Ինչպես արդեն հայտնել էինք, Կոտայքի մարզպետ Արամ Հարությունյանն այսօր կառավարության նիստում պետք է ազատվեր զբաղեցված պաշտոնից: Այդպես էլ եղավ. հարցը զեկուցեց Տարածքային կառավարման և արտակարգ իրավիճակների նախարար Արմեն Երիցյանը, իսկ ՀՀ վարչապետ Հովիկ Աբրահամյանը հայտնեց, որ Արամ Հարությունյանին այլ պաշտոնի կնշանակեն:
Մեկ այլ որոշմամբ` այդ պաշտոնում պետք է նշանակվի ԲՀԿ նախկին առաջնորդ Գագիկ Ծառուկյանի փեսան` Կարապետ Գուլոյանը, ով մինչ այդ զբաղեցնում էր Աբովյանի քաղաքապետի պաշտոնը:
« Ղեկավարվելով Հայաստանի Հանրապետության Սահմանադրության 88.1-ին հոդվածով և հիմք ընդունելով Հայաստանի Հանրապետության Նախագահի 1997 թվականի մայիսի 6-ի ՆՀ-728 հրամանագրի 1.7-րդ կետը` Հայաստանի Հանրապետության կառավարությունը ո ր ո շ ու մ է. Կարապետ Գուլոյանին նշանակել Հայաստանի Հանրապետության Կոտայքի մարզպետ», – նշված է որոշման մեջ:
Այս հարցը մինչ այժմ դեռ չեն ներկայացրել, պետք է զեկուցի Արմեն Երիցյանը: Կառավարության աշխատակազմի ղեկավար-նախարար Դավիթ Հարությունյանն ընդգծեց, որ Գուլոյանի նշանակման հարցը պայմանական է, քանի դեռ նախագահը չի ստորագրել նախկին մարզպետի՝ պաշտոնից հեռանալու հարցը:
.gif)
