ՍԻՐԵԼԻ՛ ԺՈՂՈՎՈՒՐԴ, ՊԱՏՐԱՍՏՎԵ՛Ք ՊԱՅՔԱՐԻ

ԲՀԿ նախագահ Գագիկ Ծառուկյանի ելույթը
«Հարգելի՛ գործընկերներ, այստեղ են ԲՀԿ խմբակցության անդամները, քաղխորհրդի անդամները, տարածքային կառույցների պատասխանատուները: Ուզում եմ տեղեկացնել ձեզ, որ ես այսօր հանդիպելու եմ Լեւոն Տեր-Պետրոսյանի եւ Րաֆֆի Հովհաննիսյանի հետ: Մենք քննարկելու ենք միասնական քայլերի ամբողջական փաթեթը: Երեկ ուշ երեկոյան ինձ մոտ են եղել բազմաթիվ գործիչներ, համաժողովրդական շարժմանը միացած խորհրդարանական ու արտախորհրդարանական ուժերի ղեկավարներ, ազատամարտիկներ, հասարակական կառույցների ներկայացուցիչներ, որոնք սպասում են մեր որոշումներին: Եվ ամենակարեւորը՝ ժողովուրդն է սպասում մեր խոսքին ու մեր քայլերին:

Մինչեւ մեր բուն անելիքները ներկայացնելը, ես ուզում եմ անդրադառնալ երեկ եթերը լցրած հայտնի մարդու ելույթին: Հատուկ ուզում եմ ընդգծել, որ իմ խոսքը ոչ թե ուղղված է նրան, այլ ժողովրդին: Սիրելի՛ ժողովուրդ, բոլորս շատ լավ գիտենք, թե ինչ վիճակում է գտնվում մեր երկիրը, Հայաստանի քաղաքացին, եւ ով է այդ ամենի թիվ մեկ պատասխանատուն: Վերջին տարիներին արված իմ բոլոր քայլերն ուղղված են եղել քաղաքական հարթության մեջ խնդիրները քննարկելուն եւ լուծումներ գտնելուն: Ես միշտ հայտարարել եմ, որ դասական իմաստով քաղաքական գործիչ չեմ, բայց երբ, մեղմ ասած, վատ կառավարում է իրականացվում եւ Հայաստանը հետ շպրտվում, ապա բոլորս էլ պարտավոր ենք ոտքի կանգնել, ու ամեն մեկս իր չափով ելքեր առաջարկել ու գտնել:
Ելքը ես տեսել եմ քաղաքական փոփոխությունների մեջ: Ես քաղաքականություն եմ մտել բացառապես մեկ նպատակով` օգնել իմ երկրին ու իմ ժողովրդին դուրս գալ այս վիճակից: Ես ամեն ինչ արել եմ քաղաքական դաշտի զգալի մասի, բոլոր հիմնական քաղաքական ուժերի եւ գործիչների համախմբման համար: Ես սահմանել էի խաղի կանոն` չվիրավորել, անձնական թշնամանք չտարածել: Որովհետեւ մեր խնդիրը վիրավորելն ու հարաբերություններն անձնական թշնամանքի դաշտ տեղափոխելը չէ, այլ երկրին ու ժողովրդին օգտակար լինելը: Հիմա ես ուզում եմ հատուկ շեշտել` երեկվանից հետո իմ մոտեցումը չի փոխվել: Մենք նախկինի պես հավատարիմ ենք մնալու կոռեկտ մեր գործելաոճին եւ գտնվելու ենք բացառապես քաղաքական հարթությունում:
Փողոցային բառապաշարն օգտագործելը մերը չէ: Ոչ էլ հիստերիկ եւ էմոցիոնալ վարքագիծն է մերը: Ես, ինչպես եւ դուք, ծանոթացել եմ այդ մարդու ելույթին: Պետության նախագահի պաշտոնը զբաղեցնող մարդու ծրագրային ելույթ կոչվածում ես մեկ բառ անգամ չտեսա մեր պետության զարգացման ու ժողովրդի խնդիրների լուծման մասին մտահոգություն.
