Ազգային ժողովը շրջանառության մեջ է դրել ԱԺ «Ժառանգություն» խմբակցության անդամ Զարուհի Փոստանջյանի՝ «2015թ. հունվարի 12-ին Գյումրիում տեղի ունեցած դաժան սպանությունների կապակցությամբ» նախագիծը:
Ըստ Զ. Փոստանջյանի առաջարկած նախագծի` պետք է ամրագրվի, որ «ՌԴ ԱԴԾ սահմանապահ կառավարման ղեկավար մարմինների կողմից ՀՀ սահմանը խախտող անձի փոխանցումը 102-րդ ռազմաբազայի ղեկավարությանը խախտում է ՀՀ Սահմանադրությունը, ՀՀ քրեական եւ քրեական դատավարության օրենսգրքերի եւ «ՀՀ տարածքում տեղակայված ռուսաստանյան սահմանապահ զորքերի կարգավիճակի եւ դրանց գործունեության պայմանների մասին» եւ «ՀՀ տարածքում ռուսաստանյան ռազմաբազայի մասին» ՀՀ եւ ՌԴ միջեւ կնքված պայմանագրերը»:
«ՀՀ ԱԺ-ն հետամուտ է լինելու եղեռնագործության բացահայտմանը, ակնկալում է հանուն արդարության, օրինականության վերականգնման եւ հայ-ռուսական ռազմավարական դաշնակցության Ռուսաստանի Դաշնությունից ողջամիտ որոշում՝ ՀՀ քաղաքացիների օրինական պահանջը բավարարելու համար առանձնապես ծանր հանցագործության մեջ մեղադրվող Վալերի Պերմյակովին անհապաղ փոխանցել ՀՀ իշխանություններին»,-նշված է փաստաթղթում:
«Ժողովուրդ»-ը զրուցել է ԱԺ ՀՀԿ խմբակցության անդամ, գյումրեցի Սուքիաս Ավետիսյանի հետ՝ պարզելու համար, թե արդյո՞ք նա կողմնակից է նման նախագծի ընդունմանը:
-Պարո՛ն Ավետիսյան, ԱԺ «Ժառանգություն» խմբակցության անդամ Զարուհի Փոստանջյանը հանդես է եկել օրենսդրական նախագծով` կապված Գյումրիում կատարված ոճրագործության բացահայտնամ հետ: Ինչպե՞ս եք գնահատում նման նախաձեռնությունն ու ինչ տեսակետ ունեք կոնկրետ նախագծի վերաբերյալ:
-Ես նախ պետք է տեսնեմ նախագիծը, հետո ասեմ, որովհետեւ անցած օրը մենք Ազգային ժողովի քննարկումների ժամանակ բարձացրել ենք խնդիրներ, հարցադրումներ, նաեւ այն ժամանակ, երբ ՌԴ Պետդումայի պատգամավորներն էին Գյումրի եկել, մենք այդ թեմայի շուրջ խոսել ենք նաեւ նրանց հետ: Ես պետք է ծանոթանամ նախագծին, նոր: Բայց խնդիրներ կան, մտահոգություններ կան, որոնք մենք էլ ենք բարձրացրել խորհրդարանական լսումների ժամանակ ու նաեւ Պետդումայի պատգամավորների հետ հանդիպման ընթացքում:
-Բայց Դուք համաձա՞յն եք այն տեսակետի հետ, որ ՀՀ սահմանը խախտել փորձող անձի փոխանցումը 102-րդ ռազմաբազայի ղեկավարությանը խախտում է ՀՀ Սահմանադրությունը, ՀՀ քրեական եւ քրեական դատավարության օրենսգրքերը:
-Այստեղ Սահմանադրության կամ օրենսդրության խախտման խնդիր չկա, այստեղ միակ խնդիրը կարող է լինել Ռուսաստանից սահմանապահ զորքերի եւ Հայաստանի միջեւ կնքված պայմանագրի որոշ կետերի խախտումը, այն էլ պետք է ցույց տա քննության արդյունքը: Այժմ որեւէ մեկը որեւիցե բան չի կարող ասել, որովհետեւ այժմ կոնկրետ բան չկա: Իսկ ինչից է գալիս այդ խոսակցությունը, որ սահմանապահ զորքերը, իրենք հայտնաբերելով, հայտնել են ռուսական կողմին… այս խնդիրն է, որը պետք է հստակեցվի ու ներկայացվի, թե ինչ հանգամանքներ են եղել:
-Իսկ ՌԴ Պետդումայի պատգամավորների հետ հանդիպումից հետո կոնկրետ ի՞նչ քայլեր են մշակվել: Կա՞ կոնկրետ պայմանավորվածություն, որով համատեղ աշխատելու եք՝ գործի բացահայտմանը օգնելու համար:
-Համատեղ որոշում, որպես այդպիսին, չի եղել, չենք էլ կարող կայացնել, որովհետեւ այդ քրեական գործով պատգամավորները որոշում կայացնող չեն, բայց եթե նայեք, իրենք իրենց հարցազրույցներում ասել են, որ մենք էլ ամեն ինչ կանենք, որպեսզի քննության ընթացքում հայկական կողմը իրականացնի ամբողջ գործընթացը: Իրենք նշել են նաեւ, որ իրենք իրենց ղեկավարությանը տեղյակ կպահեն, որ այսպիսի պահանջ կա, այսպիսի խնդիր կա: Հիմա կտեսնենք ընթացքը ոնց կլինի:
-Հայաստանի քաղաքացիների ու գյումրեցիների պահանջը մեկն է՝ Վալերի Պերմյակովին հանձնել ՀՀ արդարադատությանը: ՌԴ Պետդումայի ներկայացուցիչները համաձա՞յն են այդ պահանջի հետ:
-Պետդումայի պատգամավորները չեն հերքել, որ կարող է նաեւ այդպես լինի, իրենք նաեւ իրենց հարցազրույցներում հստակ ասել են, որ չի բացառվում, որ, այո՛, հետագայում այդ տականքը հանձնվի Հայաստանի իրավապահ մարմիններին:
-Իսկ Դուք, լինելով գյումրեցի ու գյումրեցիների ներկայացուցիչը ՀՀ խորհրդարանում, ի՞նչ եք պատրաստվում անել, արդյո՞ք ինչ-որ նախագծով ձեռնամուխ կլինեք, որպեսզի վերը նշված պահանջն իրագործվի, եւ Գյումրիի ողբերգական դեպքերը լիարժեք բացահայտվեն:
-Ես գիտեմ՝ որտեղ պետք է ակտիվ լինեմ ու ինչ պետք է անեմ: Եթե ես ձեռնամուխ չլինեի, ես չէի հանդիպի մարդկանց հետ, պատվիրակության հետ չէի զրուցի, եթե հանդիպում ենք, քննարկում ենք, նշանակում է՝ մենք էլ ենք ուզում, չէ՞: Ո՞ր պատգամավորը, հատկապես գյումրեցին, չի ուզի, որ այդ դեպքերը շուտ բացահայտվեն, ու այդ տականքն իր պատիժը կրի, ու, ի վերջո, պարզ դառնան այդ դաժան սպանության դրդապատճառները:
Է. ՆԱԼԲԱՆԴՅԱՆԸ «ԶԱՆԳ Է ԿԱԽՈՒՄ», ԲԱՅՑ ԱՆԱՐԴՅՈՒՆՔ
Երեկ, ի վերջո, ՀՀ արտաքին գործերի նախարար Էդվարդ Նալբանդյանը անփոփեց 2014 թվականը, որից հետո պատասխանեց հերթագրված լրագրողների հարցերին: Ասուլիսի մեկնարկից անմիջապես հետո պարզվեց, որ Է. Նալբանդյանի մամլո խոսնակ Տիգրան Բալայանն արդեն ունի լրագրողների այն «ցուցակը», ովքեր հերթագրվել են նախարարին հարց ուղղելու համար:
