“ՉԻ” տեղեկություններով, օրերս ՀՀԿ-ական նախկին պատգամավոր, “Գրեյթ Վելլի” ընկերության սեփականատեր Տիգրան Արզաքանցյանի թիկնազորի ներկայացուցիչները տարվել են ՀՀ ոստիկանություն, որտեղ նրանց պարզապես զինաթափել և տուն են ճանապարհել: Բանն այն է, որ ՀՀ ոստիկանությունը սկսել է ուսումնասիրել, թե որ պատգամավորի կամ օլիգարխի թիկնազորային ծառայությունն է գործում համապատասխան օրենքի շրջանակներից դուրս:
Թերթի հիշեցմամբ` ամիսներ առաջ Սերժ Սարգսյանը հրահանգեց ոստիկաններին բռնել և տուգանային հրապարակներ տանել այն օլիգարխների թիկնազորի ներկայացուցիչներին, որոնք գոլդ համարանիշների ավտոմեքենաների “շարասյունով” ուղեկցում են իրենց տերերին:
Արդյունքում` այնպես ստացվեց, որ օլիգարխներին իրենց “ախրաննիկները” սկսեցին ուղեկցել տաքսիներով: Հիմա, երևի, Արզաքանցյանը չի տիրապետել այդ գաղտնիքին, և հայտնվել է սխալ վայրում` սխալ պահին: Միաժամանակ` չնայած Արզաքանցյանը շարունակում է համարվել “ամենափողոտ” գործարարներից մեկը, այնուամենայնիվ, վերջինս այլևս ձեռքին չունի կախարդական մանդատը, և շատ դեպքերում ստիպված է լինելու իրեն զգալ ՀՀ շարքային քաղաքացու կարգավիճակում: Ի դեպ` սա վերաբերվում է նաև նրա “զինաթափված ախրաննիկներին”:
.gif)
