Մամուլի ազգային ակումբը հայտարարություն է տարածել Հայոց ցեղասպանության 100-րդ տարելիցի կապակցությամբ:
Հայտարարությունում մասնավորապես ասված է.
«Մեր սերնդին է բաժին ընկել ոգեկոչելու հայ ժողովրդի բազմադարյա պատմության ամենաողբերգական էջի՝ Հայոց Ցեղասպանության 100-ամյա տարելիցը: Մեկ դար առաջ Օսմանյան կայսրությունում մշակվեց և գործողության մեջ դրվեց հայ ժողովրդի բնաջնջման, նրա պատմական հայրենիքի բռնազավթման հրեշավոր ծրագիրը, որին զոհ դարձան 1.5 միլիոն հայեր:
Այսօր, անտեսանելի հոգևոր կապերով շղթայված, 1.5 միլիոն հայերի հիշատակը իրենց սրտերում, 100-ամյա տարելիցը ոգեկոչում են աշխարհով մեկ սփռված հայ ժողովրդի զավակները:
Յուրաքանչյուր հայ լսում, զգում և կրում է իր միլիոնավոր հայրենակիցների մրմուջը, ցավն ու մորմոքը, որոնց ձայները լսվում են արաբական անապատներից, հեռավոր Ավստրալիայից, Կալիֆորնիայի լեռներից, արևավառ Աֆրիկայից, Կանադայի անտառներից, եվրոպական քաղաքներից, սլավոնական տափաստաններից: Հայի ձայնը չի լսվում միայն իր բնօրրանից՝ Վանից, Կարինից, Նեմրութի ու Սիփանի լանջերից, Բերկրիի ու Մշո դաշտերից:
Մամուլի ազգային ակումբը, միանալով աշխարհի տարբեր ծայրերում Հայոց Ցեղասպանության 100-ամյակը ոգեկոչող իր ազգակիցներին և օտարազգիներին, արձանագրում է՝
– Հայոց Ցեղասպանությունը մարդկութայն դեմ գործած հանցագործություն է: Այն մարդու և ազգերի՝ սեփական երկրում ապրելու իրավունքի բռնադատում էր: Նրա ընդունումն ու դատապարտումը միջազգային հանրության կողմից մարդու և ազգերի իրավունքների հանդեպ հարգանքի և դրանց գերակայության վերահաստատումն է,
– Ցեղասպանությունների կանխարգելման առաջին պայմանը արդեն եղած Ցեղասպանությունների ընդունումն ու դատապարտումն է,
– անհանդուրժողականության, ատելության, թշնամանքի կոչերն ու քարոզչությունը ստեղծում են պարարտ հող և հարմար միջավայր՝ ցեղասպանությունների իրականացման համար,
– անգամ 21- րդ դարում ցեղասպանությունները մնում են մարդկության համար լրջագույն սպառնալիք, խնդիրների լուծման վայրագ միջոց,
– իր իսկ պատմությանը դեմ հանդիման կանգնելը, Հայոց Ցեղասպանության ընդունումն ու դատապարտումը Թուրքիայի կողմից խաղաղ տարածաշրջան ունենալու երաշխիք է:
Մամուլի ազգային ակումբը դիմում է՝
– Թուրքիայի քաղաքացիական հասարակությանը և ԶԼՄ-ներին՝ չլռել, պատմել այն ամենի մասին, ինչ կատարվել է 100 տարի առաջ և պահանջել Թուքիայի իշխանություններից ընդունել և դատապարտել Օսմանյան կայրսության կողմից իրականացրած հայերի Ցեղասպանությունը. դա պատմական ծանր բեռը թոթափելու և սերունդներին այդ բեռից ազատելու միակ ճանապարհն է:
Մամուլի ազգային ակումբը հայտարարում է՝
– 1.5 միլիոն ցեղասպանված հայերի կենդանի, ապրող հուշաձանը պիտի դառնա ազատ, անկախ, ժողովրդավարական ազատությունները, մարդու իրավունքները հարգող, սեփական ուժերին և սեփական անվտանգությանն ապավինած Հայաստանը, ՀՀ քաղաքացուն երկրում պահող, երկրի հետ կապող միջավայրի և պայմանների ստեղծումը:
Ոգեկոչելով՝ 1.5 միլիոն նահատակների հիշատակը, մենք՝ Հայկի և Արամի, Արտաշեսի և Տիգրանի Մեծի, Մաշտոցի և Նարեկացու հետնորդներս, մտովի երդում տանք նրանց կառուցելու ազատ, անկախ, առաջադեմ, հզոր, մրցունակ պետություն՝ ալեհեր Արարատի խոկուն հայացք տակ, մեր սրտերը թողած Արարատի մյուս լանջին, մեր աչքերը հառած դեպի գալիքը»:
.gif)
