ԵՊՀ-ում անտեսե՞լ են վարչապետի հանձնարարականը. պարզաբանում են համալսարանից

Մոտ երկու ամիս առաջ ՀՀ վարչապետ Հովիկ Աբրահամյանը խոստացել էր պետական համալսարաններում սովորող նաիրիտցիների երեխաների ուսման վարձերի վճարումները մի քանի ամիս հետաձգելու վերաբերյալ դիմել բուհերի ռեկտորներին: Այսօր գործարանի աշխատակիցների հերթական բողոքի ակցիայի ժամանակ «Նաիրիտ»-ի ակցիաները համակարգող խմբի անդամ, գործարանի նախկին մամուլի քարտուղար Անուշ Հարությունյանը հայտարարեց, որ Հովիկ Աբրահամյանը խոստումը կատարել է և հանձնարարական է տվել բուհերի ռեկտորներին` նաիրիտցիների երեխաների ուսման վարձերի վճարումների ժամկետները հետաձգելու համար:

Սակայն, Անուշ Հարությունյանի տեղեկացմամբ` այս հանձնարարականին չի ենթարկվել Երևանի պետական համալսարանի ռեկտորատը, որտեղից իրենց նամակ է եկել, որ ուսման վարձի վճարումը չի հետաձգվում: «Վարչապետի հանձնարարականը, խնդրանքը համալսարանի մակարդակով չի կատարվում: Երկրում բեսպրեդել է, ուրիշ բառով անհնար է բնութագրել»,- հայտրարեց Անուշ Հարությունյանը:

Armlur.am-ը կապ հաստատեց ԵՊՀ հասարակայնության հետ կապերի եւ լրատվության վարչության պետ Կարեն Գրիգորյանի հետ և փորձեց ճշտել` ինչու է անտեսվել վարչապետի խնդրանք-հանձնարարականը և մերժողական պատասխան ուղարկվել նաիրիտցիներին:

Գրիգորյանը մեզ փոխանցեց, որ նման բան չկա և Երևանի պետական համալսարանում սովորող նաիրիտցիների երեխաներին ընդառաջել են` թույլ տալով մասնակցել քննաշրջանին, իսկ վարձը հետո մուծել: Նշենք` ԵՊՀ-ում սովորում են 4 նաիրիտցիների երեխաներ` 2-ը մագիստրատուրայի ավարտական կուրսում, իսկ մնացած երկուսը` առկա և հեռակա համակարգով դեռևս սովորում են, ավարտական կուրսում չեն: «Մենք կրթության նախարարությունից համապատասխան նամակը ստացել ենք և ընդառաջել ենք նրանց, թույլ տալով մասնակցել քննություններին: Իսկ դիպլոմը կստանան վարձը վճարելուց հետո»,- հավելեց Կարեն Գրիգորյանը:

Քրիստինա Աղալարյան