ԱԺ ՀՅԴ խմբակցության պատգամավոր Արծվիկ Մինասյանն այսօր խորհրդարանում ԱԺ կանոնակարգ օրենքում փոփոխություններ կատարելու մասին հարցի քննարկման ժամանակ նշեց, որ բյուջետային վերահսկողության շրջանակում բյուջետային գրասենյակի դերակատարումն էլ ավելի բարձր մակարդակի վրա կդրվի:
Նշենք, որ օրենքի փոփոխությամբ նախատեսվում է ստեղծել բյուջետային գրասենյակ, որը զբավելու է բյուջեի ելքերի ու մուտքերի վերաբերյալ տեղեկատվության ուսումնասիրմամբ` այդ տեղեկատվությունը տրամադրելով պատգամավորներին:
Նշենք, որ մի քանի պատգամավորներ, այդ թվում` ԲՀԿ-ական Միքայել Մելքումյանը և ՀԱԿ պատգամավոր Գագիկ Ջհանգիրյանը դեմ էին արտահայտվել բյուջետային գրասենյակ ստեղծելու մտքին: Վերջինս նույնիսկ նշել էր, որ անհասկանալի է` ինչ է այս հանձնաժողովը, և հարցադրում էր արել` լոբի ուտողների միությո՞ւն է, թե՞ գարեջրի կողմնակիցների:
Արծվիկ Մինասյանն իր ելույթում արձագանքեց բյուջետային գրասենյակին դեմ խոսող բոլոր պատգամավորներին: Անդրադառնալով Գագիկ Ջհանգիրյանի փաստարկներին` Մինասյանը հակադարձեց, ասելով, որ հենց Սահմանադրությունն է վերապահում ԱԺ-ին վերահսկողական լիազորություններ բյուջեի նկատմամբ: Նրա խոսքով՝ բյուջետային գրասենյակը ոչ այլ ինչ է, եթե ոչ ԱԺ-ում գործող փորձագետների խումբ:
«Ասում եք՝ Սահմանադությունը նախատեսո՞ւմ է այն, հարցնում եմ, Սահմանադրությունը նախատեսո՞ւմ է ձեր՝ վճարովի օգնականներ ունենալու ինստիտուտը: Իհարկե ոչ, նախատեսված չէ, բայց քանի որ պատգամավորի վրա դրված են լիազորություններ, դրանք իրականացնելու համար օրենքը նախատեսում է օգնականի ինստիտուտը, որը հաստիքով մտնում է ԱԺ աշխատակազմի մեջ», – նշեց նա:
«Այս կառույցի հիմնական նպատակը պատգամավորներին լիարժեք բյուջետային տեղեկատվություն տրամադրելն է, ու այդ մարմինն ավելի շատ օժանդակելու է ընդդիմությանը: Հիմա ես զարմանում եմ երեկ իրեն ընդդիմություն հայտարարած քաղաքական ուժի պահվածքն այս հարցում: Ուղղակի զարմանում եմ, քանի որ այն օգնելու է քաղաքական ընդդիմությանը», – հավելեց պատգամավորը:
Մինասյանը պարզաբանեց, որ բյուջետային գրասենյակը հավաքում է բյուջեի մասին տեղեկատվություն, տրամադրում խորհրդարանին, որպեսզի պատգամավորները ամբիոնի մոտ ելույթ ունենալիս տեղեկացված չլինեն, իսկ կառավարությունն էլ չօգտվի պատգամավորների անտեղյակությունից ու «ֆռռացնի պատգամավորին»: «Սա դեմ է կառավարությանը, եթե ուզում եք ճիշտն իմանալ, որովհետև պարտադրում է կառավարությանը թափանցիկ աշխատել ու լիարժեք տեղեկատվություն տրամադրել: Հիմա, փոխանակ մեծամասնությունը առարկի, ոչ մեծամասնություն է առարկում»,- եզրափակեց Արծվիկ Մինասյանը:
.gif)
