Այսօր Զորավար Անդրանիկի ծննդյան 150-ամյակն է: Այս կապակցությամբ Երկրապահ կամավորականների միության անդամներ և մի շարք բարձրաստիճան պաշտոնյաներ հավաքվել են Եռաբլուր պանթեոնում` հարգանքի տուրք մատուցելու զորահրամանատար Անդրանիկ Օզանյանի վառ հիշատակի առթիվ:
Ինչպես տեղից հայտնում է Armlur.am-ի թղթակիցը, այս պահին պանթեոնում են Պաշտպանության նախարար Սեյրան Օհանյանը, գեներալներ Մանվել Գրիգորյանը, Սեյրան Սարոյանը, Երևանի քաղաքապետ Տարոն Մարգարյանը և մի շարք այլ բարձրաստիճան պաշտոնյաներ:
Հիշեցնենք, որ այս կապակցությամբ ԵԿՄ նախագահ Մանվել Գրիգորյանը հանդես է եկել հայտարարությամբ, որում ասվում է. «Բոլորիս շնորհավորում եմ մեր ազգային-ազատագրական պայքարի խորհրդանիշներից մեկի, ժողովրդական հերոս Զորավար Անդրանիկի ծննդյան 150 ամյակի առթիվ: Հայ ժողովրդի ինքնապաշտպանության և ազատագրական շարժման զինյալ պայքարի բացառիկ ժողովրդական ու լեգենդար հերոսներից մեկը Զորավար Անդրանիկն է: Մենք` երկրապահներս, մեր ժողովրդին պարտադրված պատերազմի յուրաքանչյուր պահին զգացել ենք մեր քաջարի նախնիների ոգին ու կռվել ենք նրանց ոգեկոչելով, մեր աչքի առաջ ունենալով նրանց անցած փառապանծ ճանապարհն ու մարտական սխրանքները: Մեր ռազմական փառքի նորօրյա պանթեոնը ամբողջական չէր լինի, առանց ժողովրդական հերոս Անդրանիկի: Ես հպարտ եմ, որ ճակատագրի բերումով, ինձ է բախտ վիճակվել իրականացնելու Զորավարի երկու երազանքները»:
.gif)
