Հայոց ցեղասպանության 100-րդ տարելիցի նախաշեմին աշխարհասփյուռ հայությունն ակնկալում է քաղաքական նշանակության բանաձևեր, հայտարարություններ և փաստաթղթեր ամբողջ քաղաքակիրթ մարդկությունից, մասնավորապես, համաեվրոպական քաղաքական կառույցներից: Այս մասին ՀՀԿ ԳՄ նիստի ավարտից հետո լրագրողների հետ հանդիպմանը նշեց ՀՀԿ փոխնախագահ Արմեն Աշոտյանը՝ անդրադանալով Հայոց ցեղասպանությունը դատապարտող բանաձևին, որը րոպեներ առաջ ընդունվել է Եվրոպայի խորհրդարանի կողմից:
«Ես կարծում եմ, որ Եվրոպական խորհրդարանում համապատասխան բանաձևի քննարկումը և քվեարկությունը եվրոպական քաղաքական վերնախավի հավատարմության երդում էր եվրոպական արժեհամակարգին, որը խարսխված է
քրիստոնեադեմոկրատական արժեքների վրա, և մերժողականությունը ինքնին պարսավելի երևույթ է Եվրոպայի հոգևոր և քաղաքական կյանքում», «Արմենպրես»ի հաղորդմամբ՝ ընդգծեց Աշոտյանը:
Նա հատուկ շեշտեց, որ Հայաստանի Հանրապետական կուսակցությունը, լինելով ԵԺԿ անդամ, երկու այլ քույր հայկական
կուսակցությունների հետ միասին գործադրել էր ջանքեր, որոնք բերել էին հստակ արդյունքի՝ հիշեցնելով, որ փետրվարին ԵԺԿն Հայոց ցեղասպանությունը ճանաչող և դատապարտող հայտարարություն ընդունեց: «Եվրոպայի խորհրդարանն ունի նաև ԵԺԿ խմբակցություն, որն ամենամեծն է այնտեղ, և ես կարծում եմ, որ ԵԺԿ քաղաքական համաժողովի դիրքորոշումը
նույնպես իր լուման ունեցավ տվյալ հարցի քննարկման և քվեարկության գործում», շեշտեց Աշոտյանը:
Նա նշեց, որ մարդկության դեմ գործած ոճիրների դատապարտումը չպետք է կախված լինի քաղաքական հայացքներից և քաղաքական շահերից՝ հավելելով, որ եվրոպական քաղաքական վերնախավից Հայաստանի ակնկալիքները հենց այդպիսին էին:
Եվրոպայի խորհրդարանում ընդունվել է Հայոց ցեղասպանության մասին բանաձևը: Այն առաջարկում և հանձնարարում է ԵՄ անդամ երկրների ազգային խորհրդարաններին ու կառավարություններին համապատասխան բանաձևեր ընդունել և որոշումներ կայացնել երևույթի ճանաչման ու դատապարտման վերաբերյալ:
.gif)