Նախ լրագրողները Է. Նալբանդյանից փորձեցին պարզել, թե ինչո՞ւ ՀՀ ԱԳՆ-ն ադրբեջանական սադրանքներին միշտ չի արձագանքում: Սակայն նախարարը շատ վստահ հայտնեց, որ իրենք ժամանակին արձագանքում են. «Դա կարող է լինել հրապարակավ հայտարարությամբ, կամ կարող է այդ արձագանքը լինել դիվանագիտական հանդիպումների, հեռախոսազրույցների ժամանակ: Դա աշխատանքային գործընթաց է, որը ոչ միշտ է լուսաբանում պահանջում: Ես թիվը չեմ հիշում, բայց վերջին ամիսների ընթացքում առնվազն մի քանի տասնյակից ավել նման արձագանք է եղել: Արտգործնախարարությունն անում է բոլոր անհրաժեշտ գործողությունները: Իհարկե, ոմանք դրա տակ պատկերացնում են աղմուկ, ոմանք համապատասխան հետեւողական աշխատաք: Եթե այստեղ հարցը ճառ ասելու թե զանգ կախելու մասին է, ապա ես նախընտրում եմ երկրորդը»:
Անդրադառնալով Ադրբեջանի ղեկավարության ադեկվատությանն ու իրավիճակը սթափ գնահատելու կարողությանը՝ ՀՀ ԱԳ նախարարը նկատեց. «Դուք կարծում եք, թե օդի՞ց է, որ համանախագահող երկրները նախագահների մասնակցությամբ հանդիպումներ կազմակերպեցին»: Լրագրողները փորձեցին նախարարից տեղեկանալ նաեւ՝ արդյո՞ք վերջին շրջանում Ադրբեջանի կողմից հրադադարի ռեժիմի շարունակական խախտման եւ դիվերսիոն հարձակումների կապակցությամբ ՀՀ ԱԳՆ-ն դիմել է ՀԱՊԿ-ին, ԵԱՀԿ Մինսկի խմբի համանախագահներին, եւ եթե այո, ի՞նչ են նրանք պատասխանել: Նախարարը հայտարարեց, որ ՀԱՊԿ-ին, ԵԱՀԿ-ին եւ ՄԱԿ-ի տարբեր կառույցներին հայկական կողմը տեղեկացրել է: Նա ընդգծեց, որ իրենք անհապաղ տեղեկացնում են բոլոր կառույցներին, երբ ոտնձգություն է լինում շփման գծում: Իսկ ինչ վերաբերում է արդյունքներին, Է. Նալբանդյանը հայտարարեց, թե ՀԱՊԿ-ն բազմանդամ կառույց է. «Պետք չէ պարզունակ վերաբերվել, որ մենք դիմեցինք, իրենք արձագանքեցին կամ ոչ: Տասնյակ սադրանքներ են լինում, եթե ամեն տասնյակ սադրանքին ի պատասխան հայտարարություն արվի…»:
Անդրադառնալով հարցադրմանը, թե արտաքին քաղաքականության բազմաթիվ ձախողումների, այդ թվում եւ` ղարաբաղյան հակամարտության պարբերական սրացումների ընթացքում ԱԳՆ-ի ոչ բավարար աշխատանքի համար հանրությունը մեղադրում է անձամբ ԱԳ նախարարին, չի՞ պատրաստվում արդյոք հրաժարական տալ, Նալբանդյանը հակադարձեց. «Միանգամայն սխալվում եք, ես գիտեմ հասարակության կարծիքը»:
Հ. Գ.«Ժողովուրդ»-ը հունվաի 24-ին հրապարակել էր այն հարցերը, որոնք անպատասխան էին մնացել, քանի որ այդ օրը նախարարը հրաժարվել էր ընդունել լրագրողներին, այդ թվում եւ՝ մեզ: Ցավոք, երեկ եւս դրանք անպատասխան մնացին, քանի որ ԱԳ նախարարի մամլո խոսնակ Տ. Բալայանը «Ժողովուրդ»-ի թղթակցին արգելեց մեկից ավել հարց ուղղել եւ մեր ձեռքից վերցրեց խոսափողը:
Նյութերը՝ ՍՈՆԱ ԳՐԻԳՈՐՅԱՆԻ
ԳՈՐԾԱԶՈՒՐԿ ՎԱՐՈՐԴՆԵՐՈՎ
Երեկ հայտնի դարձավ, որ Երեւանի քաղաքապետարանը որոշ երթուղիներում նկատվող ուղեւորահոսքի նվազումով պայմանավորված՝ դրանց գործունեությունը դադարեցրել է: Մասնավորապես դադարեցվել են թիվ 11, 15, 31, 51, 40, 30 ավտոբուսային երթուղիները: Այսպիսով՝ արհեստականորեն կծանրաբեռնվեն նույն հետագծով ընթացող մյուս երթուղիները: Պաշտոնապես ներկայացվում է, թե իբր այս քայլի նպատակը տրանսպորտի գործող 100 դրամ ուղեվարձի պահպանումն է: Բնականաբար, այս քայլի արդյունքում, հատկապես առավոտան եւ երեկոյան ժամերին, ուղեւորները ստիպված կլինեն երթեւեկել գերծանրաբեռնված տրանսպորտով: Նման հեռանկարը Երեւանի քաղաքապետարանին սակայն չի մտահոգում, որովհետեւ քաղաքապետարանի ո՛չ ղեկավար կազմը եւ ո՛չ անգամ աշխատակիցների մեծամասնությունը տրանսպորտով չի երթեւեկում: «Ժողովուրդ»-ին տեղեկություններ հասան, որ առաջիկայում կխոսվի նաեւ որոշ երթուղիների միավորման մասին, ինչի արդյունքում հնարավոր է՝ կրճատվեն վարորդները:
ՏՆՕՐԵՆ Է ՀԱՐԿԱՎՈՐ
«Ժողովուրդ»-ին հայտնի դարձավ, որ ՀՀ էներգետիկայի եւ բնական պաշարների նախարարությունը գլխավոր տնօրենների ընտրության մրցույթ է հայտարարել: Ըստ այդմ, գլխավոր տնօրենի թափուր պաշտոններ են առաջացել «Նաիրիտ-2» եւ «Բարձրավոլտ էլեկտրական ցանցեր» փակ բաժնետիրական ընկերություններում: «Նաիրիտ-2» ՓԲԸ-ի գլխավոր տնօրենի մրցույթը կկայանա այս տարվա մարտի 18-ին, իսկ «Բարձրավոլտ էլեկտրացանցեր» ՓԲԸ-ի գլխավոր տնօրենինը՝ մարտի 20-ին: Հիշեցնենք, որ նախորդ տարվա հուլիսի 24-ին Կառավարության որոշմամբ՝ «Նաիրիտ-2» ՓԲԸ-ի 46,73 տոկոս բաժնեմասը եւ Տեղ-Ստեփանակերտ գազատարը հանձնման-ընդունման ակտով հանձնվել է ՀՀ էներգետիկայի եւ բնական պաշարների նախարարության աշխատակազմին:
ԿԱՎԱՐՏԻ
ՀՀ հանրային ծառայությունները կարգավորող հանձնաժողովը «Արմենտել» ՓԲԸ-ից դեռեւս նախորդ տարի պահանջել էր մինչեւ 2015 թվականի սեպտեմբերի 3-ը ներկայացնել ՀՀ մարզերում CDMA տեխնոլոգիայի հեռախոսագծերի արդիականացման գործարար ծրագիր կամ ժամանակացույց: Այսպիսով՝ ընկերությունը նախատեսում է ՀՀ մարզերում կոդի բաժանմամբ բազմակի մուտքի (CDMA) անլար տեխնոլոգիայի հիման վրա գործող հեռախոսագծերն արդիականացնել միջազգային կիրառում ունեցող այնպիսի լուծմամբ, որը հնարավորություն կընձեռի նույն անլար եղանակով նշված վայրերում ապահովել լայնաշերտ ինտերնետ հասանելիության ծառայությունների մատուցումը: Այսօր ՀԾԿ հանձնաժողովը նախատեսում է քննարկել «ԱրմենՏելի» համապատասխան առաջարկը եւ դրան համաձայնություն տալ, որից հետո նշված ընկերությունը հնարավորություն կունենա ավարտել Հայաստանի բոլոր բնակավայրերը կապով, այդ թվում նաեւ՝ լայնաշերտ ինտերնետ հասանելիությամբ ապահովելու գործընթացը:
.gif)
