ԱՐՑԱԽՆ ԱՊԱՑՈՒՑԵՑ, ՈՐ ԿԱՐՈՂ Է

Արցախում կայացան նախագահական ընտրություններ, որոնք միջազգային տարբեր դիտորդների կողմից համարվեցին արդար եւ թափանցիկ: Բնականաբար, Հայաստանից մեկնած դիտորդական խումբն էլ արձանագրեց, որ Արցախում կայացան ամենաժողովրդավարական ընտրությունները:

ՀԱՐՑ. Ձեր կարծիքով՝ իսկապե՞ս ԼՂՀ նախագահի ընտրություններն անցան առանց էական խախտումների, թե՞ պարզապես մեր «թշնամու ջրաղացին ջուր չլցնելու համար» բոլորը միաբերան հայտարարեցին, որ Արցախը ժողովրդավար երկիր է:

ՊԱՏԱՍԽԱՆ. Ինքս երկրում չեմ եղել, հեռվից եմ հետեւել ընտրությունների ընթացքին: Ծանոթ եմ միայն ընդդիմադիր թեկնածուի հայտարարությանը եւ կարծում եմ, որ անցել են իսկապես նորմալ պայմաններում:

ՊԱՏԱՍԽԱՆ. Գիտեք, ես  արդար, թափանցիկ բառերը, ընտրությունների հետ կապված, դժվարությամբ եմ օգտագործում: Ուղղակի սա այն դեպքն է, երբ մեր պատվիրակությունը, որի կազմի մեջ կային նաեւ ընդդիմության ներկայացուցիչներ, ինչպես նաեւ միջազգային դիտորդական խումբը, արձանագրեց, որ ԼՂՀ-ի ընտրություններն անցան շատ կազմակերպված, գրագետ ու արդար: Եթե ընտրություններն անցած լինեին խախտումներով, ապա հնարավոր չէր լինի այդ ամենը կոծկել:

ՊԱՏԱՍԽԱՆ. Ես ընտրություններին դիտորդի կարգավիճակով չեմ մասնակցել, բայց որեւէ հիմք չունեմ չհավատալու խորհրդարանից մեկնած մեր պատվիրակությանը եւ, ընդհանրապես,  միջազգային դիտորդների, կազմակերպությունների այն պնդմանը որ ընտրություններն անցել են ժողովրդավարական չափորոշիչներին համապատասխան: Ես այդ արդյունքն եմ համարում կարեւոր «կռան» Լեռնային Ղարաբաղի բանակցային գործընթացի համար: Արցախը եւս մեկ անգամ ապացուցեց միջազգային հանրությանը, որ կարող է ժողովրդավարական չափանիշներին համապատասխան ընտրություններ անցկացնել, այնպիսի ընտրություններ, որ անգամ ունակ չեն անցկացնելու տարածաշրջանի այլ երկրներ: Վիճակագրական տվյալներով՝ Ադրբեջանը համարվում է ոչ ազատ երկիր, եւ սա կարեւոր «կռան» պետք  է լինի մեզ համար՝ ասելու, թե այդ ինչպես է, որ Ղարաբաղը պետք է միանա մի երկրի, որն ամեն տարի համարվում է ոչ ազատ: Մենք` միջազգային պատվիրակության պատգամավորներս, պետք է այս փաստը՝ որպես մեծ ազդակ, ներկայացնենք միջազգային հարթակներում: