ԱԺ «Բարգավաճ Հայաստան» խմբակցության նորընտիր ղեկավար Նաիրա Զոհրաբյանն այսօր խմբակցության նիստից հետո լրագրողների հետ զրույցում նշեց, որ նիստի երկրորդ մասում քննարկվել են օրենսդրական նախաձեռնությունները, դրանց թվում` փոքր և միջին ձեռներեցության հարցերը և այլն:
«Առաջիկայում մի քանի նախաձեռնություններ կդնենք շրջանառության մեջ: Կուսակցությունը և խմբակցությունը իրենց բնականոն աշխատանքը շարունակելու են»,- ասաց Զոհրաբյանը` հավելելով, որ երկուշաբթի հերթական քառօրյայի մեկնարկին խմբակցությունը կհայտարարի ընդդիմադիր լինելու մասին:
Իսկ ԲՀԿ պատգամավոր Ստեփան Մարգարյանն էլ համոզմունք հայտնեց, որ կուսակցությունից արտահոսքը կանգ է առել: «Մենք շարունակելու ենք աշխատանքը, որովհետև այն խնդիրներ, ինչի մասին մենք խոսում էինք, դրանք դեռ կան: Մենք հիմա քննարկում ենք առաջիկա քառօրյաների մեր անելիքները: Ենթադրում էինք նաև ակտիվացնել նաև օրենսդրական դաշտում մեր անելիքները», – նշեց նա:
Պատգամավորը հավելեց նաև, որ կուսակցությունը մնալու է կառուցողական ընդդիմության դաշտում ու շարունակելու է նախկինի պես քննադատել կառավարությանը:
Հիշեցնենք, որ նիստի ժամանակ որոշում էր կայացվել խմբակցության քարտուղար նշանակել Վահե Էնֆիաջյանին, իսկ ղեկավար` Նաիրա Զոհրաբյանին:
.gif)
