Թուրքիայի 9 սոցիալիստական կուսակցություններից 5ը բացահայտ ճանաչել են Հայոց ցեղասպանությունը: Ինչպես հաղորդում է «Արմենպրես»ը, այս մասին հայտնում է թուրքական OdaTV հեռուստաալիքի կայքը` մեջբերելով Հայոց ցեղասպանության վերաբերյալ թուրքական բոլոր ձախամետ կուսակցությունների արտահայտած դիրքորոշումները: Այսպես, Թուրքիայի Ազատություն եւ համերաշխություն կուսակցության (ՃDP) կողմից Հայոց ցեղասպանության 100ամյա տարելիցի կապակցությամբ ապրիլքսանչորսյան ուղերձում թուրքական իշխանություններին կոչ է արվում ոչ թե ժխտել Ցեղասպանությունը, այլ «ճանաչել եւ հասկանալ»:
«Հավատում ենք, որ հայկական հարցի լուծման տիրույթը ոչ թե օտար երկրների խորհրդարաններն են, այլ ինչպես մեր եղբայր Հրանտ Դինքն էր ասել, անմիջապես այդ իրադարձությունների հիմնական կողմերը եւ մեր այս հողերը: Իշխանությունները պետք է վերջ դնեն իրենց մերժողական քաղաքականությանը, հայերին հասցված վատությունը պետք է ճանաչել եւ հասկանալ: Հայաստանի հետ սահմանադուռը պետք է բացվի եւ կոչվի Հրանտ Դինքի անունով: Պետք է վերացվեն Հայաստանի դեմ բոլոր արգելքները, սահմանափակումները եւ զարգացվեն տնտեսական, սոցիալական ու մշակութային կապերը», ուղերձում է նշել է ՃDP-ը: Թուրքիայի աշխատանքի կուսակցության (EMEP) ապրիլի 24ին տարածած հայտարարության մեջ ասվում է. «1915 թվականի իրադարձությունները ցեղասպանություն բնութագրելու համար պատրվակներ չեն կարող հնարվել: Իրականություն այն է, որ դա ծրագրված ցեղասպանություն է: Դա թուրք եւ մուսուլման չեղածներից Թուրքիան «մաքրելու» գործողություն էր»:
Հայոց ցեղասպանության 100-ամյա տարելիցի հետ կապված sendika.org կայքում հրապարակած ուղերձում Թուրքիայի «Ժողովրդական տների» գլխավոր քարտուղար Նուրի Գյունայը նշել է. «Առանց ցեղասպանություն եզրի օգտագործման հայերի հետ պատահածի մասին խոսել հնարավոր չէ: Առանց հայի ցավը հանգստացնելու, հնարավոր չէ վերացնել թուրքի եւ քրդի ամոթը: Անկախ նրանից, թե ինչ են ասում քաղաքական գործիչները, պետք է ընկալել ցեղասպանության իրողությունը: 1915 թվականին տեղի ունեցածի հետ հաշվի նստելը դժվար է լինելու, բայց մենք դա կարողանալու ենք ընկալել եւ կատարել»:
«Դեմոկրատական իրավունքների ֆեդերացիա» կուսակցության (DHF) տարածած հայտարարության մեջ ասվում է. «Մեր աշխարհագրությունում իսկական կոտորած, շահագործում, բռնաճնշում, ասիմիլյացիա եւ ֆաշիզմ է տեղի ունեցել: Հարյուրավոր տարիներ թուրքսունի նախատիպից դուրս բոլոր այլ հավատքի եւ էթնիկ խմբերը կամ հարկադրաբար ասիմիլացվել, կամ սպանվել են: Մենք մեր բոլոր անդամներին ու համակիրներին հրավիրում ենք մասնակից լինել այդ պատմական անարդարության եւ ցեղասպանության դատապարտմանը»: Հայոց ցեղասպանությունը ճանաչել է նաեւ Հավասարություն սոցիալիստական կուսակցությունը (ESP):
Նշելով, որ 1915ը բոլոր թուրքերի վզից կախված մարդկության խնդիր է, ապրիլի 24ի հետ կապված հայտարարության մեջ ESPը նշել է. «Հայոց ցեղասպանության 100ամյա տարելիցը շահագործող, մարդասպան, ցեղասպան թուրքական պետության կողմից բոլորիս վրա դրված սեւ բիծի հարյուրամյակն է: Կոտորածների քաղաքականությունն այս պետության հանցանքն է, դա մեր բոլորի վրա դրված մարդկության հարց է: Ցեղասպանության հետ Թուրքիայի առերեսումն իսկական ազատություն կբերի մեր ժողովրդին:
Մենք պարտավոր ենք շահել այդ ազատությունը: Ցեղասպանության 100ամյա տարելիցին մենք կիսում ենք հայ ժողովրդի ցավերը, եւ խոստանում, որ պայքարելու ենք նոր հավասար, եղբայրական եւ ազատ աշխարհ ստեղծելու համար»: Մնացած թուրքական սոցիալիստական կուսակցությունները թեեւ բացարձակ կերպով չեն ճանաչել Հայոց ցեղասպանությունը, սակայն, Թուրքիայի իշխանություններին կոչ են արել առերեսվել սեփական պատմությանը եւ հետեւություններ անել: Թուրքիայի սոցիալիստական կուսակցություններից միայն տխրահռչակ հակահայ Դողու Փերինչեքի գլխավորած «Վաթան» կուսակցությունը հայտարարել է, թե Հայոց ցեղասպանությունը «իմպերիալիստական սուտ» է:
.gif)