Ոչ մի խոսք այն մասին, թե ինչու իր պաշտոնավարման տարիներին Հայաստանի տնտեսությունը խայտառակ անկում ապրեց, ներդրումները կտրուկ նվազեցին, աղքատությունն աճեց, իսկ դրան զուգահեռ զարգացան իր ու իր նեղ շրջապատի հայտարարագրված ու չհայտարարագրված բիզնեսները, թե ինչու է բիզնեսին տեռորի ենթարկելը պետական ծրագիր դարձել, թե ինչու է երկիրը քամվում սարսափելի չափերի հասնող արտագաղթից, թե ինչու է ֆինանսական անկայունություն ստեղծվել մեզ մոտ, թե ինչու են բանկերում գրավադրվել ամբողջական գյուղերը, մարդկանց տներն ու ողջ ունեցվածքը, եւ ինչու են մարդիկ տոկոսների տակ մնացել, թե ինչու է Հայաստանի ու Ղարաբաղի սահմանում աճել լարվածությունն, ու ամեն օր մենք լսում ենք նորանոր զոհերի մասին, թե ինչու են Թուրքիան ու Ադրբեջանն այնքան երես առել, որ արհամարհանքով են խոսում Հայաստանի մասին, թե ինչու է ԵԽԽՎ-ում հարց հնչում կազինոներում տարված միլիոնավոր դոլարների մասին, թե ինչու «Նաիրիտ» գործարանի հաշվին դուրս գրված հարյուր միլիոնավոր դոլարները թալանվել ու փոշիացվել է, իսկ հազար յոթ հարյուր մարդ հայտնվել է փողոցում:
Այդ մարդը չխոսեց անգամ այն ժամանակ, երբ Նազարբաեւը նվաստացնում եւ ստորացնում էր իրեն: Նա չխոսեց, թե օգոստոսյան ռազմական լարվածության ժամանակ ինչո՞ւ Բադեն-Բադենից այդպես էլ չվերադարձավ Հայաստան: Նա լուռ էր, երբ մարդիկ խուճապի էին մատնվել դրամի սրընթաց արժեզրկման պատճառով: Նա ոչ մի բառ չասեց, թե ինչու էր լռում, երբ Գյումրին եւ հայ ժողովուրդը սգում էին դաժան սպանության համար եւ ոտքի կանգնում:
Իսկ հիմա ես կպատասխանեմ այն հարցադրումներին, որոնք անձնապես ինձ էին ուղղված. Անվտանգության խորհրդից ինձ իբր հեռացնելու մասին: Ուզում եմ տեղեկացնել, որ ես փաստացի արդեն վեց ամիս է՝ այդ կառույցում չեմ աշխատել, իսկ այդ կառույցից պաշտոնապես դուրս չեմ եկել միայն իր անձնական մարդկային խնդրանքով: Այսքանից հետո երեկ նման ձեւով հարցը ներկայացնելը դուք ինքներդ գնահատեք, թե ինչ է նշանակում: Պատգամավորական մանդատից ինձ զրկելու մասին: Ինձ համար կարեւորը ՀՀ քաղաքացիների վստահությունն է, որն առկա է: Այնպես որ, ես ունեմ ամենակարեւոր մանդատը: Շատերին է հետաքրքրում, թե ինչո՞ւ Սերժ Սարգսյանը գնաց իր զբաղեցրած պաշտոնին անհարիր անձնական վիրավորանքներ հասցնելու ճանապարհով:
Ուզում եմ բացել բոլոր փակագծերը եւ լինել անկեղծ: Ինձ առաջարկվել են համագործակցության բազմաթիվ տարբերակներ, անձնական շահեկան առաջարկներ, այդ թվում՝ նախագահի պաշտոնը Սահմանադրությունը փոխելուց հետո` մեկ պայմանով, որ ես համաձայնեմ իր իշխանության վերարտադրությանը: Այսինքն՝ աջակցեմ փաստացի երրորդ ժամկետով եւ ցմահ կառավարելու իր ցանկության իրականացմանը սահմանադրական փոփոխությունների միջոցով: Ես կտրականապես մերժեցի այս հակապետական մոտեցումը, քանզի Հայաստանի հետընթացն ապահոված մարդը չի կարող նման հավակնություններ ունենալ: Ահա իմ այս դիրքորոշումն էլ հանդիսացավ հիմնական պատճառը, որ նա խախտի քաղաքական եւ մարդկային հարաբերությունների կանոնները: Սա՛ է իրականությունը եւ ոչինչ ավելին:
