«Այլընտրանք են». Ն. Փաշինյանն ու Ա. Արզումանյանը ընդհարվեցին Վ. Էնֆիաջյանի հետ

Այսօր ԱԺ արտաքին հարաբերությունների մշտական հանձնաժողովում ՀՀ նախագահի ներկայացրած «Հայաստանի Հանրապետության եւ Գյուղատնտեսության զարգացման միջազգային հիմնադրամի միջեւ 2014 թվականի նոյեմբերի 12-ին Հռոմում ստորագրված «Ենթակառուցվածքների եւ գյուղական ֆինանսավորման աջակցություն» ծրագրի (ԵԳՖԱԾ) ֆինանսավորման համաձայնագրի քննարկումից հետո պետք է կազմակերպվեր դրական եզրակացությամբ այն հերթական քառօրյայի օրակարգ ներառելու հարցի քվեարկությունը:

Սակայն ՀՀԿ մի քանի պատգամավորներ ներկա չէին և հանձնաժողովի նախագահ Արտակ Զաքարյանն առաջարկեց անցնել հաջորդ հարցի քննարկմանը և քվեարկել մի փոքր ուշ:  Ընդդիմադիր Նիկոլ Փաշինյանն ու «Ժառանգություն» խմբակցության դե յուրե պատգամավոր Ալեքսանդր Արզումանյանն ընդդիմացան՝ պնդելով, որ ընթացակարգը չխախտի և անմիջապես հարցը դնի քվեարկության:

Մինչ այդ ՀՅԴ-ական Արմեն Ռուստամյանը նշեց, թե նախագծի վերաբերյալ վերապահումներ ունի: ԲՀԿ պատգամավոր Վահե Էնֆիաջյանը քվեարկեց ձեռնպահ և արդյունքում արձանագրվեց 6 կողմ, 5 դեմ և 1 ձեռնպահ և նախագիծը դրական եզրակացություն ստացավ: Ալեքսանդր Արզումանյանը հայտարարեց. «Փաստորեն ԲՀԿ-ն էլի յլընտրանք է՞»: Փաշինյանն էլ նշեց. «Այլընտրա՛նք չեն, արդեն ընդդիմություն են»: Վահե Էնֆիաջյանն էլ բարկացավ. «Ձեր ձևակերպումներում զո՛ւսպ եղեք»: