Այս տարի Հայոց ցեղասպանության 100-րդ տարելիցին ընդառաջ առանձնապես կարեւորվեց Հայաստանի մասնակցությունը «Եվրատեսիլ-2015» երգի միջազգային մրցույթին: Եվ եթե մինչեւ հայաստանյան երգն ու տեսահոլովակը ներկայացնելը «Առաջին ալիք»-ը հանդիսատեսին ոգեւորեց «Genealogy» խմբում աշխարհի հինգ մայրցամաքներից հայ երգիչներ ընդգրկելու գաղափարով եւ մեծացրեց լսարանի` Ցեղասպանության թեման մրցույթի միջոցով աշխարհին հասու դարձնելու ակնկալիքները, ապա «Don’t deny» («Մի՛ ժխտիր») նախնական անունը կրող երգի թողարկումից հետո հայ հանդիսատեսի հույսերը ոչ միայն չարդարացան, այլեւ երգի տեքստի բովանդակության վերաբերյալ քննադատությունների իսկական «տարափ» տեղաց:
Իսկ բարձրացված հարցը հետեւյալն էր` արդյո՞ք մեր երգը գրված էր աշխարհից Հայոց ցեղասպանության ճանաչումը պահանջող երկրի ձեռագրով, թե՞ այն բավական թույլ էր եւ պաշտպանվողական: «Զգում ես, որ կյանքը հաճախ անարդար է եղել: Կփախչես ու կմոռանաս այդ հուսահատությունը…»,-ասվում է երգում: «Փաստորեն, մենք ոչ թե պահանջում ենք, այլ մոռանում»,-տարակուսեցին սոցցանցերի մի շարք օգտատերեր: Նրանց զգալի մասի համար անհասկանալի էր հատկապես կրկներգում նշվող «Don’t deny/ Ever don ’t deny/Baby don’t deny/ You and I» հատվածում «Baby» բառի գործածությունը, որը թարգմանվեց որպես «սիրելիս», եւ ստացվեց այսպես՝«Մի՛ ժխտիր երբեք, մի՛ ժխտիր, սիրելի՛ս…»:
Արդյունքում երգի խոսքերը քննադատներին թվացին բավական փաղաքշական, բանը հասավ նույնիսկ նրան, որ «Արմքոմեդի» հումորային հաղորդման շրջանակում անդրադարձ եղավ երգին եւ սարկազմով նշվեց. «Հարյուրամյակի կապակցությամբ կստեղծվի եւս մեկ երգ` «Ճանաչի՛ր, փիսի՛կ»:
««Baby»-ն, միանշանակ, ականջ ծակող բառ է` բոլորովին այլ խոսույթից եւ կոգնիտիվ դիսոնանս է առաջացնում: Բառը թարգմանել «սիրելիս» մոտավորապես նույնն է, ինչ «table» բառը թարգմանենք «կահույք»: «Baby»-ն փաղաքշական, սլենգային բառ է, որը չի համապատասխանում մեր երգի նպատակին: Չգիտես ինչու` Հայաստանում ընդունված է հակադրվել հանրային կարծիքին: Սա այն դեպքն է, երբ հանրային կարծիքը հստակ վրիպակի մասին է ահազանգում, ու պարզ է, որ ահազանգելու նպատակը մեկն է՝ որպեսզի խմբի ելույթը լավ ստացվի»,-«Ժողովուրդ»-ի հետ զրույցում մեկնաբանեց «Արմքոմեդի» երգիծական հաղորդման հաղորդավար Նարեկ Մարգարյանը:
Եվ եթե «Եվրատեսիլ»-ի հայաստանյան պատվիրակության ղեկավար Գոհար Գասպարյանը նշում է, թե «Եվրատեսիլ»-ը երգի մրցույթ է՝ իր ուրույն կանոններով եւ ոչ թե քաղաքական հարթակ, ապա քաղաքական մեկնաբանները բոլորովին այլ կարծիքի են:
Քաղաքական վերլուծաբան Ստյոպա Սաֆարյանը մեզ հետ զրույցում ընդգծեց, որ եթե «Եվրատեսիլ»-ը խուսափում է այնպիսի երգից, որը միջպետական, միջազգային թշնամանք կքարոզի, դա դեռ չի նշանակում, որ հայաստանյան երգի հեղինակները պետք է դիմեն ինքնագրաքննության: «Հասկանալի չէ` երգը սիրային թեմայով է, թե Ցեղասպանության: Այս ողջ «խուճուճաբանությունից» անհաջող արդյունք է ստացվել: Ի վերջո, եթե Եվրոպան պետք է մեղադրեր մեզ այն բանում, որ մենք մրցույթում մեր ազգային ցավն ենք ներկայացնում, մենք էլ ի՞նչ անելիք ունենք այնտեղ»,-կարծիք հայտնեց վերլուծաբանը:
