Ալ Բուստան միջազգային փառատոնում երաժիշտները հանդես են գալիս «Անմոռուկներով»

Մարտի 4-ին Հայաստանի պետական երիտասարդական նվագախումբն Ալ Բուստան միջազգային փառատոնում հանդիսատեսին նվիրեց դասական երաժշտության գեղեցիկ համերգ։ Ներկայացվեցին Ռախմանինովի, Չայկովսկու ստեղծագործությունները։ Որպես մենակատար հանդես եկավ դաշնակահարուհի Խաթիա Բունիաթիշվիլին։

Հայաստանի պետական երիտասարդական նվագախումբն այս տարի Ալ Բուստան միջազգային փառատոնին իր մասնակցությունը նվիրում է Հայոց ցեղասպանության 100-րդ տարելիցին։ Առաջին իսկ օրից և′ Երիտասարդական նվագախմբի երաժիշտները, և′ փառատոնի գեղարվեստական ղեկավար, դիրիժոր Ջանլուկա Մարչիանոն հանդես են գալիս Հայոց ցեղասպանության 100-րդ տարելիցի խորհրդանիշ «Անմոռուկ» կրծքանշաններով։

Դիրիժոր Ջանլուկա Մարչիանոն, խոսելով երիտասարդական նվագախմբի մասին, նշեց. «Այս նվագախումբը վաղուց արդեն դուրս է եկել երիտասարդական նվագախմբի բնորոշումից, քանի որ հասուն, բարձր պրոֆեսիոնալիզմ ունեցող կոլեկտիվ է»։

Հայաստանի պետական երիտասարդական նվագախմբի մասնակցությունն Ալ Բուստան փառատոնին կայացել է Հայոց ցեղասպանության 100-րդ տարելիցին նվիրված միջոցառումները համակարգող պետական հանձնաժողովի շնորհիվ՝ 100-ամյա տարելիցի միջոցառումների շրջանակներում: Լիբանանյան հյուրախաղն իրական է դարձել նվագախմբի գլխավոր գործընկեր ՎիվաՍել-ՄՏՍ-ի աջակցությամբ:

Հիշեցնենք, որ Հայաստանի պետական երիտասարդական նվագախումբն արդեն երկրորդ տարին անընդմեջ հրավիրվում է Բեյրութում անցկացվող Ալ Բուստան միջազգային փառատոնի կողմից՝ հանդես գալու որպես պաշտոնական նվագախումբ։