ԱԺ ՀՀԿ խմբակցության պատգամավոր Կարինե Աճեմյանը «Ժողովուրդ»-ի հետ զրույցում ասաց, որ այսօր պետք է բոլոր ուժերը մոբիլիզացնել գյուղերի վրա, որպեսզի գյուղացին չարտագաղթի:
-Տիկի՛ն Աճեմյան, ըստ ՀՀ ազգային վիճակագրական ծառայության հրապարակած տվյալների՝ ՀՀ-ում աղքատությունը 17 տոկոսից հասել է ավելի քան 36 տոկոսի, օր օրի աճում է արտագաղթողների թիվը, երկրում ծայրահեղ ծանր սոցիալական վիճակ է: Ո՞վ է այդ ամենի պատասխանատուն:
-Գիտեք, երեւի մի փոքր չափազանցնում են՝ թվերի հետ կապված` ե՛ւ արտագաղթի, ե՛ւ աղքատության մասով: Ճիշտ է, աղքատություն կա, մենք դա չենք հերքում, եւ, իհարկե, կառավարությունն ու իշխանությունն է պատասխանատու այդ բոլոր հարցերի լուծման համար, բայց գիտեք, նաեւ շատ մեծ աշխատանքներ են կատարվում: Եւ եթե Դուք հետեւեք վերջին տնտեսական ցուցանիշներին, որոնք ֆինասների նախարարությունը հրապարակեց, եւ ընդհանրապես այդ բոլոր գործընթացներին, կհասկանաք, որ այնուամենայնիվ, այդպիսի չափազանց ահռելի թվերի մասին չի կարելի խոսել: Իմ սեփական կարծիքով՝ բոլոր երկրներից մարդիկ արտագաղթում են, դա միայն մեր երկրի խնդիրը չէ: Ես չեմ արդարացնում դրանով, բայց բոլոր երկրներում էլ այս խնդիրը կա՝ ե՛ւ աշխատանք են փնտրում, ե՛ւ սոցիալ-հոգեբանական վիճակը, արդարության պահանջը կա: Շատ եվրոպական երկրներից են արտագաղթում այլ երկրներ, ԱՄՆ-ից են գնում, սա շատ գլոբալ եւ խորը արմատներ ունեցող խնդիր է:
-Նշեցիք, որ երկրում տնտեսական աճ կա, բայց այդ աճը ոչ ոք իր մաշկի վրա չի զգում, չե՞ք կարծում, որ այդ թվերը «նկարած» թվեր են եւ իրականության հետ կապ չունեն:
-Բոլոր փոփոխությունները, թեկուզ եւ չնչին, առաջընթացները, մարդիկ չեն արձանագրում: Իհարկե, շատ խնդիրներ կան ե՛ւ տնտեսությունում, ե՛ւ սոցիալական հարաբերություններում, ե՛ւ աղքատության հետ կապված… այդ նկարելու հետ կապված էլ չի կարելի այդպես խոսել, երբ որ մասնագետներն են խոսում, եթե հետեւեք, մասնագետների հետ շփվեք, իրենց եզրակացությունները լսեք, ամենեւին էլ այդպես չէ: Կան ոլորտներ, որ նույնիսկ մենք առաջընթացներ ունենք:
-Կոնկրետ կնշե՞ք մի ոլորտ, որտեղ իսկապես առաջընթաց ունենք, այսօր բոլոր ոլորտներից անընդհատ դժգոհություններ ենք լսում:
-Ինքս գտնում եմ, որ մենք ամենամեծ ուշադրությունը պետք է դարձնենք մարզերի ու գյուղերի վրա: Այսինքն՝ մեր հիմնական ուժերն ու ռեսուրսներն ուղղենք մարզերի վրա: Եթե գյուղացին է մեկնում, դա իհարկե… այսինքն՝ եթե գյուղերը դատարկվում են, արդեն մեզ համար շատ մեծ խնդիր է, եւ այդ ուղղությամբ պետք է շատ աշխատենք, որպեսզի կարողանանք կանխել: Իսկ կանխելու համար գյուղացուն պայմաններ են հարկավոր ե՛ւ հարկային դաշտում, ե՛ւ բոլոր առումներով: Գյուղացու համար պայմաններ ստեղծելը շատ մեծ առավելություն ունի, դրա համար գյուղացին չի արտագաղթի ու անգամ քաղաք չի մեկնի: Այդ առումով մենք շատ մեծ խնդիր ունենք:
-Այսօր իշխանությունն ի՞նչ է անում այդ ուղղությամբ, չէ՞ որ ՀՀԿ-ն ու ՕԵԿ-ն են իրենց վրա պարտավորություն վերցրել ՀՀ կառավարության ծրագիրն իրագործելու եւ այդ խնդիրները լուծելու համար:
-Շատ խորը վերլուծություններ արվեցին կառավարությունում, եւ այդ վերլուծությունների հիման վրա շատ հետեւություններ են արվել: Արդեն իսկ ինչ-որ բաներ արվում են այդ ուղղությամբ, ես հիմա կոնկրետ չեմ կարող ասել, բայց կան. օրինակ՝ ոռոգման ջրի հետ կապված, խմելու ջրի, շատ ցածր տոկոսադրույքով վարկեր են տրամադրվում, որը կնպաստի, որպեսզի գյուղացին կարողանա իր տնտեսությունն ավելի լավ վարել:
-Ձեր կոալիցիոն նախկին գործընկեր ԲՀԿ-ն այս ամենի ելքը տեսնում է կառավարության փոփոխության մեջ:
-Մենք բազմիցս խոսել ենք ու մեր տեսակետները հայտնել այդ ուղղությամբ, մենք հակված ենք նրան, որ աշխատենք: Մնացածը ԲՀԿ-ի խնդիրն է: Բայց ներսում այս պահին նման խնդիր չենք տեսնում, եւ չի էլ քննարկվել կառավարության հարցը: Շուտով կառավարությունը հաշվետվություն է ներկայացնելու ԱԺ, այդ հաշվետվությունը բոլոր խմբակցությունները ե՛ւ լսելու են, ե՛ւ մասնակցելու են, որի ժամանակ էլ բոլորի դիրքորոշումը պարզ կլինի:
-ԲՀԿ-ն առաջ է քաշել նաեւ վարչապետի հրաժարականի հարցը, ի՞նչ է այդ ամենի մասին մտածում ՀՀԿ-ն:
-Գիտեք, ավելի շատ մամուլում է այդ հարցը քննարկվում: Եթե դժգոհ են, կարող են իրենց դժգոհությունները ներկայացնել, պետք չէ այդքան թեժացնել այդ խոսակցությունները: Նման հարց ՀՀԿ-ում չի քննարկվել, մեր դիրքորոշումը հետեւյալն է. մենք չենք ասում, որ իդեալական կառավարություն ենք, բայց մինչեւ տարեվերջ կներկայացնենք, թե ինչ է արվել, ինչը շատ կարեւոր փաստաթուղթ է, որը պետք է բոլորով քննարկենք:
.gif)