Այս բոլոր մտահոգությունները կարծես բավական չէին, մարտի 17-ին էլ «Առաջին ալիք»-ը հայտարարություն տարածեց, ըստ որի՝ «Genealogy»-ն «Եվրատեսիլ»-ում ներկայանալու է ոչ թե «Մի՛ ժխտիր», այլ «Առերեսվի՛ր ստվերին» երգով. այսպիսով` վերջինիս անվանումը փոխվել է: Նշվում է, որ այդ փոփոխությունը միտված է հետ մղելու քաղաքական ցանկացած շահարկում` կապված երգի ենթատեքստի հետ:
Իսկ մինչ մենք խուսափում ենք «Մի՛ ժխտիր» վերնագրից, թուրքական քարոզչամեքենան անում է իր «սեւ գործը». «Թուրքական դաշտում արդեն ստորագրահավաքներ են սկսվել, որպեսզի թույլ չտան՝ մեր երգը հնչի «Եվրատեսիլ»-ում: Դեռ թուրքական լրագրողական դաշտի հեղինակավոր անձանց կողմից մեր երգի վերաբերյալ խիստ քննադատությունների չեմ հանդիպել, սակայն կարծում եմ` եթե թուրքական կողմը փորձի խորանալ, ապա կգտնի որոշ ճեղքեր»,-մեզ հետ զրույցում կարծիք հայտնեց թուրքագետ Գեւորգ Պետրոսյանը:
«Ժողովուրդ»-ը փորձեց մեկնաբանություն ստանալ նաեւ այս տարվա եվրատեսիլյան երգի խոսքերի հեղինակ Իննա Մկրտչյանից: Հանրային հեռուստատեսության հասարակայնության հետ կապերի բաժնից խոստացան առաջիկայում արձագանքել թեմային:
«ԻՆՁ ՉԵՄ ՀԱՄԱՐՈՒՄ ՇՈՈՒԲԻԶՆԵՍՑԻ»
Երգչուհի Մարտա Կիրակոսյանը, ով առիթ ունեցավ ներկայանալ «Սիրո կամուրջ» մյուզիքլի գլխավոր հերոսուհու կերպարում, վերջին շրջանում հանդես է գալիս բացառապես իր բենդով: Նա «Ժողովուրդ»-ի հետ զրույցում նշել է էկրաններից բացակայելու պատճառների մասին եւ միեւնույն ժամանակ նկատել, որ Երեւանում կենդանի երգեցողությամբ երգչուհիները չեն գնահատվում:
-Մարտա՛, տեւական ժամանակ է` էկրաններին չեք երեւում, երկրպագուներն անհանգստացած են. ո՞րն է պատճառը:
-Հիմա երեւանյան տարբեր ակումբներում իմ բենդի հետ հանդես եմ գալիս կենդանի կատարումներով: Մտադիր չեմ որեւէ տեսահոլովակ թողարկել. այն կարծիքին եմ, որ անիմաստ է մատուցել այնպիսի արտադրանք, որը կկրկնի դաշտում եղածը: Դե, իսկ հեռուստածրագրերն էլ արդեն հետաքրքիր չեն: Հեռուստատեսությամբ երեւալն, առհասարակ, մի տեսակ անիմաստ է դարձել: Եթե ես ունենամ որեւէ ստեղծագործություն, որն ուզենամ հասցնել հանդիսատեսին, կնախընտրեմ այն տեղադրել «Յութուբ»-ում:
-Հանդիսատեսը դեռ հիշում է 4 տարեկան Մարտային, ով մեծացավ իր աչքի առջեւ, զարգացրեց տաղանդը, սակայն անհետացավ դաշտից, ինչո՞ւ:
-Ես ինձ չեմ համարում շոուբիզնեսցի: Երգում եմ իմ հաճույքի, գումար աշխատելու համար: Բենդով ներկայանալով` հասկացա, որ Երեւանում կենդանի երգեցողությամբ երգչուհիները չեն գնահատվում: Շատ քիչ թվով մարդիկ են պատրաստ վճարել նրանց մատուցած կենդանի երաժշտության դիմաց: Փոխարենը գնահատվում են ձայնագրված հիթերը` պարային համարներով:
