Ֆրանսահայ լեգենդար երգիչ Շառլ Ազնավուրն արդեն Հայաստանում է: Ինչպես «Զվարթնոց» միջազգային օդանավակայանից տեղեկացնում է«Արմենպրես»-ի թղթակիցը` նա րոպեներ առաջ ոտք դրեց հայկական հողին: Ազնավուրը Հայաստան է եկել ռուսաստանյան շրջագայություններից հետո: Երգիչը ելույթ էր ունեցել Սանկտ Պետերբուրգում և Մոսկվայում:
Ազնավուրը լրագրողների հետ ճեպազրույցում նշեց, թե իրեն լավ է զգում: Պատասխանելով լրագրողի դիտարկմանը, թե նա շատ կարևոր պահի է եկել Հայաստան, երգիչը նկատեց. «Ամեն օր էլ պետք է, որ երկրների նախագահները գան Հայաստան»: Պատասխանելով հարցին, թե ինչ է փոխվել Հայոց ցեղասպանությունից 100 տարի անց, Ազնավուրն ընդգծեց. «Ոչ շատ բան: Պետք է որ փոխվի, բայց դա չի լինում»:
Շառլ Ազնավուրը լրագրող, հեռուստահաղորդավար Վլադիմիր Պոզներին տված հարցազրույցում ավելի վաղ նշել էր, որ ապրիլի 24-ին անպայման ժամանելու է Երևան, որպեսզի մասնակցի Ցեղասպանության 100-րդ տարելիցի անմեղ զոհերին նվիրված միջոցառումներին:
«Չի կարելի անտեսել այն, ինչ տեղի է ունեցել: Թուրքերին պետք է ասել, որ ճշմարտությունը հայտնելու ժամանակն է»,- ասել էր Ազնավուրը:
.gif)
