Նախագահ Սերժ Սարգսյանին այսօր իր հավատարմագրերն է հանձնել Հայաստանի Հանրապետությունում Թուրքմենստանի նորանշանակ արտակարգ և լիազոր դեսպան Մուհամեդնիյազ Մաշալովը:
Նախագահը շնորհավորել է դեսպան Մաշալովին՝ մեր երկրում դիվանագիտական առաքելությունն սկսելու կապակցությամբ և հաջողություններ մաղթել դեսպանի բարձր ու պատասխանատու աշխատանքում: Սերժ Սարգսյանն ընդգծել է, որ պատմականորեն ձևավորված հայ-թուրքմենական բարեկամության և փոխադարձ հարգանքի հիման վրա ձևավորված միջպետական երկխոսությունը տարեցտարի ամրապնդվում է, ինչին զգալիորեն նպաստում են բարձր մակարդակի փոխայցելություններն ու դրանց շրջանակներում ձեռքբերված պայմանավորվածությունները: Հանրապետության Նախագահը հույս է հայտնել, որ Մուհամեդնիյազ Մաշալովը պաշտոնավարման ընթացքում կանի ամեն հնարավորը՝ առավել ակտիվացնելու և խորացնելու առևտրատնտեսական, հումանիտար ու այլ ոլորտներում Հայաստանի և Թուրքմենստանի միջև փոխգործակցությունը:
Դեսպան Մաշալովը շնորհակալություն է հայտնել Նախագահ Սերժ Սարգսյանին շնորհավորանքի ու բարեմաղթանքների համար և վստահեցրել, որ իր աշխատանքը նպատակաուղղված կլինի երկու երկրների նախագահների միջև բարձր մակարդակով ձեռքբերված պայմանավորվածությունների, բազմաթիվ ոլորտներում ստորագրված փաստաթղթերի իրագործմանը, որոնք միտված են ավելի ամրապնդելու և զարգացնելու երկկողմ կապերը բոլոր բնագավառներում:
.gif)
