Թաթուլի երգերի տակ որևէ օբյեկտում քյաբաբ ուտելը մի բան է, որակյալ երաժշտություն լսելը՝ մեկ այլ բան. «Առավոտ»

«Առավոտ» օրաթերթը գրում է. «Հիլբերտ Քիթ Չեսթերթոնը Սուրբ Ֆրանցիսկոսի մասին իր ակնարկում մի շատ խորաթափանց դիտարկում է արել. «Մարդը չի գցվի ձյան մեջ հանուն որևէ գաղափարի կամ միտումի, նա սոված չի մնա հանուն վերացական, թեկուզ ամենաճիշտ հասկացությունների: Բայց նա կհաղթահարի սովն ու ցուրտը բոլորովին այլ պատճառով՝ եթե նա սիրահարված է»: Քանի որ խոսքը կաթոլիկ սրբի մասին է, պարզ է, թե՛ որ սերը նկատի ուներ անգլիացի գրողը: Մեր ժողովրդի պատմության ամենադաժան ողբերգության 100-ամյակի տարելիցի օրերին ես մտածում եմ նման սիրո մասին:

Իրադարձությունները, կարծես թե, նույնպես զարգանում են այդ ուղղությամբ՝ Վատիկանի պատարագից մինչև «System of a down»-ի համերգ: Դրա սկիզբը դրեց մեկ այլ կաթոլիկ, նույնպես Ֆրանցիսկոս անունով՝ Հոոմի պապը, և անունների կրկնությունը, ինչպես գիտեք, պատահական չէ: Ֆրանցիսկոս պապը խոսում էր Հայոց ցեղասոուանության, նացիզմի և ստալինիզմի, ոչ թե թուրք, գերմանացի կամ խորհրդային ժողովուրդների մասին, և նրա ուղերձի մեջ չկար որևէ թույն կամ ատելություն, հակառակը՝ կար սեր, նախևառաջ՝ ճշմարտության հանդեպ:

Երեկվա համերգը նույնպես սիրո արտահայտություն էր՝ փոխադարձ սիրո հայազգի երաժիշտների և հայաստանյան երիտասարդության, որը պատրաստ էր մի քանի ժամ թրջվել անձրևի տակ: Գուցե միտքս տարօրինակ հնչի, բայց ռոք-համերգ լսելու պատրաստ քաղաքացիների այդքան մեծ զանգվածի առկայությունը նույնպես խոսում է մեր՝ հայերիս ներուժի մասին: Որովհետև Թաթուլի երգերի տակ որևէ օբյեկտում քյաբաբ ուտելը, օղի խմելը և դարդ անելը մի բան է, հազարավոր մարդկանցով որակյալ երաժշտություն լսելը՝ մեկ այլ բան»:

Ավելի մանրամասն՝ թերթի այսօրվա համարում։