Հայ ազգային կոնգրես խմբակցության քարտուղար Արամ Մանուկյանն այսօր խորհրդարանում ելույթ ունենալիս աննախադեպ համարեց այն, որ գազը սահմանին գնում են 165 դոլարով, իսկ քաղաքացուն վաճառում 395 դոլարով:
«Սա իսկապես նմանը չունեցող բան է. Ուկրաինան 247 դոլարով է գազը սահմանին գնում, իսկ քաղաքացուն վաճառում է 270-285 դոլարով, սա աննախադեպ համեմատություն է, ճիշտ է, այստեղ ԱԱՀ-ն չեն վերցնում սպառողից, այլ կառավարությունն է սուբսիդավորում, բայց սպառողն է փող մուծում, համեմատեք: Այս ձևով շարունակելով գազի և էլեկտրաէներգիայի համակարգը ձեռքից կգնա ու Հայաստանի էներգետիկ համակարգն ուղղակի կպայթի: Սպառողի շահը չկա բացարձակ, Կառավարության անփույթ, անխնա վերաբերմունքը տեսեք` ուր է հասցրել, որ իրենք չեն ուզում համապատասխան ԱԱՀ-ն իջեցնեն իրենց մասով և մի փոքր անգամ թեթևացնեն քաղաքացու բեռը»,-նշեց Մանուկյանը և հիշեցրեց Սերժ Սարգսյանի խոսքերը ՋԷԿ-ի կառուցման մասին.
«Ո՞ւր է այդ ծրագիրը, չկա, Սերժ Սարգսյանի հայտարարությունը, թե 2018-ին երկրորդ բլոկն աշխատելու է, դե արի ու մի ասա՝ իյա, իրո՞ք, 5 մլրդ դոլարի հարց է, ֆինանսական հեռանկար չունեն, վարկեր չեն տալիս: Ժողովուրդ, ներվեր է պետք դիմանալու համար, լուրջ եմ ասում, ներվեր է պետք: Քաջ գիտակցում ենք, որ էլի ընկնում ենք պարտքի տակ, բայց գիտենք, որ պետք է ատոմակայանը որպես ռազմավարական նշանակության գործիք պահել, կողմ ենք և´ պարտքին, և´ երկրորդ բլոկի շինարարությանը»,-եզրափակեց նա:
.gif)
