Այսօր տաքսիի մի քանի վարորդներ հավաքվել էին, սակայն նրանց հավաքի նպատակը փոքր-ինչ անհասկանալի էր:
«Քաղաքացիական կողմնորոշում» հասարակական կազմակերպության նախագահ Գեւորգ Դոստուրյանից Armlur.am-ը փորձեց պարզել` հավաքվելու նպատակը որն է: Վերջինս նշեց, որ իրենք հավաքվել են, որպեսզի Տրանսպորտի և կապի նախարարությունից պահանջեն ստուգայցեր կատարել` ոչ օրինական աշխատող տաքսիների հայտնաբերման համար:
«Մենք ուզում ենք, որ բոլորը օրինական դաշտում աշխատեն»,- ասաց վերջինս: Նրա խոսքով` լիցենզավորման նոր կարգը, պարտադիր հաշվիչ մեքենաների տեղադրումը տաքսիստների նկատմամբ հարկաին բեռ չի ավելացնի, մինչդեռ մի քանի օր առաջ հարյուրավոր տաքսիստներ այդ նույն օրենքի դեմ բողոքի ցույց էին անցկացնում` պահանջելով չպարտադրել հաշվիչ մեքենաների տեղադրումը և լիցենզավորման նոր կարգը:
Հավաքված երկու-երեք վարորդներից մեկն էլ մեզ հետ զրույցում դժվարացավ պատասխանել` վերջիվերջո հավաքվելու նպատակը որն է, ինչ խնդիր են ուզում դրանով լուծել: Իսկ լիցենզավորման նոր կարգի վերաբերյալ նշված վարորդը ասաց, որ իր համար առանձնապես փոփոխություն չկա, քանի որ ինքը երկար տարիների վարորդ է, և ծանր պահերն անցել է:
Նշենք, որ վարորդները տեղեկացրին, թե հանդիպել են տրանսպորտի փոխնախարարների հետ և վերջիններից խոստում ստացել ստուգայցեր կատարելու և օրինախախտ վարորդներին հայտնաբերելու ուղղությամբ:
.gif)