Փաստորեն, այդ մարդու ծրագրային ելույթն անձամբ ինձ էր վերաբերում, այսինքն՝ նրա ծրագիրն ինձ պատերազմ հայտարարելն ու ցմահ իշխելու խոչընդոտը վերացնելն է: Դա՛ է նրա ծրագիրը: Առաջ անցնելով՝ ասեմ, որ ես ընդունում եմ մարտահրավերն ու գնալու եմ մինչեւ հաղթանակ: Հաջորդը: Երեկվա ելույթում ակնարկվեց իբր չվճարված իմ հարկերի մասին: Ասեմ, որ իր պաշտոնավարման բոլոր տարիներին, ամիսներ շարունակ ստուգվել են իմ եւ իմ մերձավորներին պատկանող բոլոր հիմնարկները: Ի տարբերություն իրեն՝ ես չստուգված լուրերի եւ մերկապարանոց հայտարարությունների փոխարեն բերեմ պաշտոնական թվեր եւ խոսեմ բոլորի աչքի առաջ տեղի ունեցածից: Իր կառավարման ժամանակահատվածում երկրի արտաքին պարտքը ավելացավ ավելի քան երեք միլիարդ դոլարով:
Որտե՞ղ է այդ գումարը, պարո՛ն Սարգսյան: Դոլար-դրամ խաղերի արդյունքում միլիոնավոր դոլարներ գողացվեցին ժողովրդից: Ո՞ւր գնացին այդ գումարները: Ժողովուրդն այդ հարցերի պատասխանն է ուզում ստանալ ձեզանից: Թեեւ ձեր ասած չստուգված լուրերի համաձայն՝ ժողովուրդը շատ լավ գիտի, թե ուր են գնացել այդ փողերը: Ինչպես որ գիտի, թե ովքեր են բյուջեն տարիներով մսխում եւ «ատկատներով» զբաղվում: Ո՞ւր են մեր թոշակառուների, ուսուցիչների, բժիշկների, գյուղացիների, զինվորականների, ոստիկանության եւ անվտանգության ծառայության, ուսանողների, դասախոսների հասանելիք գումարները: Ասեմ, որ ժողովուրդը հրաշալի գիտի: Պաշտոնապես հայտարարում եմ. իշխանափոխությունից հետո ժողովրդից գողացված միլիարդավոր դոլարները երկու-երեք հոգին պետք է վերադարձնեն բյուջե, որպեսզի կարողանանք ոտքի հանել Հայաստանը, ուժեղացնել Ղարաբաղը, ազատել մեր ժողովրդին տոկոսների լծից, մեր երեխաներին ու ծնողներին արժանապատիվ կյանք ապահովել:
Ուրիշ լուծում չկա: Ինչ վերաբերում է իմ հասցեին հնչած անձնական վիրավորանքներին: Պատասխանեմ` ես չեմ իջնելու նման ցածր մակարդակի: Ինչ վերաբերում է քաղաքական զավեշտին, ապա հայ ժողովուրդն իսկապես զավեշտ է համարում այս իշխանության գոյությունը մինչեւ այսօր: Սա մեր բոլորիս ամոթն է եւ եկել է սխալներն ուղղելու ժամանակը: Հիմա անելիքների մասին: Երեկվանից ստեղծվել է մի վիճակ, որը պահանջում է հանգուցալուծում: Ես համոզված եմ, որ միակ հանգուցալուծումն ամբողջական իշխանափոխությունն է արտահերթ նախագահական ընտրությունների միջոցով: Սիրելի՛ ժողովուրդ, ես գիտեմ, որ սա է եղել ձեր հիմնական պահանջը, եւ ես երկար ժամանակ փորձել եմ անցնցում տարբերակով այդ պահանջի բավարարման ճանապարհը գտնել: Բայց փաստորեն ցնցումների ճանապարհով գնում է իշխանությունը: Ինչ ասեմ, մեղքն իր վիզը: Ի՞նչ ենք անելու մենք:
Շատ հստակ ու հաշվարկված քայլեր: Սիրելի՛ ժողովուրդ, պատրաստվե՛ք պայքարի: Երեք հազար մարդ է դուրս գալիս փողոց, սրանք ստիպված օրենք են փոխում: Ամբողջ ժողովուրդը դուրս գա, իշխանությունը կփոխվի: Ես այժմ կոչ եմ անում համազգային մոբիլիզացիայի՝ ունենալով մեկ նպատակ` քաղաքական բոլոր օրինական մեթոդներով (անդադար հանրահավաքներ, երթեր, ցույցեր, անհնազանդություն եւ այլն) հասնել Սերժ Սարգսյանի պաշտոնանկությանը` ազատվելու համար չարիքի այս իշխանությունից: Այս իշխանությունն անհապաղ պետք է հեռացվի, եւ մենք պետք է փակենք մեր պատմության անփառունակ եւ ամոթալի այս էջը: Հայաստանը պետք է մաքրել գաղջ մթնոլորտից:
Մեր խոսքը գործ է:
Իմ կյանքի ամենամեծ գործն այժմ ես համարում եմ չարիքի իշխանությունից Հայաստանն ազատելը:
Բոլորիս հաղթանակ եմ մաղթում:

ՉԻ ՀԵՏԱՔՐՔՐՈՒՄ ԲՆԱԿՉԻ ԽՆԴԻՐԸ
Արդեն մի քանին օր է, ինչ լարված իրավիճակ է ՀՀ Տավուշի մարզի Վերին Կարմիրաղբյուրում: Բանն այն է, որ նշված գյուղի բնակիչները դեռեւս նախորդ տարի խաղողի եւ պտղատու այգիների հրկիզվելուց հետո վնասի փոխհատուցում չեն ստացել: Նշենք, որ դրամական օգնություն ստացել է միայն տուժածների մի մասը:
Տեղեկացնենք, որ հրդեհը տեղի էր ունեցել նախորդ տարի, օգոստոսի 7-ին, ինչի արդյունքում վնասվել էին մոտ 7 հազար հա խաղողի տնկիներ, դեղձենու, կեռասենու այգիներ, խոտածածկ տարածքներ, մեղվի փեթակներ: Վերին Կարմիրաղբյուրի բնակիչների պատմելով՝ հրդեհի միակ մեղավորը «Եղվարդշին» ԲԲԸ-ն է, որն այդ ընթացքում իրականացրել է խողովակների ապամոնտաժման աշխատանքները:
«Ժողովուրդ»-ի հետ զրույցում բողոքող քաղաքացիներից մեկը՝ Վազգեն Մանուչարյանը, տեղեկացրեց, որ իր ընտանիքը նախորդ տարի՝ օգոստոսի 7-ին, տեղի ունեցած հրդեհից խոշոր չափի վնասներ է կրել, ինչի դիմաց մինչ օրս փոխհատուցում դեռ չի ստացել: Այս առիթով գյուղի մի խումբ բնակիչներ արդեն մի քանի օր է, ինչ ոչ միայն բողոքի ակցիա են անցկացնում, այլեւ դեպի Նորաշեն տանող ճանապարհն են փակում: Վազգեն Մանուչարյանի խոսքով՝ եթե ընկերությունը չփոխահուցի պատճառած վնասը, ապա նրանք կդիմեն այլ քայլերի:
Պարզվում է՝ «Եղվարդշին» ընկերությունը օգոստոսի 7-ին՝ հրդեհի օրը, փողոցը քանդելու եւ խողովակները ապամոնտաժելու թույլտվություն չի ունեցել: Հրդեհից 15 օր անց միայն ստացել է: Նշենք, որ հրդեհից ավելի մեծ վնաս կրել են Վազգեն Մանուչարյանը, Կամո Մուսինյանը, Վազգեն Բաբայանը եւ Ավագ Ավագյանը: Խնդրի առնչությամբ դժգոհող բնակիչները նամակով դիմել են տարբեր պետական մարմիններ, այդ թվում նաեւ՝ ՀՀ նախագահի նստավայր: Սակայն որեւէ պատասխան չկա:
Այնուամենայնիվ, «Ժողովուրդ»-ը զրուցեց նաեւ «Եղվարդշին» ընկերության տնօրեն Սամվել Վարդանյանի հետ, ով արդարացավ՝ նշելով, որ հրդեհի հետ ընկերությունը ոչ մի կապ չունի: «Փողոցի քանդման թույլտվություն մենք ունեցել ենք: Իսկ ընկերությունը 22 բնակչի փոխհատուցում է տվել: Այնտեղ միշտ կրակում են, նույնիսկ մեր աշխատանքների ժամանակ էլ են կրակել: Գուցե դա՞ է հրդեհի պատճառը»,- արդարացավ տնօրենը:
Այս խնդրի շուրջ զրուցեցինք նաեւ Տավուշի մարզպետարանի գյուղատնտեսության վարչության պետ Վաղարշակ Սուքոյանի հետ: Սակայն նա մասամբ էր տեղյակ խնդրին: «Այդ գործը դատական գործընթացում է, դուք պատկան մարմիններից տեղեկացեք մանրամասների մասին»,- անտարբեր տոնով պատասխանեց Սուքոյանը: Ավելի ուշ բնակիչները տեղեկացրին, որ Տավուշի մարզպետ Հովիկ Աբովյանը իրենց նախորդ տարվա նոյեմբերին 7 օր ժամկետ է պահանջել եւ խոստացել հարցին լուծում տալ: Սակայն ամիսներ են անցել, բայց մարզպետի պաշտոնը զբաղեցնող անձը ո՛չ հանդիպել է բնակիչներին, ո՛չ էլ խնդիրը լուծել: Այս դեպքում զարմանալի է, թե ինչու է նա մարզպետ նշանակվել:

ՍՅՈՒՆԷ ՀԱՄԲԱՐՁՈՒՄՅԱՆ