Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց Կաթողիկոսի օրհնությամբ Մայր Աթոռ Սուրբ Էջմիածնի Հրատարակչական բաժինը լույս է ընծայել երջանկահիշատակ Գարեգին Ա Ամենայն Հայոց Կաթողիկոսի «Քաղկեդոնի ժողովն ու Հայ Եկեղեցին» մենագրության ռուսերեն թարգմանությունը` կատարված Ե. Վ. Կարչագինի կողմից, և Ս. Արևշատյանի և Կ. Ա. Միրումյանի պատրաստած «Հայ միջնադարյան փիլիսոփայություն» ձեռնարկը:
Գարեգին Ա Հայրապետի «Քաղկեդոնի ժողովն ու Հայ Եկեղեցին» աստվածաբանական կարևորագույն ուսումնասիրությունը Քաղկեդոնի ժողովի (451 թ.) և հայկական ավանդության հետազոտության առումով պատմա-աստվածաբանական վերլուծության դիտանկյունից անդրանիկ փորձերից է և շահեկան է հատկապես պատմական ու աղբյուրագիտական համակողմանի քննության ու վերլուծության, ինչպես նաև քաղաքական, եկեղեցական ու աստվածաբանական փաստերի համակարգվածության տեսանկյունից:
«Հայ միջնադարյան փիլիսոփայություն» ձեռնարկն ստեղծվել է հեղինակների «Հայոց փիլիսոփայության պատմություն» աշխատության հիման վրա: Այստեղ փաստական հարուստ նյութի գիտատեսական և պատմաաստվածաբանական համակարգային վերլուծության և ընդհանրացման համատեքստում մեթոդաբանական նոր հայեցակարգի լույսի ներքո ներկայացված է հին և վաղ միջնադարյան հայոց փիլիսոփայությունը: Այս ուսումնաօժանդակ ձեռնարկի հրատարակությունը նվիրված է Գևորգյան հոգևոր ճեմարանի հիմնադրման 140-ամյակին:
Գրքերը տպագրվել են մեկենասությամբ «Սարգիս Գաբրիելյան» հիմնադրամի:
.gif)
