ՀԱՐՑ. Ես շաքարով հիվանդ կին եմ: Մեր տարածքային պոլիկլինիկայից շաքարի համար ստանում եմ «անիմալ» կոչվող դեղը, բայց այս ամիս դեռ չեմ ստացել: Ստիպված եմ գնել այն, բայց միայնակ թոշակառու եմ եւ չեմ կարող 30 հաբ գնել: Խնդրում եմ ասել՝ ՀՀ առողջապահության նախարարությունը ստանում է այդ դեղը, թե ինչ-որ խնդիրներ կան՝ դեղի հետ կապված:
Սոնյա Եղիազարյան (74 տարեկան, թոշակառու)

ՊԱՏԱՍԽԱՆ. Հայաստանի Հանրապետության առողջապահության նախարարությունը բավարարում է այդ դեղերի պահանջարկի 30-35 տոկոսը: Այսինքն՝ յուրաքանչյուրին տալիս են իր տարվա պահանջի մեկ երրորդը: Մնացածը նա պետք է գնի: Օրինակ, եթե հիվանդին երեք ամսվա համար 90 դեղահաբ է հասնում, ապա նա պետք է ստանա 30 հաբը, իսկ մնացածը ինքը պետք է ձեռք բերի: Հիմա տիկին Սոնյային տվել են իր հասանելիք դեղերի քանակը, նույնիսկ մի քիչ ավելի, բայց մեր աշխատակիցը կազմակերպում է այդ գործը, եւ տիկին Սոնյային վաղը կհատկացնենք եւս 30 հաբ դեղ:

«ԺՈՂՈՎՈՒՐԴ». Ցանկալի կլինի, որ մեր երկրում առողջապահությունը ամբողջապես անվճար լինի, ծայրահեղ դեպքում գոնե միայն կենսաթոշակառուների համար, որպեսզի տարեց մարդիկ ստիպված չլինեն տարբեր դռներ թակել՝ իրենց հարցը կարգավորելու համար: