ԲՀԿ խմբակցության պատգամավոր Վահան Բաբայանը սոցցանցի իր էջում անդրադարձել է երեկ Սերժ Սարգսյանի հայտարարությանը.
«Բոլորիս համար պարզից էլ պարզ է, որ երեկվա նիստում Սերժ Սարգսյանը խախտեց քաղաքական էթիկայի բոլոր նորմերը, անցավ անձնական վիրավորանքների, ինչը հարիր չէ երկրի նախագահին։ Այդ ի՞նչից վերցվեց, որ երկրի համար չարիք դարձավ Գագիկ Ծառուկյանը, եթե նա վայելում է ժողովրդի աննախադեպ վստահությունը, եթե նա բազմաթիվ ոլորտներում պետության փոխարեն ստանձնել է պատասխանատուի դեր և օգուտ է տալիս մեր երկրին։ Գուցե նրանում է մեղքը, որ տարիներ շարունակ զարգացնում է հայրենական սպորտը, բազմաթիվ աշխատատեղեր ստեղծում, տնտեսություն զարգացնում, գյուղատնտեսությանն աջակցում ու ի վերջո իր ունեցած հեղինակության շնորհիվ արտաքին ներդրումներ ապահովում փորձում երկիրը փրկել կործանումից։
Հայաստանում կան բազմաթիվ խնդիրներ և չարիքներ, որոնք կարելի էր և պետք էր մատնանշել, սակայն ԲՀԿ-ին օրեր առաջ մեղադրելով շտապողական և ոչ սթափ հայտարարության մեջ, երեկ ՀՀԿ կործանվող էկիպաժն ինքը շտապողական ու ոչ սթափ հայտարարություններով հանդես եկավ»,-գրել է նա։
Հիշեցնենք, որ երեկ Սերժ Սարգսյանը, անդրադառնալով ԲՀԿ-ի և նրա առաջնորդ Գագիկ Ծառուկյանի գործունեությանը, նշել էր.«Տարիներ շարունակ ես եմ ուղղակիորեն արգելել ձեզ հրապարակավ հանդես գալու Ծառուկյան Գագիկի բոլոր անհեթեթությունների դեմ՝ անձամբ փակելով այդ քաոսը, ե՛ս եմ արգելել որևէ մեկին հոլովել ժողովրդի կողմից դակված «Դոդի Գագո» կնիքը, ե՛ս եմ բոլորիդ հորդորել ժամանակ տալ այստեղ-այնտեղ հնչեցրած հերթական վտանգավոր նախադասությունից հետո՝ բացատրելով, որ նա ուղղի իր սխալը»:
.gif)
