Երեք պատգամավորների մասին ԱԺ էթիկայի հանձնաժողովի ստացած դիմում-բողոքներից երկուսը վերաբերվում են ԱԺ փոխխոսնակ, ՀՀԿ մամուլի քարտուղար Էդուարդ Շարմազանովին եւ ՀՅԴ խմբակցության անդամ, ԱԺ պատգամավոր Արծվիկ Մինասյանին: Դրանք կապված են DIY ակումբի պայթեցման շուրջ պատգամավորների արած հայտարարությունների հետ: Երեկ «Ժողովուրդ»-ը զրուցեց Էդուարդ Շարմազանովի հետ` պարզելու համար, թե որքանով է նա իրեն «մեղավոր» համարում:
-Պարո՛ն Շարմազանով, ԱԺ էթիկայի հանձնաժողովը Ձեզ հետ կապված դիմում-բողոք է ստացել հասարակական կազմակերպությունից: Ինչպե՞ս եք վերաբերում այդ փաստին:
-Նախ շնորհակալություն իմ ճակատագրով հետաքրքրվելու եւ մտահոգվելու համար: Առաջինը պետք է ասեմ, որ յուրաքանչյուր քաղաքական գործիչ, յուրաքանչյուր քաղաքացի, հասարակական կազմակերպության ներկայացուցիչ իրավունք ունի ազատորեն, առանց որեւէ մեկի իրավունքները ոտնահարելու արտահայտել իր կարծիքը: Տվյալ դեպքում այդ հասարակական կազմակերպություններից մեկն էլ, օգտվելով իր այդ իրավունքներից, դիմել է էթիկայի հանձնաժողով: Ինչ վերաբերում է իմ կարծիքին, ապա ես մի քանի անգամ մամուլում շատ մանրամասն ներկայացրել եմ իմ ընկալումներն ու այդ հարցի շուրջ արժեքային համակարգի կարեւորագույն դրույթները: Ցավոք, ինչ-որ մեկի մոտ տեղի է ունեցել թյուրըմբռնում, ես չեմ բացառում նաեւ, որ որոշ մարդկանց մոտ սա նպատակաուղղված խնդրի շահարկում է: Իմ կարծիքը հետեւյալն է ու անփոփոխ. ես քրիստոնեական արժեքներին հավակնող մարդ եմ, ինձ համար ընդունելի չէ հակաքրիստոնեական արժեքների պրոպագանդումը:
-Ըստ Ձեզ՝ ինչպիսի՞ն է լինելու ԱԺ էթիկայի հանձնաժողովի դիրքորոշումը` կապված դիմում-բողոքի հետ:
-Ես էթիկայի հանձնաժողովի անդամ չեմ, էթիկայի հանձնաժողովն էլ ցանկացած հարց իր լիազորությունների շրջանակում կարող է քննարկել, եւ ես այդտեղ որեւէ խնդիր չեմ տեսնում:
-Կանխատեսո՞ւմ եք՝ մոտավորապես ինչ «պատիժ» է սպասվում Ձեզ եւ ՀՅԴ-ական Արծվիկ Մինասյանին: Չե՞ք վախենում այդ պատժից:
-Ես վախենում եմ միայն Աստծուց: Ուրեմն որեւէ մեկը չի կարող ինձ համար պատիժ սահմանել, առավել եւս՝ մի պատգամավոր: Կա օրենսգիրք եւ դատարաններ, որոնք էլ կորոշեն պատժի մասին: Ես կարծում եմ, որ այս ամենից ավելի շատ շոուների հոտ է գալիս, մարդիկ ուզում են հայտնի դառնալ եւ շոու ստեղծել: Ամեն դեպքում, տհաճ է, որ նման ոչ բարոյական եւ ոչ քրիստոնեական կարծիքները սկսել են շահարկման առարկա դառնալ: Ես Ձեզ մեկ անգամ եւս ասում եմ, որ ես բաց նամակով հանդես եմ եկել ու ավելացնելու ոչ մի բան չունեմ: Ուղղակի կասեմ, որ այո՛, ես՝ որպես քրիստոնյա մարդ, դեմ եմ նման դրսեւորումներին եւ ավելի շատ դեմ եմ նման դրսեւորումների պրոպագանդմանը: Ես դա ասում եմ ամենայն անկեղծությամբ ու կարծում եմ` հասարակության մեծամասնությունն էլ դեմ է անբարոյական, հակաքրիստոնեական արժեքների պրոպագանդմանը: Այդտեղ ինչ-որ բռնություն, ինչ-որ բան… դա էլ իրենց հորինած խնդիրներն են: Նույնը կասեմ նաեւ Արծվիկ Մինասյանի հետ կապված, նրան շատ լավ ճանաչելով՝ կասեմ, որ այդտեղ ոչ մի բռնության մասին խոսք լինել չի կարող: Չնայած դա էթիկայի հանձնաժողովի խնդիրն է, մենք բարձր ենք, որեւէ խնդիր չեմ տեսնում: Կրկնում եմ. ես ոչ մեկին բռնության կոչ չեմ արել ու չեմ անի, բայց միեւնույն ժամանակ, որպես քրիստոնեական արժեքներ կրող մարդ, դեմ եմ հակաքրիստոնեական անբարոյական քայլերին:
-Էթիկայի հանձնաժողովի օրակարգում ընդգրկված է նաեւ Արարատի մարզի Դվին գյուղի բնակիչ Արթուր Զադոյանի դիմումի քննության հարցը: Զադոյանի դիմումը վերաբերվում է պատգամավոր Կարո Կարապետյանին (Յուվեցի Կարո): Այդ մասով ի՞նչ կասեք:
-Ես չեմ ուզում երբեք իմ լիազորությունների սահմաններն անցնել, ու էթիկայի հանձնաժողովը նրա համար է, որպեսզի էթիկայի հետ կապված հարցերը քննարկի: Իսկ ես ու Արծվիկ Մինասյանը էթիկայի որեւէ նորմ չենք խախտել, մենք առաջնորդվել ենք կարծիք արտահայտելու իրավունքով:
.gif)
