Հիտլերն էլ էր բավականին զարգացած, ինտելեկտով օժտված. Տիգրան Ուրիխանյանը` Սերժ Սարգսյանի հայտարարության մասին

Armlur.am-ն արդեն հայտնել էր, որ ՀՀ նախագահ, ՀՀԿ նախագահ Սերժ Սարգսյանը ԲՀԿ առաջնորդ Գագիկ Ծառուկյանին հանել է ԱԱԽ-ի անդամությունից: Ավելին` երկրի ղեկավարը րոպեներ առաջ ՀՀԿ խորհրդի նիստում հանդես է եկել նման հայտարարությամբ. «Մենք անկեղծորեն տրամադրվել էինք գործադիր մարմնի նիստում քննարկել Գագիկ Ծառուկյանի վերջին ելույթը և պաշտոնապես արձա­գանքել դրան. ճիշտ այնպես, ինչպես մշտապես արձագանքում ենք քաղաքական դաշտի բոլոր հայտնի դերակատարների հրապարակային խոսքերին ու հայտարարություններին, որոնք առնչվում են մեզ: Ցավով պիտի արձա­նագրեմ, որ քննարկման ընթացքում, սակայն, գրեթե անդ­րադարձ չեղավ այդ ելույթին:

Առաջին հայացքից սա տարա­կուսանք կարող է առա­ջաց­նել, մինչդեռ բացատրությունն իրականում շատ պարզ է. քննարկելու իմաստը ո՞րն է: Ի՞նչը քննարկենք. քննարկենք ի՞նչ է ասվել, թե՞ քննարկենք՝ արդյո՞ք հասկացել է, թե ինչ է ընթերցում: Ու նույնը՝ տարիներ շարունակ: Թիմա­կիցներն անընդհատ ջանք են թափում բացատրելու, թե որն է «այբը», որը՝ «բենը»: Ոմանք սեփական օրակարգն են գրում, դեմ տալիս՝ մտքում համոզված լինելով, որ «միևնույն է՝ չի հասկանալու ինչ է հնչեցնում»: Գործընկեր կուսակցություններն էլ օր ու գիշեր քննարկում են՝ հաս­կացա՞վ արդյոք ինչ է անում, թե՝ ինչպես միշտ: Մարդ չգիտի՝ նախ բա­ցատրի, թե ինչ դեր է ինքը վերցրել և ինչ է ասել հրապարակավ, հետո՞ պատասխանի դրանց, թե՞ միանգամից ասի՝ ախր էս ամենը քո ի՞նչ խելքի բանն է, եղբա՛յր: Ախր քաղաքական դաշտը բազկամարտի ֆեդերա­ցիա չէ՝ այստեղ այլ հատկանիշներ են հարկավոր»:

Ստեղծված իրավիճակի շուրջ ԲՀԿ-ի դիրքորոշումն իմանալու համար Armlur.am-ը կապ հաստատեց ԲՀԿ մամուլի խոսնակ Տիգրան Ուրիխանյանի հետ, ով հայտնեց իր խիստ անձնական, այսրոպեական կարծիքը.

«Հիտլերն էլ էր բավականին զարգացած, ինտելեկտով օժտված, կիրթ անձնավորություն, ով կոտորեց շուրջ 40 միլիոն մարդ երկրագնդի վրա: Իսկ մարդկանց կարեկցելու, ողորմած լինելու պատասխանատվություն ստանձնելու ու պատասխանատվություն կրելու համար անհրաժեշտ է սիրտ ու հոգի ունենալ: Հայաստանի Հանրապետությունում էլ 40 թիվը խորհրդանշական է, քանի որ 40 տոկոսի է հասնում աղքատությունը: Այն մարդկանց թիվն է, ովքեր դեղի ու հացի կարիք ունեն: Ինչքան են այս ընթացքում լքում այս երկիրը, ինչքան են պատրաստվում լքել և ինչ է տեղի ունենում մեր երկրում, դրանք արդեն հռետորական հարցեր են: Սա իմ խիստ անհատական ռեակցիան է` օրվա 11-րդ ժամին, հիվանդանոցից»: