեն ինչ, ինձ հետ չեն թշնամանա, արխային, իմ մասին մի՛ մտածեք: Ամեն ինչ նորմալ եմ համարում:

Նյութերը՝ ՍՈՆԱ ԳՐԻԳՈՐՅԱՆԻ

 
ՄԻԱՅՆ ԹԵ ՉՄԱՀԱՆԱ
«Ժողովուրդ» օրաթերթի գլխավոր խմբագիր Թագուհի Թովմասյանը, անդրադառնալով Գյումրիում կատարված ոճրագործության բացահայտմանը, համացանցի իր էջում գրել է. «Մեկ շաբաթ իր կյանքի համար փակ աչքերով կռիվ տված փոքրիկ Սերյոժայի մահը ավելին էր, քան ցավը, որ այսօր զգում է յուրաքանչյուր բանական մարդ: Էմոցիաներն այնքան են խեղդում մեզ, որ կարծիքներ են հնչում, թե այդ ոճրագործին պետք է պարզապես բաց թողնել Գյումրիում կամ գնդակահարել…… Կարծում եմ, որ այսօր միակ սփոփանքը մեզ համար Ավետիսյանների ընտանիքի հիշատակի առաջ այն կլինի, որ իմանանք այդ մութ պատմության ողջ մանրամասները: Վալերի Պերմյակովը մեզ ողջ է պետք. նա շատ բաներ կունենա պատմելու, նրան շատ հարցեր կան տալու: Այնպես որ, եթե Պերմյակովին Գյումրու 102-րդ ռազմաբազայում որեւէ բան պատահի. օրինակ` սավանի միջոցով հանկարծ ինքնասպան լինի կամ էլեկտրահարվի, չենք հավատալու այդ վարկածին… Ճշմարտությունն ամենաթանկն է»:

ՆԱԽԱԶԳՈՒՇԱՑՈՒՄ
ՀՀ հանրային ծառայությունները կարգավորող հանձնաժողովը վաղը կայանալիք նիստում ի թիվս այլ հարցերի կքննարկի նաեւ «Արփա-Էներգիա» ընկերությանը նախազգուշացնելու մասին որոշման նախագիծը: «Արփա-Էներգիա» ՍՊԸ-ն այս տարվա հունվարի 13-ին հայտ է ներկայացրելՀԾԿ հանձնաժողովին եւ խնդրել երկարաձգել «Արփա» փոքր հիդրոէլեկտրակայանում էլեկտրական էներգիայի արտադրության լիցենզիայի ժամկետը: Բայց քանի որ համապատասխան դիմումը օրենսդրությամբ սահմանված ժամկետից վեց օր ուշ է ներկայացվել, ուստի, ՀԾԿՀ-ն քննարկելու է ընկերությանը նախազգուշացնելու եւ բանկային երաշխիք հանդիսացող մեկ մլն 850 հազար դրամից 925 հազար դրամը պետական բյուջե փոխանցելու հարցը: Ի դեպ, լիցենզիայի ժամկետն էլ այնուամենայնիվ կերկարացվի մինչեւ այս տարվա հուլիսի 26-ը:

42 ԱՊՊԱ
Երեւանի քաղաքապետարանը «Ինգո Արմենիայի» հետ կնքած պայմանագրով ապահովագրել (ԱՊՊԱ) է 42 մարդատար ավտոմեքենա: Ապահովագրվող մեքենաների ցանկում կան «Հունդաի», «Նիսան», «Կիա», «Մազդա» եւ այլ մակնիշի մեքենաներ: Ավտոտրանսպորտային միջոցների պարտադիր ապահովագրական ծառայության համար քաղաքապետարանը քաղաքային բյուջեից ծախսել է 1 մլն 523 հազար 730 դրամ:

ՎԵՐՍԿՍՎԵԼ Է
«Տոնուս» ՍՊԸ-ի սնանկացման մասին դատական գործընթացը վերսկսվել է. երեկ տեղի է ունեցել դատական առաջին նիստը: Նշենք, որ «Տոնուս» ՍՊԸ-ի սնանկության գործով պահանջների վերջնական ցուցակը հաստատելու քննարկումը վերսկսելու մասին «Արցախբանկ»-ի ներկայացուցիչ Զ. Ավետիքյանի միջնորդությունը բավարարվել է: «Ժողովուրդ»-ը տեղեկացավ, որ քննարկվել են նախնական ցուցակում ընդգրկված պարտատերերի ներկայացված պահանջների վերաբերյալ առարկությունները, միջնորդությունները: Հիշեցնենք, որ «Տոնուս»-ը հիմնականում զբաղվել է բնակելի եւ այլ նշանակության շենքերի կառուցման աշխատանքներով: