ՔԱՈՍ ԿԱՄ ՀԵՐՔՈՒՄԻ ՀԵՐՔՈՒՄ

Երեկ իշխանական  դաշտում կատարյալ քաոս էր. կոալիցիոն գործընկեր կուսակցությունների ղեկավարները իրար հետեւից իրարամերժ հայտարարություններ էին անում. Հեղինե Բիշարյանը հերքում էր Գալուստ Սահակյանին, նախագահի մամուլի խոսնակ Արմեն Արզումանյանը` Հեղինե Բիշարյանին, Հեղինե Բիշարյանը օրվա երկրորդ կեսին` ինքն իրեն,  Գալուստ Սահակյանն էլ`  իրեն ու իրեն:Հեղինե  Բիշարյանը երեկ առավոտյան հայտարարեց, որ այո,  երեկոյան սպասվում է  կոալիցիոն նիստ: Մինդեռ երկու «ճեպազրույց» այն կողմ լրագրողների  հետ հանդիպած  Գալուստ Սահակյանը  նման տեղեկություններ չուներ: Ասաց, որ հետախույզ չի, որ իմանա:  Օրվա երկրորդ կեսին  նախագահի  մամուլի խոսնակ Արմեն Արզումանյանը  հերքեց Բիշարյանին, ասելով, որ փետրվարի 11-ին կոալիցիոն նիստ նախատեսված չէ:  Իսկ մինչ այդ Հեղինե Բիշարյանն էր հասցրել  հերքել ինքն  իրեն` ասելով, որ նիստ չկա` առաջարկելով  հարցնել իմացողներից: Նույն բանն, ի դեպ, առաջարկեց Արմեն Արզումանյանը. «Ովքեր  հայտարարել  են,  նրանց էլ հարցրեք»: Հերքումները, ի դեպ, սկսվել էին դեռ նախօրեից, երբ Գալուստ Սահակյանը հայտարարեց, որ ինքը կոալիցիոն ոչ մի հուշագրի մասին չի խոսել`  ակնհայտորեն կառչելով հարցի ձեւական կողմին: Ի վերջո, ինչ տարբերություն, թուղթը, որ ուզում են ստորագրել տալ Գագիկ Ծառուկյանին, հուշագիր կկոչվի, թե ինչ: Այստեղ էլ ՕԵԿ խմբակցության ղեկավարը հերքեց ՀՀԿ խմբակցության ղեկավարին` ասելով, որ, այո, կոալիցիայի նիստին քննարկվել է մի հայտարարություն, որում խոսք է գնացել 2013-ին Սերժ Սարգսյանին պաշտպանելու մասին:  Ակնհայտ էր, որ կոալիցիոն գործընկերների հերքումները խաղի  չճշտված կանոններով են  պայմանավորված: Ինչի պատճառն էլ այն է, որ Սերժ Սարգսյանը, Գագիկ Ծառուկյանը եւ Արթուր Բաղդասարյանը նույնիսկ ամենամերձավոր թիմակիցներին հարկ չեն համարում տեղեկություն տալ: Ամեն դեպքում,  երեկ  վիճակն իսկապես  զավեշտական էր: Զուգահեռաբար,  ողջ քաղաքական դաշտում  մեկ հարց էր հնչում`  կստորագրի՞ Գագիկ Ծառուկյանը ըստ էության կոալիցիոն նոր հուշագիրը, թե` ոչ: Ինչ վերաբերում է  կոալիցիայում ԲՀԿ-ի մնալ-չմնալուն, ապա այն  շատերի համար այլես երկրորդական հարց էր համարվում. վստահ էին,  որ կմնա: Շատերի մոտ այս վստահությունը ձեւավորվել էր  ԲՀԿ համագումարի մասին Գագիկ Ծառուկյանի մամուլի խոսնակ Խաչիկ Գալստյանի «անոնսից», որ  սենսացիաներ չեն լինելու: «Շարունակելու ենք մեր կոալիցիոն պարտավորությունները մեր կոալիցիոն գործընկերների հետ համատեղ, լսվելու են ելույթներ, հաշվետվություններ: Արտառոց ոչինչ տեղի չի ունենալու»,-կարծես այսքանով ամեն ինչ ասված էր: ՀՀԿ-ին պատկանող «Հենարան» կայքին  տված հարցազրույցում Ծառուկյանի մամուլի խոսնակը նշել էր, որ  համագումարին հրավիրված չէ Ռոբերտ Քոչարյանը: Ի դեպ, ըստ որոշ աղբյուրների, վերջինիս հետ Գագիկ Ծառուկյանի հարաբերությունները լարվել են: Փոխարենը, հրավիրված են ԱԺ բոլոր խմբակցությունները: Եթե նկատի ունենանք, որ համագումարներին, որպես կանոն, հրավիրվում են առաջին-երկրորդ դեմքերը, չի բացառվում, որ ներկա լինի անձամբ  Սերժ Սարգսյանը:  Որոշ աղբյուրներ  չեն բացառում, որ ՀՀԿ նախագահը համագումարին հայտնվի վերջին պահին, այնպես, որ համագումարի մասնակիցները, ներառյալ նաեւ Գագիկ Ծառուկյանը, ոտքի կանգնեն: Այս սցանարով`  Ծառուկյանը կհայտարարի,  որ մնում է, ինչից հետո ելույթով հանդես կգա  Սերժ  Սարգսյանը, որն, ի դեպ, դեռ ՀՀԿ 20-ամյակի հոբելյանական միջոցառման ժամանակ  էր ասել, որ կոալցիոն գործընկերների առաջ վերջանգրեր չի դնում, այլ դնում է  պահանջներ:  Գուցե  կոալիցիայի փլուզման «չափազանցված» լուրերի  մեղքը կբարդվի մամուլի վրա, որ ուռճացրել, աղավաղել, այլասերել է եղելությունը եւ կամ ուզում է սեպ խրել իրենց միջեւ:  Եւ  բոլորը  «գոհ ու երջանիկ կլինեն»: Մյուս սցենարով, որն, ի դեպ, ԲՀԿ-ական շրջանականերից էր, կլինի սովորական համագումար, որի ընթացքում ոչ մի արտառոց հայտարարություն չի հնչի. Գագիկ Ծառուկյանը կասի, որ մնում է կոալիցիայում, սակայն չի էլ ասի, թե 2013-ին պաշտպանելու է  Սերժ Սարգսյանի թեկնածությունը:    Ամեն դեպքում, դեռ փետրվարի 10-ից մեզ հասած տեղեկություններով` ՀՀԿ-ի ու ԲՀԿ-ի միջեւ փնտրվում էին  փոխզիջումներ եւ ընթանում   պայմանավորվածություններ, որոնք հնարավոր է` վերաբերեն  Ծառուկյանի բիզնեսներին ու թիմակիցների չպատժվելուն: Ի դեպ, նրա քաղաքական թիմի անդամներից շատերը վերջին շրջանում խիստ անհանգստացած էին, թե առճակատման դեպքում Ծառուկյանը իրենց ոնց է պահելու: Զուտ տեսականորեն փոխզիջումը  կարող էր վերաբերել նրան, որ Գագիկ Ծառուկյանին, ով եթե հայտարարի, որ մնում է   կոալիցիայում,  թույլ կտրվի  «պահել դեմքը»: Այն է` չստորագրել այդ փաստաթուղթը: Բայց նաեւ  ակնհայտ է, որ այս թղթի տակ Ծառուկյանի ստորագրությունը Սերժ Սարգսյանին շատ է պետք, քանի որ մի բան է  բանավոր հայտարարությունը, մեկ այլ բան` թղթի վրայի ստորագրությունը: Բարաթը: Ուստի, եթե Գագիկ Ծառուկյանը այնուամենայնիվ բանավոր հայտարարի, որ պաշտպանելու է  Սերժ Սարգսյանին, ապա ստիպված կլինի դա անել  նաեւ գրավոր: Ընդ որում, արդեն հաջորդ շաբաթվա մեջ: ԱՆՈՒՇ ԴԱՇՏԵՆՑ