Հայաստանում Ռուսաստանի դեսպան Վյաչեսլավ Կովալենկոն երեկ անդրադարձել է Ռուսաստանի դաշնային միգրացիոն ծառայության « Հայրենակիցներ» ծրագրի իրականացմանը Հայաստանում: Մասնավորապես` ի պատասխան հայկական կողմից հնչող այն մտահոգություններին, թե այդ ծրագրով Հայաստանը հայաթափվում է, ՌԴ դեսպանն ասել է. «Ոչ ոք հայերին բռնի ուժով Ռուսաստան չի տանում»: Ինչ խոսք, դեսպանն իրավացի է, խնդիրն էլ հենց այն է, որ 21-րդ դարում ոչ ոք չի էլ կարող հայերին բռնի ուժով տանել որեւէ տեղ, այդ թվում եւ` Ռուսաստան: Հետեւաբար` դա պետք է անել նրանց համոզելով, ավելի ճիշտ` գայթակղելով հեշտ տրվելիք ու արագ բարեկեցությամբ, ինչն էլ արվում է Ռուսաստանի դաշնային միգրացիոն ծառայության հայաստանյան ներկայացուցչության կողմից: Նշենք, որ 2006-ին մեկնարկած այս ծրագիրը, որն ի սկզբանե ժամանակավոր էր, անցած սեպտեմբերի 14-ին ՌԴ նախագահ Վլադիմիր Պուտինի կողմից հաստատվեց որպես անժամկետ: Ասել է թե` այն գործելու է` շարունակելով դեպի ուրալյան հեռուները գրավել աղքատության շեմին հայտնված մեր հայրենակիցներին: Միայն անցած չորս տարիների ընթացքում, ըստ ոչ պաշտոնական, սակայն հավաստի տվյալների, «Հայրենակիցներ» ծրագրի ներկայացուցչություն է դիմել շուրջ 26 հազար ՀՀ քաղաքացի, որոնցից 1500-ն արդեն իսկ հրաժարվել է ՀՀ քաղաքացիությունից եւ մշտական բնակության մեկնել ՌԴ: վերջերս էլ ԱԺ-ում ի պատասխան «Ժառանգություն» խմբակցության պատգամավոր Ալեքսանդր Արզումանյանի հնչեցրած մտահոգության, վարչապետ Տիգրան Սարգսյանը հայտարարեց, թե «Ռուսաստանի միգրացիոն ծառայության կողմից իրականացվող պետական ծրագիրը այն ձեւով, եւ այն ֆորմատով, որ իրականացվում է այլ հանրապետություններում, մեզ համար ընդունելի չէ եւ մտահոգում է ՀՀ կառավարությանը»: Վարչապետը նաեւ հավելեց, որ ՀՀ կառավարության այդ մտահոգության մասին տեղյակ է նաեւ ռուսական կողմը, որը խոստացել է ուղիներ գտնել խնդրի լուծման համար: Եվ ահա երեկ Ռուսաստանի դեսպանն այդ հարցի շուրջ հանդես է գալիս բավականին կտրուկ, եթե չասենք` ոչ դիվանագիտական հայտարարություններով, որոնց հիմնական հասցեատերն, ըստ ամենայնի, ծրագրի շուրջ հրապարակային մտահոգություն հնչեցրած Տիգրան Սարգսյանն է: Մասնավորաբար` դեսպան Կովալենկոն զուգահեռներ տանելով ԱՄՆ «Գրին քարտի» ծրագրով մեկնածների եւ «Հայրենակիցներ» ծրագրի միջեւ, նման հարցադրումներ արեց. «Ինչ է, ինչ-որ մեկը հային բռնի քաշում-տանում է Ռուսաստա՞ն, եթե դուք փակեք ներկայացուցչությունը, մարդիկ էլ չե՞ն գնա: ԱՄՆ Գրին քարտի ծրագրով ավելի շատ մարդ է մեկնել`5000 հոգի, քան այս ծրագրով:Ինչի՞ մասին է խոսքը, ինչի շուրջ է աղմուկը»: Իսկ թե ինչի շուրջ է դեսպան Կովալենկոյի բարձրացրած աղմուկը` կարծում ենք ավելորդ բացատրության կարիք չունի: Ամեն դեպքում, օտարերկրյա դեսպանի այս հարցադրումներն, ըստ էության հիմնավորված լինելով հանդերձ, չեն կարող վիրավորական չլինել հյուրընկալ երկրի վարչապետի համար: Իրեն հարգող վարչապետի:
.gif)