-Մեկ տասնամյակ առաջ էլ էին հիթերը գնահատվում, այսօրվա հիթերը ինչո՞վ են զիջում դրանց:
-Ինձ համար այս թեմայի շուրջ խոսելը բարդ է ու ցավոտ: Այսօրվա արտադրանքը բացարձակապես չի համապատասխանում տասը տարի առաջ մատուցված երաժշտությանը: Նախ՝ այժմյան երգերում բացարձակապես չկա մեղեդի բացի այդ` դժվարանում եմ հիշել մի երգ, որում կարելի է գտնել ինչ-որ իմաստ: Երգիչները մտածում են ոչ թե ասելիքով հանդես գալու, այլ հիթ ստեղծելու մասին:
-Եթե, ինչպես Դուք եք նշում, կենդանի երաժշտությունը Երեւանում չի խրախուսվում, ինչպե՞ս եք պատկերացնում Ձեր հետագա ուղին երգարվեստում:
-Երգի հետ ծրագրեր չեմ կազմում: Պարզապես չեմ կարող հենց այնպես թողնել այս արվեստը, մտադիր եմ անել միայն այն, ինչն ինձ իսկապես հաճույք կպատճառի:
Նյութերը՝ ԱՆՆԱ ԲԱԲԱՋԱՆՅԱՆԻ
ԵՐԱԶԱՆՔԸ` ՆՈՐ ՖԻԼՄՈՒՄ
Շուտով Երեւանի կինոթատրոններում տեղի կունենա Դավիթ Սիմոնյանի նոր` «Երազանք 19:27» ֆիլմի պրեմիերան: Ռեժիսորը ESem.am-ին տեղեկացրել է, որ երկու ամիս տեւած նկարահանումներն ընթացել են Երեւանի մի շարք վայրերում եւ Բերդում: Այժմ ֆիլմը մոնտաժման փուլում է: Գլխավոր հերոսը երազանք է պահում 19:27-ին, եւ այն կատարվելու պահին ժամը կրկին 19:27 է լինում, այդ պատճառով որպես ֆիլմի անվանում ֆիքսվել է հենց այդ ժամը: Ֆիլմի դերասանական կազմում ընդգրկված են Արսեն Սաֆարյանը, Անդրանիկ Հարությունյանը, Լեւոն Հարությունյանը, Լիլիթ Քոչարյանը, Տիգրան Բերբերյանն ու այլք: Ֆիլմի մեծ պրեմիերան նախատեսված է ապրիլի 3-ին:
ԳՏԵԼ ԵՆ ՍԵՐՎԱՆՏԵՍԻ ԱՃՅՈՒՆԸ
Իսպանիայում հայտնաբերել են աշխարհահռչակ գրող Միգել դե Սերվանտես Սաավեդրայի աճյունը: ՏԱՍՍ-ի փոխանցմամբ՝ հետազոտական խմբի ղեկավար Ֆրանսիսկո Էտչեբարիան վստահորեն պնդել է, որ մենաստանի եկեղեցու ստորգետնյա մատուռում հայտնաբերվածների թվում եղել են «Դոն Կիխոտ»-ի հեղինակի աճյունամասերը: Նշենք, որ մեկ տարի անց լրանալու է իսպանացի գրողի 400-ամյակը: 17-րդ դարի փաստաթղթերի վկայությամբ՝ գրողը մահացել է 1616 թվականի ապրիլի 23-ին, Մադրիդում եւ թաղվել Սուրբ Երրորդություն միաբանության կանանց մենաստանում:
ԷԼԹՈՆ ՋՈՆ VS ԴՈԼՉԵ ԵՎ ԳԱԲԱՆԱ
Հերթական սկանդալն է բարձրացել համաշխարհային շոու-բիզնեսի ասպարեզում: Վերջերս դիզայներներ Դոմինիկո Դոլչեն եւ Ստեֆանո Գաբանան իտալական «Panorama» ամսագրին տված հարցազրույցի ժամանակ հայտնել են, որ դեմ են «գեյ-որդեգրությանն» ու փոխնակ մայրերին: Դոմինիկո Դոլչեն քիմիական ճանապարհով ծնված երեխաներին անգամ տվել է «սինթետիկ» եւ «արհեստական» որակումները: Հայտնի երգիչ Էլթոն Ջոնն էլ, ով ապրում է Դեւիդ Ֆերնիշի հետ եւ մեծացնում երկու «փոխնակ» որդիների, քննադատել է դիզայներների արտահայտած միտքը. «Դուք նույնքան հետամնաց եք, որքան ձեր նորաձեւությունը»,- Instagram-ում գրել է Էլթոն Ջոնը: Նա նույնիսկ կոչ է արել բոյկոտել «Dolce & Gabbana»-ն: Ի պատասխան Ստեֆանո Գաբանան Էլթոն Ջոնին անվանել է անկիրթ:
.gif)
