Այսօր միջազգային մամուլի ուշադրության կենտրում է գտնվում Հայաստանում ընթացող Հայոց ցեղասպանության 100-ամյակին նվիրված միջոցառումները: Մասնավորապես Euronews-ը որպես իր գլխավոր լուր է հրապարակել Հայոց ցեղասպանության 100-ամյա տարելիցին նվիրված իրադարձությունները:
Հրատարակչությունը նշում է, որ համաշխարհային ղեկավարները, այդ թվում նաև Ռուսաստանի, Ֆրանսիայի ու Սերբիայի նախագահները հավաքվել են Հայաստանի մայրաքաղաքում՝ 1.5 միլիոն հայերի կոտորածների 100-ամյա տարելիցին նվիրված միջոցառումներին մասնակցելու համար: Հրատարակչությունը նշում է, որ Յոահիմ Գաուկը ևս ընդունել է, որ Գերմանիան՝ որպես Օսմանյան կայսրության դաշնակից իր պատասխանատվություն է կրում այդ մահերի հարցում:
BBC-ին իր հերթին գրում է, որ «Հայաստանը նշում է Օսմանյան կայսրության կողմից հայերի զանգվածային սպանությունների 100-ամյա տարելիցը»: Հրատարակչությունը բացի նրանից, որ նշում է, թե որ երկրների նախագահներն են Հայաստանում, նաև ուշադրություն է հրավիրում ողջ Երևանով մեկ փակցված անմոռուկներին ու «հիշում ենք ու պահանջում» պաստառներին:
Independent Irish-ը ևս գրում է, որ Հայաստանում են Ֆրանսիայի ու Ռուսաստանի նախագահները, որոնք եղել են Ծիծեռնակաբերդում: Հրատարակչությունը նաև մանրակրկտորեն նկարագրում է պաշտոնական արարողակարգի ընթացքը:
Բրիտանական հրատարակչությունը նաև նշում է, որ Հայոց ցեղասպանության զոհերի հիշատակը հարգելու համար Հայաստանում է նաև ֆրանսահայ երգիչ Շառլ Ազնավուրը:
.gif)
